HOT STORIES OF THE WEEK

Muling binanatan ni Pangulong Rodrigo Duterte ang Simbahang Katolika, isang araw matapos magkasundong iwasan muna ang pagbatikos sa isa’t isa.

Sa kanyang talumpati sa isang business summit sa Pampanga, hindi napigilan ni Pangulong Duterte na supalpalin muli ang mga alagad ng Diyos na bumabatikos sa kanya partikular ang Australian nun na si Sister Patricia Fox.

Nagbanta pa ang Punong Ehekutibo sa sinumang gumagamit sa pangalan ng Diyos upang atakihin siya maging ang gobyerno.

“Huwag mong isali ang Diyos mo doon sa platform of your criticism in your attack because when I answer, ‘pagka sinabi mo sa isyu, sinali mo ang Diyos, pu***g ina, patay ang Diyos na ‘yan.”

“I have the right to answer. There is a separation of powers. Why are you fucking… the name of the Lord against me?” Pahayag ng Pangulong Duterte

Sa kabila ng mga banat, muling ipinagmalaki ni Pangulong Duterte ang Panginoon na kanyang pinaniniwalaan na wala anyang katulad na Diyos sa ibang relihiyon.

“You know, my God never created hell, because if he created hell, he must be a stupid God. My God is not stupid to create man just to burn him in hell. Hindi ako naniniwala ng gano’n eh. I do not believe in heaven because if I do, only a fraction of you will ever enter heaven.” Dagdag ng Pangulong Duterte

—-

Sinertipikahan na bilang urgent ni Pangulong Rodrigo Duterte ang Universal Health Coverage Bill.

Ayon kay Presidential Spokesman Harry Roque, nagdesisyon si Pangulong Duterte na sertipikahang urget ang naturang bill sa kanilang cabinet meeting sa Malacañang.

Setyembre noong isang taon nang ipasa ng Kamara ang bersyon nito ng panukalang batas habang nakabinbin ito sa Senado.

Sa ilalim ng house version, awtomatikong mapapabilang ang bawat Filipino sa national health security program upang matanggap ang lahat ng benepisyo kabilang ang inpatient, outpatient at emergency care services.

Nanawagan naman ang Palasyo sa mataas na kapulungan ng Kongreso na paspasan na ang pag-apruba sa nabanggit na bill para sa mas malawak na health at free hospital coverage ng mga mamamayan.

—-

Bumaba ang net satisfaction rating ni Pangulong Rodrigo Duterte.

Ito ang resulta ng isinagawang 2nd quarter survey ng Social Weather Stations o SWS mula noong Hunyo 27-30 ngayong taon.

Mula sa 56% noong Marso, bumaba ang rating ng Pangulo sa 45% o labing isang (11) porsyentong pagbaba.

Bagama’t “good” ayon sa SWS, ito na ang pinakamababang rating ni Duterte mula nang manungkulan siya noong Hunyo 2016.

Sa naturang survey, lumabalabas na 65% ng mga Pilipino ang kuntento sa performance ni Pangulong Duterte habang 20% naman ang di kuntento at 15% ang hindi makapagdesisyon.

Ginawa ang survey sa mga panahon na sinabi ng Pangulo ang mga katagang “stupid” ang Diyos.

Nagbigay naman ng komento si Pangulong Duterte hinggil sa lumabas na survey at sinabing hindi siya interesado dito.

“I do not care. Make it 15…wala na ako diyan. It does not interest me at all. Basta ako, cast along na lang ako”. Pahayag ng Pangulong Duterte

—-

Hawak na ni Pangulong Rodrigo Duterte ang shortlist ng mga asian pathology expert na bubuo sa 3-man panel na magsasagawa ng pagsusuri kaugnay sa mga batang naturukan ng anti – degue vaccine na Dengvaxia.

Ayon kay Presidential Spokesperson Harry Roque, mismong si Health Secretary Francisco Duque III ang nagsumite ng shortlist kay Pangulong Duterte.

Aniya, apat na eksperto mula sa Vietnam, Thailand, Singapore at Sri Lanka ang kabilang sa pagpipilian ni Pangulong Duterte kung saan tatlo dito ang pipiliin ng punong ehekutibo na bubuo sa Dengvaxia panel.

Sinabi pa ni Roque, sapat ang nakalaang pondo para sa pag-iimbita ng mga eksperto mula sa ibang bansa.

Nakatakdang magpadala ng tulong ang Pilipinas sa Japan na nahaharap ngayon sa kalamidad.

Ayon kay Presidential Spokesman Harry Roque, ipinag-utos mismo ni Pangulong Rodrigo Duterte ang pagpapadala ng mga sundalo, engineer at doktor sa Japan para tumulong sa rescue at rehabilitasyon matapos ang matinding pagbahang naranasan doon na ikinasawi ng mahigit isandaan (100) katao.

Maliban dito, sinabi ni Roque na magpapadala ding ang gobyerno ng Pilipinas ng mga gamot sa Japan.

Batay sa pinakahuling tala, aabot na sa isandaan at dalawampu’t dalawa (122) na ang nasawi sa pagbaha sa Japan.

—-

Aprubado at i-eendorso na ni Pangulong Rodrigo Duterte sa Kongreso ang draft ng Federal Constitution ng Consultative Committee o Con-Com.

Ayon kay Con-Com Spokesman  Ding Generoso, isang bagay lamang ang hiling ni Pangulong Duterte at ito ay rebisahin ang isang probisyon na magbibigay-daan sa kanyang pagbaba sa pwesto  sa sandaling magsimula ang transition period.

Ito, anya, ay kung magtatagumpay ang isusulong ng administrasyon na pagpapalit ng sistema ng gobyerno patungo sa federal form.

Una ng inihayag ni Pangulong Duterte na wala siyang balak na palawigin ang kanyang termino sa sandaling itatag na ang  sistemang pederal.

—-

Nagpatawag ng cabinet meeting si Pangulong Rodrigo Duterte sa Malakanyang ngayong hapon.

Ito ayon kay Presidential Spokesperson Harry Roque, ay upang mailatag na ang mga lalamanin ng SONA o State of the Nation ni Pangulong Duterte sa Hulyo 23.

Kasabay nito, sinabi ni Roque na kaniyang inaasahan na mas maikli ang magiging talumpati ni Pangulong Duterte ngayong taon kumpara sa dalawang nauna nitong SONA.

Paliwanag ni Roque, ito aniya ay dahil nauna na ring nagsagawa ng pag-uulat sa Bayan o Pre-SONA ang iba’t ibang chairman ng cabinet cluster committee ng Pangulo.

Samantala, sinabi naman ni Roque na nagpatawag ng cabinet meeting si Pangulong Rodrigo Duterte.