Naghain na si veteran election lawyer Romulo Macalintal ng petition sa Korte Suprema para hilingin ang Temporary Restraining Order (TRO) laban sa pagpapatupad ng Republic Act Number 12326, na nagpapaliban sa Barangay at Sangguniang Kabataan Elections hanggang November 2028.
Sa pamamagitan ng electronic filing nitong Linggo ng gabi, Setyembre 27, iniharap ni Macalintal ang Petition for Certiorari and Prohibition, kasama ang hiling na magpalabas ng T.R.O.
Kinuwestiyon ni Macalintal ang mabilis na pagpasa at pagpapatupad ng batas.
Naaprubahan aniya ito nitong September 24, inilabas sa media nitong September 25 at naging effective agad matapos ma-publish sa Official Gazette, habang hindi pa ito nailathala sa mga pahayagan.
Iginiit ni Macalintal na hindi sapat ang dahilan para sa tatlong taong pagpapaliban at term extension, at dapat may “compelling reason” o mabigat na dahilan bago ipagpaliban ang isang eleksyon.
Nauna nang katwiran ni Pangulong Ferdinand Marcos Jr. na ang limang taong termino ay magbibigay ng dagdag na panahon sa mga barangay at S.K. officials para pagbutihin ang serbisyo, tapusin ang mga programa at tugunan ang pangangailangan ng komunidad at kabataan. | Sa panulat ni Jordan Gutierrez
