HOT STORIES OF THE WEEK

Nagpatupad na ng partial lifting ng deployment ban ang gobyerno ng Pilipinas para sa mga Pilipinong manggagawa sa Kuwait.

Sa isinagawang press briefing sa Malacañang, sinabi ni Presidential Spokesperson Harry Roque na inalis na ang umiiral na ban sa mga skilled at semi-skilled workers sa nasabing bansa.

Dahil dito, inaasahang libu-libong mga Pinoy worker ang agad na maide-deploy sa Kuwait.

Ayon kay Roque bunga ito ng nilagdaang memorandum of understanding o MOU sa pagitan ng Pilipinas at Kuwait para sa proteksyon ng mga OFW noong nakaraang Biyernes.

Ilan sa mga probisyong nakapaloob sa nasabing kasunduan ay ang sa pagkain, bahay, kasuotan, health insurance, gayundin ang paggamit ng cellphones ng mga OFW para hindi maputol ang kanilang komunikasyon sa mga mahal sa buhay na nasa Pilipinas.

Gayunman sinabi ni Roque na tanging mga skilled at semi-skilled workers ang papayagang makapagtrabaho sa Kuwait, sa ngayon ay hindi pa aniya masabi kung kailan tuluyang aalisin ang deployment ban sa pangkalahatan kasama na ang para sa mga Pinoy household workers.

Matatandaang nitong Pebrero ay ipinatupad ng Pangulong Duterte ang deployment ban sa mga ‘newly-hired’ OFWs na tungong Kuwait matapos ang kaso ng pagpatay sa Pinay household worker na si Joanna Demafelis na natagpuan ang labi sa loob ng isang freezer sa apartment ng kanyang mga amo.

—AR

Maayos ang kondisyon ng mga bihag na hawak ng bandidong Abu Sayyaf.

Ayon ito kay Joint Task Force Sulu Commander Brigadier General Cirilito Sobejana matapos nilang kumustahin ang mga nasabing bihag sa pinakahuling nasagip nilang bihag din ng bandidong grupo.

Kinumpirma rin ni Sobejana ang nangyaring engkuwentro ng tropa ng pamahalaan at mga bandido mag-a-alas-12:00 ng tanghali at kasagsagan ng botohan kahapon kung saan isang sundalo ang nasawi.

Ang nasabing bakbakan ay bahagi aniya ng kanilang rescue operations.

“Dahil selective ang paggamit ng aming sandata because of the kidnap victims, ayon sa na-rescue namin ang mga bihag naman ay nasa maayos na kondisyon, of course medyo may kahirapan ang kanilang sitwasyon ngayon dahil sila’y lumalakad kasama ang kanilang mga abductor.” Pahayag ni Sobejana

Kahapon, kinumpirma ni Sobejana na na-recover nila ang katawan ng isang miyembro ng Abu Sayyaf na nasawi matapos na muling maka-engkuwentro ng militar ang bandidong grupo.

Naniniwala si Sobejana na marami-rami ang nalagas sa panig ng kalaban matapos ang magkakasunod na engkuwentro.

“Pangatlong engkuwentro na ‘yung kahapon, ‘yung second day may 10 casualties sa panig ng kalaban.”

Aniya, parte ng kanilang mga operasyon ang pag-rescue sa mga bihag gayundin ang pagpapanatili ng seguridad sa lugar.

Tiniyak ni Sobejana na ginagawa nila ang lahat upang ligtas na ma-rescue ang mga bihag na hawak ngayon ng bandidong grupo.

“I’m giving assurance to the families of the kidnap victims na gagawin natin ang lahat upang mailigtas natin sila.” Dagdag ni Sobejana

AR/ (Ratsada Balita Interview)

Magpupulong ngayong linggo ang Judicial and Bar Council o JBC.

Pangunahing agenda ayon kay JBC member retired SC Justice Jose Catral Mendoza, Chairman ng Executive Committee ng JBC ay pagbubukas ng nominasyon sa magiging kapalit ni dating Chief Justice Maria Lourdes Sereno.

Sinabi ni Mendoza na pag-uusapan din nila kung kaagad na magkakasa ng nomination process o hihintayin pa ang final ruling ng Korte Suprema sa nasabing usapin.

Binigyang diin ni Mendoza na malinaw naman sa desisyon ng High Tribunal na may sampung araw pa si Sereno para maghain ng motion for reconsideration sa kanyang kaso.

Magugunitang walong mahistrado ang pumabor sa quo warranto petition laban kay Sereno at anim naman ang kumontra sa nasabing petisyon na isinampa ni Solicitor General Jose Calida.

—-

Isusulong ng Department of Finance o DOF ang mas mataas pang buwis sa alak at sigarilyo.

Ipinaliwanag ni Finance Secretary Carlos Dominguez III na hindi lamang ito para sa karagdagang kita ng gobyerno kundi para na rin aniya sa kalusugan ng publiko.

Sa ilalim ng TRAIN Law, dahil sa excise tax ay umaabot na sa P32.50 ang kada pakete ng sigarilyo noong Enero 1 kumpara sa P30 kada pakete noong nakaraang taon.

Matatandaang sa ilalim ng package two plus ng DOF, asahan pang tataas ang presyo ng sigarilyo at alak.

—-

Itinuturing ng Department of Interior and Local Government o DILG na matagumpay ang pagdaraos ng barangay at Sangguniang Kabataan o SK elections.

Ayon kay DILG Assistant Secretary Epimaco Densing III, naging pagkalahatan namang naging maayos at mapayapa ang pagtatapos ng eleksyon kahapon.

“Sa lahat po ng aspeto ng pagpapatakbo ng halalan ay generally peaceful and in order naman po, pero hindi pa rin maiwasan na may mga isolated cases pa rin tayo ng panggugulo, reklamo ng pandaraya, vote buying, but on a general aspect, naging matagumpay ang naging pagpapatakbo natin ng barangay at SK elections.” Ani Densing

Samantala, desidido ang DILG na mapanagot ang mga pulitikong naki-alam sa nagdaang eleksyon.

Sinabi ni Densing na sasampahan ng kasong administratibo sa tanggapan ng Ombudsman ang mga lokal na opisyal na mapapatunayang namili ng boto at nangampanya para sa isang opisyal ng barangay.

Batay sa tala, nasa 100 kongresista, mahigit 1,000 local government officials at libu-libong barangay officials ang sangkot sa vote buying.

“Importante kasi documented dapat ‘yung pakikialam ng mga local na opisyales at isama mo na rin pati ang mga kongresista, I’m sure nakialam ‘yan sila pero ang tanong natin ay kung dokumentado pa ang pakikialam nila.” Pahayag ni Densing

(Ratsada Balita Interview)

Nanawagan ang Philippine National Police o PNP sa mga netizen na ipadala sa mga awtoridad ang mga nakunan nilang picture o video ng vote buying.

Ayon kay PNP Spokesman Chief Supt. John Bulalacao, makakatulong ang naturang mga ebidensya sa pagsasampa ng kaso sa mga bumili ng boto nitong eleksyon.

Ang PNP-Anti Cyebrcrime Group na aniya ang bahalang kumilala sa mga suspek na nasa video o litrato.

Kahapon, dalawang insidente ng vote buying ang naitala aniya sa Valenzuela at Taguig City.

Ayon kay Bulalacao, naglalaro sa P50 hanggang P2,500 ang bentahan ng boto batay sa mga sumbong na kanilang natanggap.

—-

Binulabog ng dalawang pagsabog ang lalawigan ng Maguindanao sa pagsisimula at kalagitnaan ng barangay at Sangguniang Kabataan elections ngayong araw.

Naitala ang unang pagsabog sa labas ng munisipiyo ng bayan ng Datu Unsay, bago magsimula ang botohan kung saan isang  rifle-grenade ang posibleng ginamit.

Dakong alas dos y medya naman ng hapon nang bombahin ng Moro Islamic Liberation Front ang polling center ng barangay Damakling, sa bayan ng Paglat, gamit ang m203 grenade launcher.

Inihayag ni Lt. Col. Harold Cabunoc, commander ng 33rd infantry battalion na  bumagsak ang pampasabog malapit sa isang military post.

Wala namang naitalang nasugatan sa dalawang pagsabog habang sasampahan ng kaso at paglabag sa ceasefire agreement ang suspek sa ikalawang pambobomba na si MILF sub-commander Jeffrey Talusan.

Ulat ni Jonathan Andal (Patrol 31)

Mula sa 27 noong Sabado, umakyat na sa 33 ang bilang ng mga namamatay ngayong panahon ng eleksyon.

Ito ang inanunsyo ni Philippine National Police o PNP Chief Oscar Albayalde sa press briefing sa Camp Crame.

Hindi naman aniya lahat ng napatay ay kandidato, iba rito mga sibilyan na taga-suporta lamang ng mga tumatakbo.

Mayroon din aniyang 26 na sugatan at 24 na tinambangan pero hindi nasaktan.

Kasama na sa datos, ang pananambang kay Daanbantayan Mayor Vicente Loot at pagpatay kay dating Congressman Euforonio Eriguel sa Agoo La Union.

Ayon pa kay Albayalde mayroon nang 42 na insidente ng karahansan ang kanilang naitatala mula nang mag-umpisa ang election epriod noong April 14, pito rito ang kumpirmadong election related.

Sa ngayon ayon sa PNP Chief, naka-full alert ang pulisya sa buong bansa para sa eleksyon kung saan 160,000 pulis ang ikinalat.

—-