HOT STORIES OF THE WEEK

Nanindigan si dating Tourism Secretary Wanda Teo na malinis ang kaniyang konsensya at walang tinatago.

Ito ay matapos na madiskubre ng Commission on Audit o COA ang ilang mga kuwestiyonableng transaksyon noong siya ay kalihim pa ng Department of Tourism o DOT.

Tiniyak na din ni Teo na handa siyang harapin at sagutin ang anumang kaso na isasampa laban sa kaniya.

Ilan sa mga kinukuwestiyon ng COA ay ang mahigit na dalawang bilyong pisong halaga ng transaksyon ng kagawaran sa ilalim ng pamumuno ni Teo.

Ayon sa ulat ng COA, kasama na rito ang ad placement ng ahensya sa programa ng Tulfo brothers sa PTV-4 at pagsa-shopping ng mga mamahaling gamit sa Duty Free.

Nasilip din ng COA ang mga biyaheng ginawa ni Teo sa limang bansa partikular sa Germany, Thailand, Turkey, Singapore at South Korea noong nakaraang taon kung saan siya nakatanggap ng mahigit 800,000 subsistence allowance.

Gayundin ang halos 20 milyong travel allowance na tinanggap ni Teo at ilang opisyal ng DOT at higit 271 milyong pisong ginastos naman para sa kampanyang Experience Philippines.

Una nang tinukoy ng Office of the Ombudsman na posibleng maharap si Teo sa kasong graft dahil sa mga maanomalya nitong transaksyon sa DOT.

—-

Inihahanda na ng Malacañang ang isang Executive Order o EO kaugnay sa localized peace talks sa New People’s Army o NPA.

Ipinabatid ni Presidential Spokesman Harry Roque na sa localized peace talks ay didiretso na ang gobyerno at bibigyang kapangyarihan ang mga local official na makipag-usap sa mga combatants kapag hindi pumayag si CPP-NDF Founder Jose Maria Sison na gawin sa Pilipinas ang peace talks.

Pitong kondisyon ang inilatag ng gobyerno sa localized peace talks tulad ng national orchestrated, centrally directed at locally supervised ang pag-uusap.

Ang amnesty package ay dapat ding naka-base sa disarmament, demobilization, rehabilitation at reintegration sa lipunan at iba pa.

Sinabi pa ni Roque na naglatag din ang gobyerno ng apat na localized peace engagement at kabilang dito ang localized peace talks, community dialogue, local peace package at confidential dialogue.

Nagkalat ngayon ang mga nakasabit na tarpaulin na may nakalagay na “Welcome to the Philippines, Province of China”.

Viral ngayon sa social media ang naturang mga tarp na naispatang nakasabit sa mga foot bridge sa Quezon City.

Sa harap ito ng anibersaryo ng pagka-panalo ng Pilipinas sa Arbitral ruling kontra China hinggil sa mga pinag-aagawang teritoryo sa West Philippine Sea.

Pangunahing reaksyon ng mga nakakita nito ay ang pagkainis sa naturang tarp na hiling nila ay matanggal na agad ng MMDA o ng lokal na pamahalaan.

TINGNAN:
Airport Police, tinatanggal ang tarpaulin na may nakalagay na ‘Welcome to the Philippines, Province of China’ | via @raoulesperas pic.twitter.com/11WsXOBwh2

— DWIZ Newscenter (@dwiz882) July 12, 2018

Matatandaang sa talumpati noong Pebrero ni Pangulong Duterte, nagbiro itong maaaring gawin ng China na kanilang probinsya ang Pilipinas.

—-

Nag-sorry si Pangulong Rodrigo Duterte sa Diyos kasunod ng kanyang kontrobersiyal na ‘stupid God’ remark.

Ito ang inamin ng Pangulo sa naging meeting nila ni Bro. Eddie Villanueva ng Jesus is Lord Movement kamakalawa.

Ngunit binigyang diin ni Duterte na tanging sa Diyos lamang siya hihingi ng paumanhin.

“If it’s the same God, I’m sorry, that’s how it is. Sorry, God. I said sorry, God. If God is taken in a generic term by everybody listening then that’s well and good.”

“But I only apologize to God and nobody else. If I wronged God, he would be happy to listen. Why? Because my God is all-forgiving. Why? Because God created me to be good and not bad.” Ani Pangulong Duterte

Nagpatutsada pa ito sa kanyang mga kritiko na huwag gamitin ang Diyos sa pag-atake sa gobyerno.

“You can criticize us anything at all. Never, never use the name of God as a front to attack government. Do not use God to attack government. There is a separation of power between the church and government. Why don’t you just go there and help and feed people?” Pahayag ng Pangulo

Matatandaang bago ito ay pumasok ang Pangulo sa ceasefire sa Simbahang Katolika matapos ang maiinit na pahayag nito laban sa Diyos.

Samantala, ikinalugod naman ng ilang senador ang pahingi ng sorry ni Pangulong Rodrigo Duterte sa Diyos.

Ayon kay Senador Panfilo Lacson, nagpapasalamat siyang naliwanagan na ang Pangulo.

Aniya, hindi na mahalaga kung kaninong Diyos ito nag-sorry lalo’t iisa lang naman ang Diyos sa buong universe.

Samantala, sinabi naman ni Senador Joel Villanueva, tanging ang Diyos na lamang ang makapaghuhusga kung may sinseridad ang ginawang pagso–sorry ng Pangulo.

Umaasa pa si Villanueva na mapamumunuan na ni Pangulong Duterte ang bansa sa higit na pagkakaisa at may respeto sa paniniwala ng bawat isa.

—-

Wala pang katiyakan kung matutuloy ang 2019 midterm elections.

Ito ang pangamba ni House Speaker Pantaleon Alvarez matapos isumite ng Consultative Committee kay Pangulong Rodrigo Duterte ang draft ng Federal Constitution na kanya namang ipinaubaya sa Kongreso.

Ayon kay Alvarez, bukod sa proposed national budget sa susunod na taon, maraming iba pang mahalagang panukalang batas ang target ipasa ng Kongreso kaya’t mahabang panahon ang kanilang kailangan upang pag-aralan ang draft.

Kinontra naman ni Senate President Tito Sotto III ang muling pinalulutang na no-el o no election scenario ni House Speaker Pantaleon Alvarez sa 2019.

Ayon kay Sotto, makakansela lamang ang nasabing eleksyon kapag naamyendahan na ang konstitusyon.

Aniya, ang tanong dito ay kung handa na ang mga mambabatas partikular ang mga senador na amyendahan ang batas.

Una nang sinabi ni alvaRez na magiging mas praktikal kung hindi magkakaroon ng eleksyon sa 2019 para maging mas madali ang transition sa gobyerno.

Drew Nacino / Rianne Briones

(Updated)

Dalawang suspek na sa pagpatay kay General Tinio, Nueva Ecija Mayor Ferdinand Bote ang naaresto ng mga pulis sa bayan ng Del Gallego, Camarines Sur.

Kinilala ang dalawa na sina Florencio Suarez, 48-anyos at Robert Gumacay, 35-anyos.

Ayon kay Chief Supt. Arnel Escobal, director ng Bicol Provincial Police Office, naharang sina Suarez at Gumacay sa isang checkpoint habang lulan ng Toyota Avanza sa Andaya Highway, barangay Cabasag, kahapon.

Inalerto aniya ng PNP-Criminal Investigation and Detection Group ng Central Luzon ang Del Gallego Municipal Police kaya’t agad naglagay ng checkpoint ang PNP-Highway Patrol Group.

Magugunitang pinagbabaril si Mayor Bote habang sakay ng kanyang sasakyan palabas ng tanggapan ng National Irrigation Administration o NIA sa Cabanatuan City noong Hulyo 3.

(Ulat ni Jaymark Dagala)

Lalagdaan ni Pangulong Duterte ang Bangsamoro Basic Law bago ang nakatakdang ikatlong State of the Nation Address (SONA) nito sa Hulyo 23.

Inihayag ito ng tagapagsalita ng Pangulo na si Harry Roque matapos kumbinsihin ng Pangulo ang mga lider ng mababa at mataas na kapulungan na i-adopt ang bersyon ng Kamara sa pulong nito sa Bicameral Conference Committee sa Malacañang.

Samantala, kumpiyansa ang Palasyo na kung ganap nang magiging batas ang BBL ay posible nang makamit ang kapayapaan sa Mindanao at maiwasan na muling pumutok ang kaguluhan sa rehiyon.

Pinirmahan na ni Pangulong Duterte ang batas na magbabawal sa lahat ng uri ng hazing kabilang ang initiation rites sa fraternities, sororities at mga organisasyon sa mga paaralan. komunidad, maging sa mga uniformed service learning institutions.

Ito ay bilang pag-amiyenda sa Republic Act 8049 o ang Anti-Hazing Act of 1995, na nabatikos dahil sa pagiging malabnaw o mahina.

Sa naturang batas, pinalawak pa ang depinisyon ng hazing kung saan ay kabilang na ang “physical or psychological suffering, harm or injury inflicted on a recruit, neophyte, applicant or member as part of an initiation rite or a requirement for continuing membership in a fraternity or sorority or organization.”

Ang sinumang mapapatunayang nagplano at nakilahok sa hazing na nagresulta ng kamatayan, rape, sodomy o mutilation ay papaatawan ng reclusion perpetua o habambuhay na pagkakabilanggo at may kabayaran na P3 million.

Matatandaan na umugong ang mga panawagan na amiyendahan at mas pagtibayin ang polisiya sa anti-hazing noong nakaraang taon matapos pumanaw si Horacio ‘Atio’ Catillo, ang first year law student sa University of Santo Tomas dahil sa hazing.

Ikinagalak naman ng mga senador ang paglagda ni Pangulong Rodrigo Duterte sa Republic Act 11503 o Anti-Hazing Act of 2018 kung saan mas pinabigat ang parusa sa sinumang mapapatunayang sangkot sa nasabing aktibidad.

Bilang principal sponsor ng nasabing batas, umaasa si Senador Panfilo Lacson na matutuldukan na ang karahasan at wala nang susunod pa sa malagim na sinapit ni Horacio ‘Atio’ Castillo na nasawi dahil sa hazing.

Naniniwala naman si Senate Majority Floor Leader Juan Miguel Zubiri na tila nakamit na rin ni Atio ang hustisya matapos malagdaan ang bagong batas.

Sinabi naman ni Senador Nancy Binay na dapat seryoso ang awtoridad sa pagpapanagot sa sinumang makikilahok sa hazing.

Positibo rin ang para kay Senador Bam Aquino ang paglagda ng Pangulo sa pinatibay na anti-hazing law na isa umanong paraan para matigil ang karahasan sa bansa.

May Ulat nina Jopel Pelenio (Patrol 17) / Cely Ortega-Bueno (Patrol 19)

Tinanggihan ni PNP chief Oscar Albayalde ang kahilingan ni Senate President Tito Sotto na payagan ang nakakulong na si Senadora Leila de Lima na makapagsagawa ng public hearing sa Kampo Crame dahil aniya’y marami pang panukalang batas ang nakabinbin sa Komite na pinamumunuan ng senadora.

Sa liham ni Albayalde, sinabi nito na maaari namang idulog sa Korte na may hawak ng kaso ni De Lima ang naturang kahilingan ni Sotto.

It is with regret that the PNP cannot appropriately act on the matter considering Senator De Lima’s status as a detention prisoner with restricted right to exercise profession and hold public office. Consequently, any matter pertaining to requests to exercise her legislative functions as an elected senator and conduct committee hearings for such purpose is a matter for the Court having jurisdiction over her pending case/s to decide.” Ani Albayalde sa liham nito kay Sotto.

Dahil dito, pag-aaralan na ng Pangulo ng Senado ang iba pang maaaring maging opsyon dahil aniya, hindi naman nito gusto ang panghihimasok sa Hudikatura.

Sa ngayon ay nasa 6 na major bills na nakapasa na sa 3rd reading sa Kamara ang nakabinbin sa komite ni De Lima, ito ang mga sumusunod:

1.) Public Solicitations Act
2.) Magna Carta of the Poor
3.) Magna Carta of Day Care Workers
4.) Emergency Volunteer Protection Act
5.) Social Welfare and Development Agencies Act, at

6.) Rural Employment Assistance Program Act

Ulat ni Cely Ortega-Bueno (Patrol 19)