HOT STORIES OF THE WEEK

Tiniyak ni Majority Leader Juan Miguel Zubiri na nakasusunod sa itinatadhana ng konstitusyon ang binubuo nilang Bangsamoro Basic Law o BBL.

Inihayag iyan ni Zubiri na siyang chairman ng Senate Subcommittee on the BBL sa isyu kung bakit tila natatagalan sila bago maipasa ang nasabing batas.

Ayon kay Zubiri, kinakailangan nilang maging maingat at mabusisi sa mga detalye ng nasabing batas dahil kinakailangang maging katanggap-tanggap ito para sa lahat ng mga taga-Mindanao.

The only way to amend it once again is through another plebiscite, idadaan ulit sa Kongreso at dadaan sa plebisito. Kaya naman talagang tinitingnan namin paisa-isa ang lahat ng mga sections at articles to make sure na wala po kaming mali na nailagay or unacceptable language, kaya natagalan po tayo. Pahayag ni Zubiri sa panayam ng DWIZ.

Kasunod nito, umaasa si Zubiri na tatanggapin na ng Bangsamoro Transition Commission o BTC ang naturang batas upang maikasa na ang plebesito.

Nakumpirma ng PDEA o Philippine Drug Enforcememnt Agency ang umano’y pagkakasangkot ng dalawang kongresista at isang alkalde sa iligal na droga.

Ayon kay PDEA Director General Aaron Aquino, mula aniya ang tatlong hindi pinangalanang halal na opisyal sa 87 mga politikong napasama sa narco-list.

Batay aniya sa isinagawang pagsusuri ng PDEA kasama ang Philippine National Police, Armed Forces of the Philippines at National Intelligence Coordinating Agency, napatunayang dawit ang tatlong opisyal sa iligal na droga.

Gayunman, aminado si Aquino na nahihirapan silang kasuhan ang mga nasabing opisyal dahil hindi aniya direkta ang pagkaka-ugnay ng mga ito sa iligal na droga kundi mga protektor lamang.

Kasabay nito, iginiit ni Aquino na napapanahon nang magpatupad ng compulsory drug test sa lahat ng mga pulitiko.

Pinag-reresign ni Ilocos Norte Governor Imee Marcos ang mga head revisors ng Presidential Electoral Tribunal o PET.

Ito’y makaraang mahuli ang mga ito na sumama sa ikinasang outing ng mga revisor ng kampo ni Vice President Leni Robredo sa Barangay Pansol, Calamba sa Laguna.

Ayon sa gobernador, hindi tama ang pagsama ng mga head revisors ng pet sa outing ng kampo ni Robredo lalo’t patuloy ang isinasagawang re-count hinggil sa inihaing protesta ng kaniyang kapatid na si Dating Senador Ferdinand Bongbong Marcos Jr.

Tinawag ding fake news ni Marcos ang pahayag ng kampo ni Robredo na alam ng kaniyang kapatid ang naturang aktibidad at nagpadala pa umano ito ng pagkain.

Hindi aniya kukuwestyunin ng kaniyang kapatid ang naturang okasyon kung alam nila ito at kung totoo ang pinalulutang ng kampo ni Robredo.

Pero sa panig ni Robredo, sinabi sa DWIZ ng legal adviser nitong si Atty. Barry Gutierrez na nagsalita na ang PET sa naturang usapin kaya’t hindi na ito dapat pang palakihin ng kampo ni Marcos.

“Ang kwento kasi po nun, ito po ang nakaabot sa amin, parang yung mga head revisors, ito po yung mga empleyado mismo ng PET, napapansin na over the past few months na medyo nagkakainitan yung mga representatives ni VP Leni at yung mga representatives ni Mr. Marcos so iniisip nila, baka magkaroon tayo ng outing para medyo magkalamigan ng ulo. Natutuwa nga po kami dahil tinuldukan na po ito ng PET kumbaga, idinismiss at ibinasura na yung motion ni Mr. Marcos at sila na mismo ang nagsabi na tapos na itong issue.”

Tinanggalan na ng police escort si Sen. Antonio Trillanes IV.

Ito ang kinumpirma ng senador kung saan simula aniya katapusan ng Hunyo ay inalis na sa kanya ang mga nakatalagang tauhan ng Philippine National Police.

Sa kabila nito, hindi naman nababahala si Trillanes dahil sa alam naman aniya niya kung paano pangangalagaan ang kanyang sarili.

Maliban dito, naniniwala din ang senador na kung oras na ng isang tao ay oras na nito.

Matatandaang nagviral ang post ng isang netizen na nagpapahayag ng pangamba na baka matulad si Trillanes kay Tanauan City Mayor Antonio Halili na napatay makaraang bawian ng PNP security detail.

Binigyang diin ng Korte Suprema na walang nilalabag na anumang batas ang mga personalidad na maagang nangangampanya para sa 2019 midterm elections.

Ayon kay Supreme Court spokesman Atty. Theodore Te, mayroon nang desisyon noon ang Korte Suprema na tanggalin ang ‘premature campaign’ bilang election offense.

Sa ilalim ng automated election law, pinapayagan aniya ang mga nakikitang posters at aktibidad ng ilang mga pulitiko at personalidad.

Una rito , binatikos ng mga kritiko ng administrasyon ang umano’y maagang pangagampanya ni Special Assistant to the President Bong Go dahil sa mga nagkalat nitong posters maging ang mga pamamahagi nito ng mga relief goods.

Kapwa tumaas ang approval ratings nina Pangulong Rodrigo Duterte at Vice President Leni Robredo sa ikalawang bahagi ng 2018.

Batay sa Pulse Asia survey, nakapagtala ng 88 percent na approval score si Pangulong Duterte.

Mas mataas ito ng walong (8) porsyento kumpara sa 80 percent na approval rating nito noong Marso.

Samantala, umakyat naman na sa 62 percent ang approval rating ni Robredo na mas mataas kumpara sa 59 percent noong unang quarter ng 2018.

Lumamalabas din sa survey na 87 percent ng mga Pilipino ang may malaking tiwala kay Pangulong Duterte habang 56 percent naman ang kay Robredo.

Ang naturang survey ay isinagawa noong Hunyo 15 hanggang 21 sa may 1,800 respondents sa harap ng kainitan ng isyu ukol sa pagpapatalsik kay Supreme Court Chief Justice Maria Lourdes Sereno, deklarasyon ni Pangulong Duterte na hindi ito makikipag-giyera sa China at mga panawagang suspendihin ang bagong reporma sa buwis o ang TRAIN Law.

[Pulse Asia (June 2018) nationwide survey on the performance and trust ratings of the top national government officials.]

—-

Iniimbestigahan na ng Philippine National Police (PNP) at Metropolitan Manila Development Authority o MMDA ang kumalat na tarpaulin na nagsasaad na probinsya ng China ang Pilipinas.

Ayon kay PNP Spokesperson Sr. Supt benigno Durana, inaalam na nila kung sino ang nasa likod ng iligal na paglalagay ng mga pulang tarpaulin.

Naniniwala si Durana na ang naglagay ng mga banner ay gustong ipahiya ang gobyerno dahil sa bumubuting relasyon ng Pilipinas at China.

Sinabi naman ni MMDA General Manager Jojo Garcia, hindi maaring magsabit ng tarpaulin sa mga footbridge nang walang pahintulot mula sa kanila.

Aminado naman si Garcia na hindi nahagip ng CCTV camera ang mga nagkabit ng tarpaulin dahil hindi gumagalaw ang mga camera sa naturang mga footbridge.

Nakita ang mga nasabing mga tarpaulin sa footbridge sa Quezon Avenue, C-5 Road, Airport Road, Pasay Rotonda at Commonwealth.

—-