HOT STORIES OF THE WEEK

Nagpatawag ng cabinet meeting si Pangulong Rodrigo Duterte sa Malakanyang ngayong hapon.

Ito ayon kay Presidential Spokesperson Harry Roque, ay upang mailatag na ang mga lalamanin ng SONA o State of the Nation ni Pangulong Duterte sa Hulyo 23.

Kasabay nito, sinabi ni Roque na kaniyang inaasahan na mas maikli ang magiging talumpati ni Pangulong Duterte ngayong taon kumpara sa dalawang nauna nitong SONA.

Paliwanag ni Roque, ito aniya ay dahil nauna na ring nagsagawa ng pag-uulat sa Bayan o Pre-SONA ang iba’t ibang chairman ng cabinet cluster committee ng Pangulo.

Samantala, sinabi naman ni Roque na nagpatawag ng cabinet meeting si Pangulong Rodrigo Duterte.

Ipinag-utos ni PNP o Philippine National Police Chief Director General Oscar Albayalde ang paglansag sa mga private armed groups at gun for hire.

Ito ay bilang tugon na rin sa panawagan ng VACC o Volunteers Against Crime and Corruption kasunod ng serye ng pagpatay sa ilang mga opisyal ng pamahalaan, pari, prosecutors at mga miyembro ng iba pang sektor.

Ayon kay Albayalde, batay sa kanilang datos aabot sa 78 ang bilang ng mga private armed groups sa bansa na karamihan ay matatagpuan sa Mindanao.

Samantala, maaga na ring pinatitiyak ni Albayalde ang maigting na seguridad sa buong bansa hanggang sa pagsapit ng 2019 midterm elections.

Paliwanag ni Albayalde, bagama’t wala pa silang natatanggap na anumang banta tulad ng pinalulutang ng CPP-NPA, mas maigi pa rin aniyang maging handa na ang lahat.

(with report from Jaymark Dagala)

Tatlong persons of interest ang tinitignan ng PNP o Philippine National Police sa kaso ng pagpatay kay Trece Martires Vice Mayor Alexander Lubigan.

Ayon kay Cavite Provincial Police Director Senior Supt. William Segun, batay sa kanilang mga nakalap na CCTV footages malapit sa pinangyarihan ng krimen, sakay ng isang itim na pick up truck ang mga salarin sa pagpaslang sa bise alkalde at aide nito.

Makikita rin aniya sa video  ang pagsulpot ng nasabing pick up truck malapit sa scene ilang minuto bago at matapos ang insidente.

Samantala, inihayag na rin ni PNP Chief Director General Oscar Albayalde na meron na silang lead sa kaso ng pagpapatay kay Lubigan.

Gayuman tumanggi muna si Albayalde na magbigay pa ng mga karagdagang detalye para hindi aniya masunog ang kanilang imbestigasyon.

Nangako naman si Albayalde na agad ding ipaaalam ito sa publiko anumang araw mula ngayon hanggang sa susunod na linggo.

(With report from Jaymark Dagala)

Kinumpirma ng DFA o Department of Foreign affairs ang pagkakaligtas sa dalawang pinay na dinukot sa Iraq.

Sa inilabas na statement ni Foreign Affairs Secretary Allan Peter Cayetano, lubos anya ang pasasalamat nila sa diyos at sa Iraqi authorities na nailigtas ang ating mga kababayan.

Isang grupo di umano ng mga kriminal ang dumukot sa dalawang pinay sa bahagi ng Diyala province.

Ilan sa mga miyembro ng grupo ang di umano’y nadakip ng Iraqi authorities nang iligtas nila ang dalawang pinay.

Sa ngayon ay nananatili pa di umano sa custody ng Iraqi authorities ang dalawang pinay.

Itinanggi ni Senate President Vicente “Tito” Sotto III ang mga ulat ng posibleng term extension ni Pangulong Rodrigo Duterte hanggang taon 2030 sa ilalim ng panukalang charter change.

Ayon kay Sotto, wala pa namang pinal sa draft constitution na inaprubahan ng Consultative Commitee para sa planong pagpapalit ng sistema ng gobyerno patungo sa pederalismo.

Naniniwala ang Pangulo ng Senado na hindi magiging kapit-tuko sa posisyon ang Punong Ehekutibo lalo’t maka-ilang beses na nitong inihayag na nais na niyang bumaba sa powesto sa oras na ratipikahan ang bagong Saligang Batas.

Samantala, aminado naman si Sotto na masyado pang maaga para mag-komento sa anumang nilalaman ng Con-Com draft dahil hindi pa ito nakararating sa Kongreso.

(Usapang Senado Interview)

Pumasok na sa loob ng Philippine Area of Responsibility o PAR ang bagyong may international name na Maria at pinangalanang Gardo.

Sa huling tala ng PAGASA, namataan ang bagyo sa layong 1,325 km Silangan ng Basco, Batanes.

Taglay nito ang lakas ng hanging aabot sa 200 kph malapit sa gitna at pagbugsong papalo sa 245 kph.

Gumagalaw ang bagyo sa direksyong pa-kanluran hilagang kanluran sa bilis na 30 kph.

Ayon sa PAGASA, palalakasin ng bagyong Gardo ang southwest monsson o habagat na magdadala ng mga pag-ulan sa bahagi ng MIMAROPA, Western Visayas, at pabugso-bugsong pag-ulan sa Metro Manila, CALABARZON, Bicol Region, Zambales, Bataan, at Aurora.

Pinag-iingat naman ang mga residente na nasa mabababang lugar laban sa posibleng mga pagbaha.

Inaasahang sa Miyerkoles pa ng umaga lalabas ng PAR ang bagyo. —AR

—-