HOT STORIES OF THE WEEK

Inaprubahan na ngayong araw ng Consultative Committee ang final draft ng bagong Saligang Batas.

Sa ilalim ng panukala, mahahati sa labing-walong rehiyon ang bansa kung saan mayroong tig-dalawang senador, isang regional governor, deputy regional governor.

Bawat legislative district naman ay may kanya-kanyang kinatawan at madaragdaagan ng isandaan animnapung kinatawan ng mga political party kaya’t aabot na sa apatnaraan ang bilang ng mga kongresista.

Ayon kay Con-Com Spokesman Ding Generoso, pipiliin ang mga regional at deputy regional governor ng mga miyembro ng regional legislative assembly na ihahalal ng taumbayan.

Lahat anya ng halal na opisyal ay maninilbihan ng apat na taon at hanggang dalawang taong termino lamang.

Nakasaad din sa draft constitution na malilipat sa mga rehiyon ang kapangyarihan sa pagkolekta ng ilang buwis at apatnapu hanggang limampung bilyong piso ang inaasahang direktang mapupunta sa mga rehiyon.

Inaasahang maisusumite na kay Pangulong Rodrigo Duterte sa July 9 ang nasabing draft, dalawang linggo bago ang ikatlong SONA sa July 23.

—-

Blangko pa rin ang mga awtoridad sa pagkakakilanlan at motibo ng salarin sa pagpatay kay Tanauan City Mayor Antonio Halili.

Ayon kay Police Region 4-A Director Chief Superintendent Edward Carranza, ang malinaw sa ngayon ay isa ang gunman at isa ang tumamang bala sa alkalde.

Sa ngayon sinabi ni Carranza na sumasailalim pa sa ballistic exam ang balang nakapatay kay Halili.

“Definitely sa isa pong long rifle galing, durog po kasi ang tumamang slug sa katawan niya, mas maganda po ay yung official findings ng crime laboratory.” Ani Carranza

Sa ngayon tuloy-tuloy ang pangangalap ng impormasyon ng PNP para mabigyan ng hustisya ang pagkamatay ng alkalde ng Tanauan.

“Ang time frame mahirap po ‘yun depende po ‘yan sa papasok na impormasyon, tuloy-tuloy lang po ang pag-gather natin ng statement pati nap o ang statement ng pamilya.” Pahayag ni Carranza

Samantala, natunton na ng pulisya ang posibleng pinagpuwestuhan ng sniper na bumaril at pumatay kay Tanauan City, Batangas Mayor Antonio Halili.

Ayon kay Carranza, batay sa kanilang clearing operations ay pumuwesto sa masukal at mataas na bahagi sa paligid ng city hall ang gunman na malayo sa gusali.

Inaalam na kung may kaugnayan ang pamamaslang sa pagkakabilang sa narco-list ni Halili, pulitika o paghihiganti ng mga nasagasaan ng alkalde sa kanyang shame campaign.

Nakilala ang alkalde sa shame campaign nito sa mga nahuhuling kriminal sa lungsod dahilan upang umani ito ng papuri o batikos at nabansagan ding “Duterte ng Batangas.”

Ipinagluluksa naman ni Batangas Governor Hermilando Mandanas ang pagkamatay ni Mayor Halili.

Nakikiramay at nakikisimpatya din si Mandanas kasama ang sambayanang Batangueño sa pamilya ni Halili maging sa mga taga-Tanauan sa hindi inaasahang pagkawala ng kanilang alkalde.

Kinondena naman ng gobernador ang pamamaril kay Mayor Halili na isa anyang malaking hamon sa peace and order ng lalawigan kaya’t agaran niyang pinaaalalahanan ang pulisya na pag-ibayuhin ang pagbabantay upang tiyakin ang kaligtasan ng bawat Batangueño.

Samantala, umapela naman si Mandanas sa kanyang mga kababayan na ipagpatuloy ang pananalangin para sa kapayapaan.

By Ralph Obina/ Balitang Todong Lakas Interview)

Muling binatikos ni Pangulong Rodrigo Duterte ang Diyos matapos niya itong tawaging estupido.

Sa pagkakataong ito, kinuwestyon ni Pangulong Duterte ang konsepto ng langit at impiyerno sa kanyang speech sa founding anniversary ng Southern Leyte.

Ipinagtataka ng Pangulo kung bakit nilikha ng Diyos ang impiyerno upang parusahan ang mga masamang tao sa halip na magpatawad.

Hindi rin anya siya naniniwala sa konsepto ng purgatoryo bagkus ay mas naniniwala siya na isa lamang ang pupuntahan ng tao sa sandaling sumakabilang-buhay na kundi langit.

“Kaya dun daw ako ilalagay ng Ginoo sa impiyerno, na baliw na. Yung diyos ko walang impyerno, walang langit. Iyung impiyerno ko, hindi g*** ng Diyos na iyung iba, gumagawa ng impiyerno. Bakit mo ako gagawan ng impiyerno na… ano bang kasalanan ko? Iyung mga babae-babae? Ano ba iyan, para sa lipunan na ilalagay mo ako sa impiyerno? Ang Diyos, all forgiving. ‘Di iyan marunong maglagay sa impyerno, hindi ‘yan totoo. Hindi rin totoo ang purgatoryo, langit lang iyan.” Pahayag ng Pangulong Duterte

—-

Pasok na ang NBI o National Bureau of Investigation sa imbestigasyon kaugnay ng pagpatay kay Tanauan City, Batangas Mayor Antonio Halili.

Kasunod ito ng inilabas na kautusan ni Justice Secretary Menardo Guevarra na bumuo ang NBI ng isang team na magsasagawa ng “parallel investigation” hinggil sa pagpatay sa alkalde.

Naniniwala si Guevarra na malaki ang maitutulong ng NBI sa PNP o Philippine National Police para sa agarang ikalulutas ng kaso.

Kahapon, bumuo na ang PNP ng special investigation task group na tututok sa pagpatay kay Halili.

Ayon kay PNP Chief Director General Oscar Albayalde, pangungunahan ng Deputy Regional Director for Operation ng PNP CALABARZON ang naturang task force.

Nanindigan ang DILG o Department of Interior and Local Government na ligal ang pag-aarmas sa mga opisyal ng barangay.

Ito’y sa kabila ng mga inaaning kritisismo at batikos mula sa oposisyon sa pangunguna ni Vice President Leni Robredo.

Ayon kay DILG Undersecretary for Barangay Affairs Martin Diño, malinaw ang itinatadhana ng Republic Act 7160 o ang Local Government Code of 1991 na mayroong karapatan ang mga pinuno ng barangay na magdala ng armas.

Ito’y sa kundisyong gagamitin ang mga naturang armas sa paglaban sa kriminalidad na isa sa mga isinusulong na kampaniya ni Pangulong Rodrigo Duterte na supilin sa panahon ng kanyang panunungkulan.

Hawak na ng pambansang pulisya ang tatlong suspek sa pagpatay kay Fr. Richmond Nilo ng Diocese of Cabanatuan sa Nueva Ecija.

Kinilala ni Chief Superintendent Amador Corpuz, pinuno ng Police Regional Office 3 ang gunman na si Omar Mallari na naaresto sa Arayat, Pampanga noong Hunyo 22 dahil sa kasong pag-iingat ng mga pampasabog.

Tinukoy din ni Corpuz ang iba pang mga suspek na sina Manuel Torres na siyang itinuturong mastermind, Marius Albis at Ronaldo Garcia.

Bagama’t hawak na ng pulisya ang mga suspek, sinabi naman ni PNP Chief Director General Oscar Albayalde na hindi pa rin sarado ang kaso ng pagpatay sa pari.

“It’s now clear, we didn’t stop in the investigation to give justice kung sino talaga ang dapat managot dito, what is good here is that we didn’t stop here nakita natin kung sino talaga ang bumaril, ang self-confessed gunman, so justice is served.” Ani Albayalde

Paghihiganti tinitingnang anggulo

Paghihiganti ang tinitingnang motibo sa pagpatay kay Fr. Richmond Nilo ng Nueva Ecija.

Ayon iyan kay Police Regional Office 3 Director Chief Supt. Amador Corpuz batay sa extrajudicial confessions ng naarestong gunman na si Omar Mallari.

Ayon kay Corpuz, sinabi ni Mallari na binuhay umano ni Fr. Nilo ang kaso ng pang-momolestiya ng semenarista na si Christopher Torres na anak ng mastermind na si Manuel.

Kinuha umano ni Manuel ang serbisyo ni Mallari sa pamamagitan ni Ronaldo Garcia kasama ang iba pang suspek na sina Marius Albis Torres at iba pa na pawang gun for hire group na una nang sumuko sa mga awtoridad.

Nag-ugat ang sinasabing galit ni Manuel Torres sa pari nang akusahan ang anak nito na semenaristang si Christopher noong Marso ng isang taon dahil sa umano’y pang-aabuso sa apat na sakristan ni Fr. Nilo.

PNP dumipensa sa isyu ng ‘mistaken identity’

Samantala, idinepensa ni PNP Chief Oscar Albayalde ang kaniyang mga tauhan na kumilos para sa ikalulutas ng kaso ng pagpatay kay Fr. Richmond Nilo.

Ito’y makaraang umalma ang pamilya ni Adel Milan na una nang inaresto ng mga awtoridad subalit pinalaya rin kalaunan dahil sa umano’y mistaken identity.

Ayon kay Albayalde, maituturing na commendable ang ginawa ng kaniyang mga tauhan dahil sa hindi tumigil ang mga ito na tukuyin ang mga suspek hanggang sa masukol na nila ang mga ito.

Ibinatay lamang nila ang pag-aresto kay Milan sa naging salaysay ng sakristan na sinasabing nakasaksi umano sa mismong pagbaril kay Fr. Nilo.

“Remember nung nag-file ang sakristan siya’y hawak ng pari, hindi siya hawak ng mga pulis, itinuturo siya ng altar boy, so the PNP hindi naman puwedeng i-deny ang statement niya so we filed the case, and it’s up to the appreciation of the prosecutor, ng korte kaya tinanggap ang kaso, wala kaming magagawa doon, what is commendable here is we didn’t stop with our investigation. No, it is not us who gave the mistaken identity, it’s the altar boy, hindi kami ang may kasalanan dito kasi wala kaming control over the altar boy.” Pahayag ni Albayalde

—-

Naging pangkalahatang maayos ang unang dalawang taong pamumuno ni Pangulong Rodrigo Duterte.

Ito ang naging pagtaya ng political analayst na si Professor Ramon Casiple kung saan kanyang binigyan ng grado na siyete ang Pangulo.

Ayon kay Casiple, bagama’t maraming kontrobersiyang kinaharap ang Pangulo, ilan pa rin sa mga inilatag nitong programa noong panahon ng kampanya ay nasimulan na habang may ilan namang natupad na nito.

Isa aniya rito ay ang anti-drug campaign ng Pangulo na nagresulta sa pagbaba ng crime rate at inaasahang pagpapasa ng Bangsamoro Basic Law o BBL ngayong buwan.

Dagdag pa ni Casiple, napanatili din sa panahon ni Pangulong Duterte ang paglago sa ekonomiya ng bansa at bagama’t nagkaroon ng problema sa inflation rate pa rin aniya ito gaano kataas.

Bukod pa rito, sinabi ni Casiple na nananatili ring mataas ang nakukuhang suporta ng Pangulo.

“Ang benchmark ko kapag lumapit ‘yan sa anywhere near 39 ‘yung okay sa kanya ibig sabihin naubos na ang goodwill ng mga mamamayan natin na hindi bumoto sa kanya, ang suporta sa kanya ay mataas, ang pagbaba normal ‘yun, ang mataas na suporta na ‘yan despite all the criticisms, all the issues na ni-raise laban sa kanya ay patunay na mukhang may ginagawa siya.” Ani Casiple

Gayunman, pinuna ni Casiple ang kawalan ng pangmatagalang strategic direction ni Pangulong Duterte sa paraan ng kanyang pamumuno.

“Wala siyang defined na strategic direction at strategy mismo diyan, kumbaga you’re living from day to day dito eh, may mga sinabi siyang basic principle pero how do you apply that eh hindi mo makuha agad-agad, ibig sabihin ikaw ang mag-iinterpret eh, hindi siya ang magsasabi. I think part ‘yan ng tactics niya para hindi siya mabasa, but then kung ika’y pinuno at tumitingin sayo ang tao kung anong gusto mong manyari, dapat ilinaw mo ‘yan, hindi lang short term kundi long term.” Pahayag ni Casiple

 (Balitang Todong Lakas Interview)

Inatasan na ni Justice Secretary Menardo Guevarra ang mga prosecutor na humahawak sa kaso ng mga NDF at CPP leader na ibalik ang mga ito sa kulungan.

Ito’y makaraang maunsyami muli ang peace talks sa pagitan ng gobyerno at komunistang grupo.

Ayon kay Guevarra, ipinag-utos na niya sa mga piskal ang paghahain ng kaukulang mosyon sa Manila at Taguig Regional Trial Courts o ipa-revoke ang court order na nagpahintulot sa mga NDF consultant at leader na maghain ng piyansa at makabiyahe sa Netherlands o Norway.

Sa oras aniya na katigan ng mga nasabing korte ang hirit ng DOJ, dapat bumalik sa kani-kanilang selda ang mga communist leader pero kung magmamatigas ay ipaaaresto ang mga ito.

—-