HOT STORIES OF THE WEEK

Naniniwala ang Quezon City Police District o QCPD na ang pinaigting na kampanya kontra tambay ang dahilan kung kaya’t matagumpay nilang nalalabanan ang kriminalidad sa kanilang nasasakupan.

Ayon kay QCPD Director Chief Superintendent Joselito Esquivel Jr. marami silang natatanggap na mga positibong feedback kaugnay sa patuloy na implementasyon ng anti-loitering campaign.

Sa katunayan, ayon kay Esquivel, dating magulo ang bahagi ng Visayas Avenue ngunit nalinis na aniya ito ngayon at nawala na ang mga kumakanta at mga nakahubad sa kalye.

Bumaba narin aniya ang bilang ng mga kaso ng snatching sa malaking bahagi ng lunsod ng Quezon.

Masaya namang ibinalita ni Esquivel na mula sa 300 na naaresto sa unang linggo ng pagpapatupad ng anti-tambay campaign, bumaba na lamang ito ngayon sa 80 hanggang 100.

Kasado na ang one-on-one dialogue ni Pangulong Rodrigo Duterte kay Catholic Bishops’ Conference of the Philippines President Romulo Valles.

Ito ang kinumpirma ni Presidential Spokesman Harry Roque isang araw matapos ang kanyang pakikipag-usap kay Papal Nuncio Gabriel Giordano Caccia sa Malate, Maynila.

Si Roque ay isa sa miyembro ng four-man panel na inatasan ni Pangulong Rodrigo Duterte na makipag-diyalogo sa mga leader ng Simbahang Katolika.

Sumang-ayon aniya ang panel at Papal Nuncio na kailangan ang kooperasyon ng gobyerno at simbahan sa mga kinakaharap na issue ng bansa.

Hindi naman idinetalye ni Roque kung kailan at saan isasagawa ang dayalogo ni Pangulong Duterte at Valles.

Samantala, ikinagalak naman ng Catholic Bishops’ Conference of the Philippines ang planong diyalogo ni Pangulong Rodrigo Duterte sa mga mataas na opisyal ng Simbahang Katolika.

Ito ang inihayag ni Presidential Spokesman Harry Roque matapos ang pulong nila ni Papal Nuncio Gabriel Giordano Caccia.

Ayon kay Roque, bukod sa ikinakasang one-on-one dialogue ni Pangulong Duterte kay CBCP President Romulo Valles, bukas din si Caccia na masundan pa ang nasabing pulong.

Magugunitang inulan ng batikos si Pangulong Duterte matapos nitong tawaging “istupido” ang Diyos.

Nakitaan ng Board of Inquiry (BOI) ng Armed Forces of the Philippines ng posibleng paglabag sa standard operating procedure kaugnay sa sinasabing ‘misencounter’ sa pagitan ng pulisya at militar sa Sta. Rita, Samar na ikinasawi ng anim na pulis.

Gayunman, nilinaw ni Lt. Gen. Rafael Valencia, chairman ng BOI na hindi pa tiyak kung kaninong panig nagmula ang posibleng paglabag.

Ayon kay Valencia, magkakaroon ng deliberasyon ang board  bukas kasama ang Philippine National Police hinggil sa ginagawang imbestigasyons habang sa Miyerkoles inaasahang ilalabas ang report.

Samantala, naglabas na rin ng opisyal na letter of apology ang AFP partikular ang 8th infantry  division ng Philippine Army sa   naulilang pamilya ng anim na miyembro ng 1st platoon, 805th company, regional mobile force battalion 8 ng PNP.

Mayorya ng mga Pilipino ang hindi pabor na gawing legal sa bansa ang same sex marriage.

Ito ay batay sa survey ng Social Weather Stations o SWS kung saan 61 porsyento ng mga respondents ang tutol sa nasabing panukala.

22 porsyento naman ang nagsabing kanila itong susuportahan habang 16% naman ang undecided.

Isinagawa ang naturang survey noong Marso 23-27 sa 1,200 respondents.

Metro Manila Pride March, isinagawa sa Marikina Sports Complex

Samantala, isinagawa naman kahapon, Hunyo 30 ang Pride March na dinaluhan ng libu-libong miyembro ng lesbians, gays, bisexuals and transgender (LGBT) community upang ipanawagan ang equality o pagkakapantay-pantay ng trato sa lipunan maging anuman ang iyong sexual orientation. 

Rise Up Together ang tema ng Pride March ngayong taon.

Ayon sa punong abala ng Metro Manila Pride na si Nicky Castillo, inoorganisa ang pagtitipon kada taon sa buwan ng Hunyo upang bigyang lugar at boses ang LGBT community na malayang maipamahayag ang kanilang panawagan para sa kanilang mga karapatan.

Sa huli, naging mapayapa at matagumpay ang isinagawang Pride March na sinamahan pa ng ilang mga tampok na pagtatanghal at fireworks display sa dulo ng programa.

Pinaninindigan ng PDEA o Philippine Drug Enforcement Agency ang isinusulong na mandatory drug test sa mga batang mag aaral na may edad sampu pataas.

Ayon kay PDEA Special Enforcement Service Director Levi Ortiz, lumabas sa pag aaral ng mga expert at psychologists na kinunsulta nila na walang magiging masamang epekto sa pag iisip ng mga bata ang mandatory drug test.

Dadaan naman anila kung sakaling ang nasabing drug test bilang paraan na magiging katanggap tanggap sa mga magulang ng mga bata.

Tiniyak rin ni Ortiz na bibigyan ng kaukulang privacy ang resulta ng gagawing drug test sa mga batang mag aaral.

Una nang inihayag ng Department of Education ang pagkontra sa naturang panukala ng PDEA na anito’y labag sa umiiral na Dangerous Drugs Act kung saan ay tanging mga mag aaral lamang sa high school ang pinapayagang isalang sa random drug testing.

Nilinaw ni Communist Party of the Philippines o CPP Founding Chairman Jose Maria Sison na wala pa silang desisyong tuldukan na ang usapang pangkapayapaan sa gobyerno.

Kasunod na ito ng mga balitang lumutang na kinansela na ni Sison ang peace negotiations.

Ayon kay Sison, tanging ang National Democratic Front of the Philippines o NDFP lamang na siyang political arm ng CPP kung saan siya ang chief consultant ang maaaring magsuspinde, magkansela o tuldukan ang peace talks.

Sa ngayon aniya ay wala pang desisyon ang NDFP para tapusin na ang pakikipag-usap sa gobyerno.

Una nang inihayag ni Sison na mas mabuting pagtuunan na lamang nila ng pansin ang pagpapatalsik sa Pangulong Rodrigo Duterte at maghanda sa peace talks sa susunod na administrasyon.

—-

Nakalaya na ang suspek sa pagpatay kay Father Richmond Nilo ng Nueva Ecija.

Ayon kay Atty. Larry Gadon, abogado ni Adell Milan, ibinasura na sa prosecutor’s office ang kaso laban sa kanyang kliyente dahil sa kawalan ng sapat na ebidensya.

Gayunman, kumbinsido si Atty. Gadon na kaso ng mistaken identity ang nangyari kay Milan.

“Mistaken identity po ito, nagkamali pero siyempre kasi they relied on the statement of the witnesses and the reports, and I cannot really say na nagkamali, ayoko naman silang husgahan nang ganun.” Pahayag ni Gadon

Cabanatuan RTC, naglabas na ng release order sa dating suspek sa pagkakapatay kay Father Richmond Nilo na si Adell Millan | via @JILLRESONTOC pic.twitter.com/aEzI4U7aSK

— DWIZ Newscenter (@dwiz882) June 29, 2018

(Ulat ni Jill Resontoc / Patrol 7)

Sisikapin ng Judicial and Bar Council o JBC na maisumite sa Malacañang ang shortlist para sa susunod na Chief Justice ng Korte Suprema sa huling linggo ng Agosto o unang linggo ng Setyembre.

Ayon kay kay Atty. Milagros Fernan Cayosa, miyembro ng JBC, nais nilang mabigyan ng mahaba-habang panahon ang Pangulong Rodrigo Duterte na mabusisi ang records ng sinumang malalagay sa shortlist.

Mayroon anyang hanggang July 26 ang mga nagnanais na mag-apply bilang Punong Mahistrado ng Korte Suprema.

Sinabi ni Cayosa na sinuman ang makapasa sa first screening ang isasalang nila sa public interview.

Sa ngayon anya ay wala pang taga-labas ng Korte Suprema ang nagsumite ng aplikasyon para sa maging Chief Justice.

Samantala, awtomatiko namang kasama sa shortlist ang limang nangungunang mahistrado ng Supreme Court na sina Associate Justices Antonio Carpio, Presbitero Velasco Jr., Diosdado Peralta, Teresita de Castro at Lucas Bersamin.

—-

Ipinag-kibit balikat ni Pangulong Rodrigo Duterte ang banta ni Communist Party of the Philippines o CPP Founder Jose Maria Sison na aatras sa peace talks sa gobyerno.

Sa kanyang pagharap sa mga mamamahayag sa 25th National Convention ng Vice Mayors League of the Philippines sa Panglao, Bohol, inihayag ni Pangulong Duterte na walang problema sa kanya kung hindi matuloy ang peace talks.

“Trabahante ako ng gobyerno. My main task is just to seek, to find the peace for my country. If they are not willing to talk to me, that’s fine. Wala akong problema, so we continue with the war.”

“Anyway, we have been there for 50 years, ano ba naman dagdagan natin ng 30 years so sige basta alam ng Pilipino na ganun ang nangyayari.” Ani Pangulong Duterte

Gayunman, lalo aniyang tatagal ang karahasan kung magmamatigas ang rebeldeng grupo.

Minaliit din ng Punong Ehekutibo ang pahayag ni Sison na makipag-sanib puwersa  na lamang ang komunistang grupo sa  Oust Duterte Movement na nananawagan ng kanyang pagbibitiw sa puwesto.

—-

Nanindigan si Pangulong Rodrigo Duterte na hindi siya hihingi ng paumanhin o kapatawaran sa pagtawag niyang estupido ang Diyos at maanghang na pahayag laban sa Simbahang Katolika.

Sa kanyang pagharap sa mga mamamahayag sa 25th National Convention ng Vice Mayors League of the Philippines sa Panglao, Bohol, inihayag ng Pangulo na malabong mag-sorry siya sa kanyang mga batikos sa Kristyanismo.

“No, I will not do that definitely. Not in the million years.”

“You know, God is personal. It is not formed by textbooks. You nurture God as your faith based on the values that you get from life, early on from your parents,” he said. “That is how you conceived God to be.” Pahayag ni Pangulong Duterte

Ayon kay Pangulong Duterte, mas nanaisin na lamang niyang manahimik.

“You know if there is a page in the Bible which I read almost everyday, it’s the Ecclesiastes 3: “For every season there is always a time under the sun. There’s a time to be calm, there’s a time to be silent, there’s a time to be poignant, a time to be subdued, and a time to be vicious. Ganoon talaga ang buhay.”

“There would be a time to speak and I will maybe in the coming days. And for now, I will just keep my silence for I want to see how the nation reacts.” Dagdag ng Pangulong Duterte

Itinanggi rin ng Punong Ehekutibo na inililihis lamang niya ang usapin hinggil sa patuloy na pagtaas ng presyo ng mga pangunahing bilihin dahil sa TRAIN Law.

—-