HOT STORIES OF THE WEEK

Labis na ikinababahala ng pambansang pulisya ang sunud – sunod na insidente ng pagpatay sa mga lokal na opisyal ng pamahalaan.

Ito’y bunsod na rin ng mga nangyaring pagpatay kina Tanauan Mayor Antonio Halili, General Tinio Mayor Ferdinand Bote at Trece Martires Vice Mayor Alex Lubigan.

Pero ayon kay PNP Spokesman C/Supt. Benigno Durana, kung ang pagbabatayan aniya ay ang datos ng krimen, mas mababa aniya ito dahil sa mga ipinatupad na anti – crime strategy tulad ng oplan sita, oplan bakal, oplan galugad at iba pa.

Kasunod nito, lalo pang paiigtingin ng pambansang pulisya ang kanilang mga checkpoint at chokepoint sa iba’t ibang panig ng bansa at gagawin na nila itong 24/7 o magdamagan na.

Samantala, umapela rin si Durana sa publiko na laging makipag-ugnayan sa kanila at isuplong ang lahat ng mga napapansin nilang kahina-hinalang tao sa kanilang lugar.

May hamon si Pangulong Rodrigo Duterte sa mga mananampalataya.

Sa kanyang talumpati sa National Science and Technology week sa Davao City, inihayag ni Pangulong Duterte na bagaman naniniwala siyang may Diyos, dapat itong patunayan.

Ayon sa Pangulo, kung mayroong makapagbibigay sa kanya ng ebidensya o saksi na magpapatunay sa pag-iral ng ‘dakilang lumikha’ ay handa siyang bumaba sa puwesto.

Sabi ko dala kayo rito ng one, only one, sabihin niya mayor, utos kasi ng ugok diyan sa Simbahan na, mayroon talaga po, ito may picture kami, selfie.. You do that one day, one single witness that there is a guy who is able to talk and see God, ladies and gentlemen I will announce my resignation. Pahayag ni Pangulong Duterte

Samantala, muling binatikos ng Punong Ehekutibo ang Simbahang Katolika partikular ang pangongolekta nito ng pondo mula sa mga mananampalataya.

God is universal mind.. Kayong mga ugok na.. tumutulong sa tao, bakit kami ang nagbibigay ng pera sa inyo? Dagdag ni Pangulong Duterte

Patay ang bise alkalde ng Trece Martires City, Cavite matapos tambangan, kahapon.

Kinilala ang biktima na si Vice Mayor Alex Lubigan na pinagbabaril sa tapat ng Korean hospital sa Barangay Luciano, dakong 3:00 ng hapon.

Ayon kay CALABARZON Police Regional Director, Chief Supt. Edward Carranza, patay din ang driver ni Lubigan na kinilalang si Romulo Guillemer habang sugatan ang kasama nilang si Romeo Edrinal.

Binabaybay anya ng bise alkalde ang Trece Martires- Indang Road lulan ng Toyota Hilux na may plakang YV-4077 nang pagbabarilin ng mga salarin na sakay naman ng hindi naplakahang itim na mitsubishi montero.

Inaalam na kung ano ang motibo sa pamamaslang at sino ang posibleng nasa likod nito.

Pinaslang si Lubigan ilang araw lamang matapos patayin sina Mayor Antonio Halili ng Tanauan City, Batangas at Mayor Ferdinand Bote ng General Tinio, Nueva Ecija.

Si Lubigan ang ikalimang bise alkaldeng pinatay simula nang maluklok sa Malakanyang si Pangulong Rodrigo Duterte.

Palasyo, kinondena ang pananambang

Kinondena ng Palasyo ang pagpatay kay Trece Martires City, Cavite Vice Mayor Alexander Lubigan.

Ayon kay Presidential spokesman Harry Roque, ipinapaabot nila ang pakikiramay sa naulilang pamilya ni Lubigan.

Nanawagan naman si Roque sa Philippine National Police na magsagawa ng patas at malalimang imbestigasyon sa krimen.

Samantala, umapela ng pagkakaisa ang tagapagsalita ng palasyo mula sa publiko upang wakasan ang mga nakababahalang insidente ng pagpatay sa mga pulitiko.

Pinatay si Lubigan ilang araw lamang matapos ang magkasundo na pagpaslang kina Mayor Antonio Halili ng Tanauan City, Batangas at Ferdinand Bote ng General Tinio, Nueva Ecija.

Nanindigan si CPP o Communist Party of the Philippines Founding Chairman Jose Maria Sison na hindi na bumalik ng Pilipinas.

Ayon kay Sison, pinal na ang kanyang pasya kasunod na rin ng pahayag ni Defense Secretary Delfin Lorenzana na siya ay ipaaaresto oras na umuwi ng bansa.

Sinabi ni Sison, kanyang pinasasalamatan si Lorenzana sa pagpapakita nitong hindi talaga sinsero ang pamahalaan sa usapang pangkapayaan.

Gayundin aniya ang pagpapatunay na nagsisinungaling lamang si Pangulong Rodrigo Duterte sa pangakong bibigyan siya ng seguridad at ang iba pang NDFP consultants sakaling gawin sa Pilipinas ang peacetalks.

Una nang inihayag ni Sison na babalik siya ng bansa oras na malagdaan na ng pamahalaan at komunistang grupo ang Comprehensive Agreement on Social and Economic Reforms o CASER at kung matitiyak ang kanyang seguridad.

(with report from Jaymark Dagala)

Halos apat na barangay pa sa Metro Manila ang idineklara ng Department of Health na may leptospirosis outbreak.

Ayon kay Health Secretary Francisco Duque III, nasa 22 mula sa 18 ang mga barangay na mayroong outbreak ng leptospirosis.

Apektado na rin aniya ang ilang barangay sa Caloocan City kung saan nakapagtala pa ng tatlong kaso ng sakit sa Barangay 176.

Una nang idineklara ng DOH ang leptospirosis outbreak sa pitong lungsod sa Metro Manila noong Huwebes, Hulyo 5.

Kasabay nito, hinimok ni Duque ang Local Government Units na paigtingin ang rodent control, flood control at istriktong pagpapatupad nang pag kolekta ng basura sa mga lugar.

Posibleng maging super typhoon ang bagyong nasa labas ng bansa na may international name na Maria.

Ayon kay Gener Quitlong ng Philippine Atmospheric Geophysical and Astronomical Services Administration o PAGASA, sa Lunes, Hulyo 9 inaasahang papasok sa Philippine Area of Responsibility o PAR ang bagyo.

Tatawagin anya itong Gardo sa sandaling pumasok na sa bansa.

Ayon sa PAGASA, maliit ang posibilidad na tumama sa kalupaan ng Pilipinas ang bagyo dahil ang Southern Japan ang tinutumbok nito.

Gayunman, posibleng humigop umano ito ng hanging habagat na magdadala naman ng mga pag ulan.

—-

Pinawi ng Malacañang ang pagkabahala ng publiko sa pagtaas ng inflation rate sa buwan ng Hunyo.

Batay kasi sa datos ng Philippine Statistics Authority o PSA, naitala noong Hunyo ang pinakamabilis na pagtaas ng presyo ng mga bilihin at serbisyo sa loob ng limang taon.

Pumalo ito sa 5.2 percent na inflation sa buwan ng Hunyo na mas mataas kumpara sa 4. 6 na inflation noong Mayo.

Ngunit ayon kay Presidential Spokesperson Harry Roque, hindi dahilan ito para mag-panic ang publiko dahil may umiikot na pera galing sa buwis at economic activity kaya’t bumibilis ang pagtaas ng presyo ng mga bilihin.

Nandyan din umano ang Build, Build, Build program ng pamahalaan upang mapaunlad ang mga sektor ng imprastraktura sa bansa.

Taong 2011 nang huling umabot sa 5.2 percent ang inflation rate ng Pilipinas.

—-

Nagdeklara ng Leptospirosis outbreak ang Department of Health sa ilang lugar sa Metro Manila.

Kasunod ito ng patuloy na pagtaas ng bilang ng kaso ng naturang sakit ngayong taon.

Isa ang Quezon City sa may pinakamaraming barangay na idineklara ang Leptospirosis.

Partikular na rito ang mga barangay ng Bagbag, Bagong Silangan, Batasan Hills, Commonwealth, Novaliches proper, Payatas, Pinyahan at Vasra.

Nagdeklara rin ng outbreak sa mga barangay sa Taguig City gaya ng Lower Bicutan, Western Bicutan, Maharlika Village at Signal Village.

Mayroon ding outbreak ng Leptospirosis sa mga barangay ng BF Homes at San Dionisio sa Parañaque City, Barangay Pinagbuhatan sa Pasig City, North Bay boulevard sa Navotas City, Addition Hills sa Mandaluyong City at Concepcion sa Malabon City.

Batay sa tala ng DOH, nasa siyamnapu’t siyam (99) na ang namatay sa Leptospirosis sa unang anim na buwan ng 2018 kung saan tatlumpu’t walo (38) dito ang naitala sa Metro Manila.