HOT STORIES OF THE WEEK

Inalis na ni Pangulong Rodrigo Duterte ang total deployment ban sa Kuwait.

Ayon kay Presidential Spokesman Harry Roque, ang naging desisyon ng Pangulo ay batay sa rekomendasyon ni Special Envoy to Kuwait Abdullah Mama-o.

Kasunod nito, agad inatasan ni Pangulong Duterte si Labor Secretary Silvestre Bello III na tuluyan nang alisin ang ban sa pagpapadala ng mga Pilipinong manggagawa sa Kuwait.

Ibig sabihin ay maaari na rin umanong magpadala ng mga household service worker o domestic helpers sa naturang bansa.

Una rito, inalis ng pamahalaan ang deployment ban para sa mga skilled at semi-skilled workers.

Magugunitang, nagkaroon ng lamat ang relasyon ng Kuwait at Pilipinas dahil sa kaso ng isang OFW na si Joana Demafelis na natagpuang patay sa loob ng freezer sa isang abandonadong apartment sa nasabing bansa.

—-

Ipinahayag na ng Pangulong Rodrigo Duterte ang kanyang hinahanap para sa susunod na magiging Ombudsman.

Ayon sa Pangulo, kinakailangang mayroong integridad ang susunod na Ombudsman.

Hindi aniya siya pipili ng pulitiko o kaya naman ay babae para sa naturang posisyon.

“Mag-nominate sila, pero I choose, but gusto ko ‘yung bilib ang tao sa integrity niya. Of course it could not be a politician, lalo na hindi babae.” Ani Pangulong Duterte

Una nang tinukoy ng Pangulo na kukunsultahin niya ang mga tao sa Office of the Ombudsman ngunit hindi ang paretirong si Ombudsman Conchita Carpio-Morales.

“I will have to consult everybody. I will even have to consult the Ombudsman people, not Morales.” Pahayag ni Morales

Pumapalo na sa sampu (10) ang mga nag-aambisyong maging susunod na Ombudsman kasunod nang pagtatapos ng termino ni Ombudsman Conchita Carpio-Morales sa Hulyo.

Kabilang sa mga nag-a-apply para maging susunod na Ombudsman sina Labor Secretary Silvestre Bello III, Supreme Court Associate Justice Samuel Martires, Sandiganbayan Justice Efren Dela Cruz at Davao RTC Judge Carlos Espero II.

Bukod pa ito sa mga abogadong sina Atty. Edna Herrera-Batacan, Rey Ifurung, Rainier Madrid, Rex Rico, Felito Ramirez at Special Prosecutor Edilberto Sandoval.

—-

Target ng Department of Information Communications Technology o DICT na mapili na ang ikatlong telco na mag-ooperate sa bansa bago matapos ang Agosto.

Sa panayam ng DWIZ, sinabi ni DICT Officer in Charge Eliseo Rio na posibleng masimulan ang bidding bago ang State of the Nation Address o SONA ng Pangulong Rodrigo Duterte.

Sinabi ni Rio na sa susunod na linggo ay nakatakda na silang makipagpulong sa oversight committee na binuo ng Pangulo para gawing pinal ang terms of reference para sa mga sasali sa bidding.

Pero bago aniya nila gawing final ang terms of reference ay ilalathala muna ito para makuha ang pulso ng taongbayan.

“Ibi-bid nila ‘yung kanilang committed level of service, so pagandahan sila niyan, kung gaano kalawak ang kanilang bibigyan ng services by let’s say after 5 years, kung ano ‘yung speed ng kanilang internet at ‘yung cost ng speed na ‘yun, ‘yung pinaka-lowest na offer nila, anong speed ‘yun at doon na po ang labanan.” Ani Rio

Kabilang aniya sa mga nagpahiwatig na ng paglahok ang mga kumpanyang galing ng China, Vietnam, Japan at South Korea.

Kasabay nito, tiniyak ni Rio na mayroon silang mga inilatag na panuntunan para matiyak na susunod sa kanilang commitment ng mabilis na internet connection ang ikatlong telco.

“Kasi kung sino-sino lang ang mapili natin then baka mamaya ay mabili lang si la ng Globe and Smart so balik ulit tayo sa square number one, iniiwasan nating mangyari ulit ‘yung sa San Miguel Corporation, malaking kumpanya na ‘yan na nag-partner sa pinakamalaking telco ng Australia, eh hindi pa nga po nag-operate ay nabili na po ng Globe and Smart, so ‘yan po ang iniiwasan namin kaya hinay-hinay tayo sa paggawa ng terms of reference.” Pahayag ni Rio

(Ratsada Balita Interview)

Nilagdaan na ni Pangulong  Duterte ang  proklamasyon na nagdedeklara sa Philippine Rise bilang marine protected area.

Isinagawa ang deklarasyon kasabay ng pagtungo ni Pangulong Duterte sa nabanggit na undersea region, kahapon.

Ito’y bilang bahagi ng unang anibersaryo ng pagpapalit ng pangalan ng Benham sa Philippine Rise na ini-award ng United Nations bilang extended undersea continental shelf ng Pilipinas.

Kasama ni Pangulong Duterte sa pagbisita sina Defense Secretary Delfin Lorenzana, National Security Adviser Hermogenes Esperon Jr., Armed Forces of the Philippines Chief Gen. Carlito Galvez at iba pang military at government officials.

Nanindigan ang Punong Ehekutibo na poprotektahan ng gobyerno ang  soberanya ng bansa sa Philippine Rise sa kabila ng bantang pananakop ng Tsina sa nasabing teritoryo.

Magugunitang nanawagan kamakailan ang Philippine chapter ng International Ocean Conservation Non-profit Oceana sa Pangulo  na gawing protected area ang 13 million hectare ng undersea plateau sa bahagi ng Aurora province.

Samantala, hindi na natuloy ang pagsakay ng jet ski ni Pangulong Duterte patungong Philippine o Benham Rise mula sa dalampasigan ng Aurora province.

Ito, ayon kay Special Assistant to the President Christopher ‘Bong’ Go, ay dahil na rin sa edad ng Pangulo.

Sa halip ay sina Baste Duterte, anak ng Pangulo at si Go ang nag-jet ski sa bahagi ng Casiguran Bay kahapon.

ICYMI:
Anak ni Pangulong Duterte na si ‘Baste’ at Special Assistant to the President Bong Go, nag-jet ski sa bahagi ng Casiguran Bay sa Aurora kahapon. | via @jopel17 pic.twitter.com/H7eUihM1rC

— DWIZ Newscenter (@dwiz882) May 15, 2018

Kasabay nito ay pinangunahan din ni Pangulong Duterte ang send-off ceremony ng 50 Filipino Scientist na magsasagawa ng isang buwang pagsasaliksik sa Philippine Rise.

ICYMI: Proklamasyon na nagdedeklara sa Philippine Rise bilang protected marine area, nilagdaan na ni Pangulong Duterte. Isinagawa rin ang send-off ceremony para sa tinatayang 50 Filipino marine scientists na magsasagawa ng research expedition sa Philippine Rise. | via @jopel17pic.twitter.com/Zo2ZJfmKfP

— DWIZ Newscenter (@dwiz882) May 15, 2018  

By Drew Nacino / Jennelyn Valencia