HOT STORIES OF THE WEEK

Aprubado na ng Land Transportation Franchising and Regulatory Board o LTFRB ang pisong provisional increase sa minimum fare sa jeep sa Metro Manila, Central Luzon at Southern Luzon.

Dahil dito, magiging 9 pesos na ang pasahe sa unang apat na kilometrong biyahe ng jeep sa mga nasabing rehiyon mula sa kasalukuyang 8 pesos.

Gayunman, nilinaw ni LTFRB Board Member, Atty. Aileen Lizada na kailangan munang ilabas ang official written order bago tuluyang ipatupad ang pansamantalang dagdag singil.

Sa pulong kahapon, dalawang pisong increase ang hirit ng mga transport group dahil malaking kabawasan umano sa kanilang kita ang patuloy na pagtaas ng presyo ng diesel.

Maliban sa mga jeepney driver, humihirit din ng dagdag-pasahe ang iba pang pampublikong sasakyan tulad ng taxi at UV Express.

—-

Nakaaalarma at nakababahala…

Ganito ilarawan ni Volunteers Against Crime and Corruption o VACC Vice President Arsenio ‘Boy’ Evangelista ang mga nangyayaring patayan sa bansa kung saan ang huli ay ang pagpatay kay Tanauan City Mayor Antonio Halili na nasundan pa kahapon ng pagpatay naman sa alkalde ng General Tinio sa Nueva Ecija na si Mayor Ferdinand Bote.

Sa panayam ng DWIZ, sinabi ni Evangelista na nagdudulot ng takot ang mga sunod-sunod na pagpatay sa mga prosecutor, mga opisyal ng barangay, mga pari at ngayon naman ay mga opisyal ng lokal na pamahalaan.

“Kapag ganito nagtatanong ka rin kay Presidente Duterte, na ano na ba ang nangyayari sa ating bansa? Nagkakaroon ng climate of fear, tila yata may breakdown of peace and order.” Ani Evangelista

Umaasa si Evagelista na aaksyunan ni Pangulong Rodrigo Duterte ang problema ng patayan sa lalong madaling panahon.

Maliban dito, hinimok din ng VACC ang pamahalaan na bumuo na ng task force laban sa mga gun for hire.

“Siguro ‘yun ang dapat matutukan dito kasi parang naging cottage industry na itong gun for hire, bakit ang dali, tapos ngayon nakakapag-level up pa sila, ‘yung sniper ibang klase ‘yung nakita natin, in daytime, in case of Mayor Halili parang public execution ang nangyari kasi napanood natin, matatakot ka eh.”

(Ratsada Balita Interview)

Kapwa iimbestigahan na ng National Bureau of Investigation o NBI ang magkasunod na kaso ng pagpatay sa alkalde ng Tanauan City, Batangas na si Mayor Antonio Halili at ng General Tinio, Nueva Ecija na si Mayor Ferdinand Bote.

Ito’y matapos atasan ni Justice Secretary Menardo Guevarra ang NBI para siyasatin ang nangyaring pamamaslang sa dalawang alkalde.

Unang nasawi si Halili matapos barilin sa flag raising ceremony sa Tanauan City hall habang tinambangan naman sa Cabanatuan City kahapon si Bote.

Halili’s case

Mayroon nang persons of interest ang Philippine National Police-Calabarzon kaugnay sa pagpatay kay Tanauan City Mayor Antonio Halili.

Ayon kay PNP-Calabarzon Regional Dir. Police Chief Supt. Edward Carranza, tatlo ang kanilang persons of interest at dalawa rito ang nauugnay sa iligal na droga.

Habang ang isa naman umano ay patuloy pang inaalam ang pagkakakilanlan dahil sa kabilang ito sa isang grupo.

Bukod dito, tumanggi ng magbigay pa ng karagdagang detalye si Carranza.

Una rito, ipinahayag ni Pangulong Rodrigo Duterte ang kaniya umanong suspetsa na may kaugnayan sa operasyon ng iligal na droga si Halili.

Bote’s case

Samantala, sinimulan na ang awtopsiya sa labi ng pinaslang na alkalde ng General Tinio, Nueva Ecija na si Mayor Ferdinand Bote.

Sa RBM Funeral Homes sa Cabanatuan City dinala ang labi ni Bote.

Naghintay naman ang asawa, mga anak, kamag-anak at iba pang tagasuporta ng alkalde sa labas ng punenarya.

Nasawi si Mayor Bote matapos tambangan sa tapat ng National Irrigation Administration sa Cabanatuan City pasado alas-4:00 ng hapon, kahapon.

—-

Inamin ng Malacañang ang pagkabahala sa sunod-sunod na kaso ng pagpatay sa mga nakalipas na araw.

Ayon kay Presidential Spokesman Harry Roque, maging ang naging paraan ng pagpatay kay Tanauan City Batangas Mayor Antonio Halili ay lantaran na aniya sa publiko.

Kasabay nito, tiniyak ni Roque na kanilang tutuparin ang obligasyon na imbestigahan at resolbahin ang bawat kaso ng pagpatay.

Tikom naman ang bibig ng opisyal hinggil sa umano’y nangyayaring culture of impunity sa administrasyon ni Pangulong Rodrigo Duterte.

—-

Wala pang matibay na ebidensiya na nagsasangkot sa pinaslang na si Tanauan City Batangas Mayor Antonio Halili sa iligal na droga.

Ito ang iginiit ni Tanauan City Vice Mayor Jhoanna Corona kasabay ng pakiusap sa lahat na iwasan ang paglalabas ng espekulasyong may kinalaman sa iligal na droga ang motibo sa pagpaslang kay Halili.

Ayon kay Corona, naniniwala ang lahat ng mga taga Tanauan City na mahigpit ang kautusan at kampanya ng kanilang pinaslang na alkalde kontra iligal na droga.

Dahil dito aniya posibleng may mga nagalit kay Halili na nag-ugat sa pagpaslang dito.

Gayunman, nakiusap si Corona na hayaan na lamang ang mga otoridad na tapusin ang imbestigasyon sa insidente.

Magugunitang mismong si Pangulong Rodrigo Duterte ang hayagang nagdiin kay Halili sa pagkakasangkot nito sa iligal na droga at sinabing front lamang ang walk of shame campaign nito.