HOT STORIES OF THE WEEK

Pinawi ng Malacañang ang pagkabahala ng publiko sa pagtaas ng inflation rate sa buwan ng Hunyo.

Batay kasi sa datos ng Philippine Statistics Authority o PSA, naitala noong Hunyo ang pinakamabilis na pagtaas ng presyo ng mga bilihin at serbisyo sa loob ng limang taon.

Pumalo ito sa 5.2 percent na inflation sa buwan ng Hunyo na mas mataas kumpara sa 4. 6 na inflation noong Mayo.

Ngunit ayon kay Presidential Spokesperson Harry Roque, hindi dahilan ito para mag-panic ang publiko dahil may umiikot na pera galing sa buwis at economic activity kaya’t bumibilis ang pagtaas ng presyo ng mga bilihin.

Nandyan din umano ang Build, Build, Build program ng pamahalaan upang mapaunlad ang mga sektor ng imprastraktura sa bansa.

Taong 2011 nang huling umabot sa 5.2 percent ang inflation rate ng Pilipinas.

—-

Nagdeklara ng Leptospirosis outbreak ang Department of Health sa ilang lugar sa Metro Manila.

Kasunod ito ng patuloy na pagtaas ng bilang ng kaso ng naturang sakit ngayong taon.

Isa ang Quezon City sa may pinakamaraming barangay na idineklara ang Leptospirosis.

Partikular na rito ang mga barangay ng Bagbag, Bagong Silangan, Batasan Hills, Commonwealth, Novaliches proper, Payatas, Pinyahan at Vasra.

Nagdeklara rin ng outbreak sa mga barangay sa Taguig City gaya ng Lower Bicutan, Western Bicutan, Maharlika Village at Signal Village.

Mayroon ding outbreak ng Leptospirosis sa mga barangay ng BF Homes at San Dionisio sa Parañaque City, Barangay Pinagbuhatan sa Pasig City, North Bay boulevard sa Navotas City, Addition Hills sa Mandaluyong City at Concepcion sa Malabon City.

Batay sa tala ng DOH, nasa siyamnapu’t siyam (99) na ang namatay sa Leptospirosis sa unang anim na buwan ng 2018 kung saan tatlumpu’t walo (38) dito ang naitala sa Metro Manila.

Nabunyag na may nakaaway na dating general si Tanauan City Mayor Antonio Halili bago ito napatay.

Sa isang ambush interview, sinabi ni PNP Chief Director General Oscar Albayalde bahagi ng ginagawa nilang imbestigasyon ang napag-alaman nilang away ni Halili at ng heneral.

Ayon kay Albayalde, inaalam pa nila ang puno’t dulo ng away at kung ang heneral ay mula sa PNP o sa AFP.

Samantala, inamin ni Albayalde na alegasyon pa lamang ang pagkakasangkot ni Halili sa illegal drugs.

Isang retired general, sinisiyasat ng PNP kung may kinalaman sa pagpaslang kay Tanauan City, Batangas Mayor Antonio Halili | via @JILLRESONTOCpic.twitter.com/xs7iCenjHI

— DWIZ Newscenter (@dwiz882) July 5, 2018

(Ulat ni Jill Resontoc)

Igigiit pa rin ng Alliance of Concerned Transport Operators o ACTO na ibigay ng Land Transportation Franchising and Regulatory Board o LTFRB sa lalong madaling panahon ang hinihingi nilang dalawang pisong dagdag sa pasahe sa jeepney.

Pahayag ito ni Efren De Luna, National President ng ACTO sa harap pag-apruba ng LTFRB sa pisong pansamantalang dagdag sa minimum na pasahe sa jeep.

Ayon kay De Luna, naramdaman na rin ng LTFRB ang malaking hirap ng operators at drivers kaya’t nagbigay sila ng provisional increase habang dinidinig pa ang orihinal nilang petisyon.

Maliban anya sa mataas na presyo ng langis, apektado rin sila ng pagtaas ng presyo ng piyesa, ang dalawampung porsyentong diskwento sa mga estudyante at senior citizens at malaking bawas sa bilang ng kanilang biyahe dahil sa traffic.

“’Yun po ang nawawala kaya nga po nakita ng LTFRB na kailangan, at ‘yung sinabing P2 sa unang apat na kilometro ay pantakip lang talaga na mga gastusin na nawala sa amin na, tintingnan din po natin ang kabuhayan ng ating mga mamamayan.” Ani De Luna

Kasabay nito, nanawagan si De Luna sa LTFRB na agad nang ipalabas ang memorandum para sa inaprubahan nilang pisong provisional increase.

Una nang sinabi ng LTFRB na magkakabisa lamang ang pisong provisional increase kapag nakapagpalabas na silang formal order.

“Kaya nga po ‘yun ang hinihiling namin na nagbigay na rin naman sila sa ganung proseso at naintindihan na  nila ang aming mga hangarin ay dapat na agarang ibigay ang order para mapa-implementa po ‘yan kung hindi man bukas ay sa Lunes.” Pahayag ni De Luna

‘Malaking tulong sa mga tsuper’

Pinasalamatan ng mga transport group ang LTFRB sa pagbibigay ng pisong provisional fare increase sa mga jeepney.

Ayon kay Fejodap President Zenaida Maranan, natutuwa sila na nauunawaan ng LTFRB ang sitwasyon ng mga operator at tsuper sa harap ng patuloy na pagtaas ng presyo ng mga produktong petrolyo.

Malaking bagay ito lalo’t inaasahang nasa isandaan hanggang dalawandaang piso ang madadagdag sa kita ng mga tsuper.

Samantala, dahil wala pang inilalabas na order ukol dito ang LTFRB, nagpasya ang mga miyembro ng Fejodap na bukas na pormal na ipatupad ang dagdag na piso sa minimum fare.

—Ralph Obina /  (Ratsada Balita Interview)

Itinanggi ni Communist Party of the Philippines o CPP Founding Chairman Jose Maria Sison na mayroon silang tatlong taong plano upang patalsikin si Pangulong Rodrigo Duterte.

Ayon kay Sison, kathang-isip lamang nina Defense Secretary Lorenzana, National Security Adviser Hermogenes Esperon Junior at Interior and Local Government OIC  Eduardo Año ang 3-year plan ng CPP-Central Committee.

Ang layunin anya ng tatlong taong plano ay palakasin ang  ideyolohiya ng CPP.

Iginiit ni Sison na nais lamang ni Pangulong Duterte at kanyang mga military strategist na maglunsad ng mala-pasistang kudeta laban sa 1987 Constitution sa pamamagitan ng  Charter Change.

Nais din anya ng Duterte administration na gamitin ang  CPP-NPA na sangkalan para sa pagpapatupad ng  martial law sa buong bansa.

—-

Patuloy pa rin umano ang operasyon ng mga sindikato sa New Bilibid Prison.

Ayon kay Senior Supt. Glen Dumlao, hepe ng PNP-AKG o Anti-Kidnapping Group, kabilang sa mga sindikatong ito ang dumukot sa isang negosyanteng Chinese noong Hunyo 24.

Sinabi ni Dumlao na ikinasa ng grupo ni Tyrone Resureccion Dela Cruz ang pagdukot kay Huang Bo Yu sa loob mismo ng NBP.

Si Dela Cruz ay isang kidnapping convict na nasentensyhang mabilanggo ng habambuhay at itinuturong utak sa pagdukot kay Yu.

Ipinabatid ni Dumlao na malaya pa rin ang iba pang kasabwat ni Dela Cruz kabilang ang isang pulis na nahaharap sa mga kaso ng drug trafficking subalit nakapag piyansa ng walong daang libong piso (P800,000)

Nagawa pa aniyang makipag negosasyon ni Dela Cruz para sa ransom ni Yu bagamat nasa Bilibid ito subalit nakapagpupuslit ng cellphone na nakumpiska na rin ng mga awtoridad.