Inatasan ng Department of Labor and Employment o DOLE ang may-ari at contractor ng gumuhong gusali sa Angeles City, Pampanga na magbayad ng mahigit 11.7 milyong piso sa labor-related liabilities at administrative fines matapos mapatunayang may mga paglabag sa labor at safety standards.
Ayon kay Labor Secretary Francis Tolentino, pinagbabayad sina Jackson Lim at Golden Years Construction and Steelworks Corporation ng mahigit 1.4 milyong piso para sa labor standards violations at mahigit 10.3 milyong piso bilang administrative fine sa ilalim ng Republic Act 11058 o Occupational Safety and Health Standards Law.
Lumabas sa imbestigasyon ng DOLE na nagpatuloy ang construction work sa proyekto sa kabila ng umiiral na Work Stoppage Order na inilabas ng ahensya.
Dahil dito, nalagay umano sa panganib ang buhay at kaligtasan ng mga manggagawa.
Natuklasan din ng DOLE ang iba’t ibang paglabag kabilang ang hindi pagbabayad ng tamang sahod at benepisyo, underpayment, at kakulangan sa bayad para sa trabaho tuwing rest days, Sabado at holidays.
Kabilang din sa mga natuklasang paglabag ang kawalan ng personal protective equipment o PPE, kakulangan ng mga kinakailangang safety personnel, kawalan ng permit para sa mechanical lifting equipment, at hindi pagbibigay ng maayos na pansamantalang tirahan para sa mga manggagawa. | via Jenn Patrolla (Patrol 38)
#dwiz #dwiznews #aliw23
