Isinama ng kampo ni Vice President Sara Duterte sa 45 testigo na posibleng iharap sa kanyang impeachment trial sa Senado ang ilang personalidad na naging resource person sa mga nakaraang pagdinig ng House Committee on Justice.
Batay sa pre-trial brief na isinumite ng defense panel sa Senate impeachment court, kabilang sa mga nakalistang testigo sina dating Executive Secretary Lucas Bersamin, dating Senador Antonio Trillanes IV, NBI Director Melvin Matibag, at ang nagpakilalang dating “bag man” ni VP Sara na si Ramil Madriaga.
Makikita ang kanilang mga pangalan sa bahagi ng testimonial evidence ng pre-trial brief na inihain ng depensa.
Ayon kay House prosecutor at Bicol Saro Party-list Rep. Terry Ridon, malaya ang depensa na pumili at magharap ng sarili nilang mga testigo.
Sinabi ng kongresista na wala umanong dapat ikabahala sa listahan dahil marami sa mga ito ay maituturing na “common witnesses” na dati nang humarap sa pagdinig ng Justice Committee.
Paliwanag ni Ridon, anoman ang maging pahayag at testimonya ng mga nasabing testigo ay naitala, natalakay, at narinig na sa mga naunang impeachment proceedings sa Kamara.
Dahil dito, naniniwala ang prosekusyon na wala nang bagong impormasyon ang maidaragdag ng karamihan sa mga testigong inilista ng depensa sa nalalapit na impeachment trial. | via Geli Mendez (Patrol 30)
