HOT STORIES OF THE WEEK

Hindi na itutuloy ng National Democratic Front of the Philippines ang peace talks sa gobyerno sa ilalim ni Pangulong Rodrigo Duterte.

Ito, ayon kay NDFP Chief Political Consultant at Communist Party of the Philippines Founder Jose Maria Sison, ay dahil pa rin sa kabiguan ng Duterte administration na pagbigyan ang kanilang matagal ng hiling.

Kabilang na aniya rito ang pagpapalaya sa mga political prisoner.

Iginiit ni Sison na mas mabuting makibahagi na lamang sila sa Oust-Duterte movement o grupong nananawagan ng pagbibitiw sa pwesto ng Pangulo.

Nakatakda sana ang formal resumption ng usapang pang-kapayapaan sa pagitan ng NDF-CPP-NPA kahapon sa Norway subalit muling naunsyami matapos ang pahayag ni Pangulong Duterte na kailangan pa ng karagdagang panahon at konsultasyon.

Ulat ni Jill Resontoc (Patrol 7)

Personal na binisita ni Senate President Vicente “Tito” Sotto ang sa PNP Custodial Center sa kampo Crame si Senador Leila de Lima.

Ayon kay Sotto, ginawa niya ito para personal na makita ang kundisyon ng kapwa senador.

Pinag-usapan din aniya nila ang mga panukalang batas na isinusulong ni De Lima at mga paraan kung paano ito mkakasama sa mga pagdinig ng Senado.

Mahigit isang taon ng hindi nakadadalo si De Lima sa mga committee hearing at sesyon matapos itong ipaaresto ng Muntinlupa Regional Trial Court sa kasong conspiracy to commit drugs.

Samantala, bilang pasalubong ay dinalhan pa ni Sotto si De Lima ng tinapa rice na luto ng kanyang misis na si Helen Gamboa.

Ulat ni Cely Ortega-Bueno (Patrol 19)

Nagpulong na ang Philippine National Police at Catholic Bishops’ Conference of the Philippines kaugnay sa human rights at insidente ng pagpatay sa tatlong pari.

Pinangunahan nina PNP Chief, Dir. Gen. Oscar Albayalde at CBCP Public Affairs head, Bishop Rey Evangelista ang consultative meeting sa Intramuros, Maynila, kanina.

Ayon kay Albayalde, isolated case lamang at hindi magkaka-ugnay ang motibo sa pagpatay kina Rev. Fr. Richmond Nilo, Rev. Fr. Mark Anthony Ventura at Rev. Fr. Marcelito Paez.

Nagkasundo rin ang PNP at CBCP na hindi dapat armasan ang mga pari subalit nasa pagpapasya pa ito ng Office of the President at Department of Interior and Local Government.

Nagtakda na ng limang kilong limitasyon ang National Food Authority o NFA sa mabibiling NFA rice ng bawat mamimili.

Gayunman, aminado si NFA Spokesman Rex Estoperez na hindi rin naman ito epektibong paraan para maiwasan ang hoarding dahil puwede namang pumila o bumili ang bawat miyembro ng isang pamilya.

Napag-alamang bawat NFA dealer sa palengke ay nakakaubos ng mahigit sa sampung sako ng bigas kada araw.

Nagpahayag ng pangamba si Estoperez na hindi umabot hanggang sa anihan sa Setyembre ang mga inangkat nilang bigas kung magpapatuloy ang nangyayaring hoarding ng NFA rice.

Umapela sa publiko si Estoperez na huwag mag-panic buying at bilhin lamang ang kailangan nilang konsumong bigas.

—-

Mahigpit na nagbabala ang DOH o Department of Health laban sa leptospirosis ngayong panahon ng tag-ulan.

Sinabi ni Health Secretary Francisco Duque III na hindi malayong makapitan ng bacteria ng leoptospirosis sa patuloy na pag-ulan at pagbaha sa maraming bahagi ng bansa.

Ayon kay Duque sa hawak nilang datos mula January 1 hanggang June 9 ay umaabot na sa isanlibo at tatlumpung (1030) kaso ng leptospirosis ang kanilang naitala at ito ay apa’t naput isang (41) porsyentong mas mataas kumpara sa datos sa kaparehong panahon noong isang taon.

Mula sa nasabing figures, siyam napu’t tatlo (93) ang nasawi dahil sa bacteria na dulot ng leptospirosis.

Anim katao naman ang nasawi matapos makapitan ng naturang bacteria sa loob lamang ng tatlong araw ang National Kidney Transplant Institute sa Quezon City.

—-

Ipapamahagi na ng pamahalaan simula sa Hulyo ang mga fuel vouchers para sa mga tsuper.

Ito ay para ibsan ang epekto ng ipinatupad na Tax Reform for Acceleration and Inclusion Law o TRAIN Law at pagtaas ng presyo ng langis sa world market na sanhi ng mga nagdaang taas presyo sa mga produktong petrolyo.

Sa panayam ng DWIZ, ipinabatid ni Finance Undersecretary Karl Chua na ang mga ipapamahaging fuel vouchers ay nagkakahalaga ng limanlibong piso (P5,000) para sa buong taon.

“‘Yan ay dahil sa pagtaas ng presyo ng langis, ang jeep naman hindi pa nagtaas ng fare so walang problema sa passengers pero may problema sa drivers and operators, so ‘yan ang tulong sa kanila na magsisimula sa July.” Ani Chua

Ipinaliwanag naman ni Chua na ngayon lamang maipapamahagi ang naturang ayuda sa mga tsuper upang makatiyak kung sino talaga sa mga ito ang mahirap at may prangkisa.

“Ang reklamo ng marami ay late daw ang pagbigay ng tulong pero kasi kung magbigay ka ng libreng tulong lahat pipila, so dapat alamin natin sa cash transfer, sino talaga ang mahirap, at sa jeepneys, sino talaga ang registered at may franchise kasi ayaw nating bigyan ‘yung colorum, kaya maingat tayo, kasi magbigay tayo, mabilis, sabihin naman ng COA ang laki ng leakage so kahit anong gawin namin may problema, kaya aayusin lang ang implementation.” Dagdag ni Chua

Samantala, ikinatuwa naman ng transport group gaya ng Liga ng Transportasyon at Operators sa Pilipinas o LTOP ang ibibigay na subsidiya ng pamahalaan.

Sinabi ni Lando Marquez, malaking tulong ang fuel vouchers na ipagkakaloob ng pamahalaan bagamat hiling nila ay pangmatagalang solusyon para sa problema ng mga nasa sektor ng transportasyon.

“Ang aming isinusulong pa ay magkaroon sana ng permanent solution ang ating transport modernization dahil unang-una bibigyan sana ito ng gobyerno ng budget na ang aming inirerekomenda na ang 10 percent ng ating public transport consumer tax ay dapat maitabi dahil sa ibang bansa ay may batas silang ipinasa na plus doon sa kanilang modernisasyon dahil ang mga bansang gumagamit ng 10% na ‘yan ay kinikilala ng gobyerno ang mga sumasakay sa public transport ay malaking tulong na ito po ‘yung mga trabahador na bumubuhay ng ekonomiya na dapat talaga bigyan ng serbisyong maganda.” Pahayag ni Marquez

(Balitang Todong Lakas Interview)

Isa lamang sa bawat apat na Pilipino o 25 porsyento ng populasyon ang may sapat na kaalaman sa federalismo.

Iyan ang resulta ng isinagawang survey ng Social Weather Stations o SWSna isinagawa mula nuong Marso 23 hanggang 27 ng taong kasalukuyan.

Batay sa inilabas na datos ng SWS kahapon lamang, nasa 55 porsyento mula sa 1,200 respondents ang nagsabing nalaman lamang nila ang hinggil sa federalismo nang isagawa ang survey na may margin of error na +/- 3 percent.

Aabot sa 37 porsyento ang nagsabing pabor sila na gawing federal ang sistema ng gubyerno habang 29 na porsyento ang tutol at 34 na porsyento ang undecided.

Pinakamataas ang kamalayan sa federalismo ng mga taga-Mindanao na may 37 porsyento na sinundan ng Metro Manila na may 28 porsyento, Visayas na may 22 porsyento at balance Luzon na may 20 porsyento.

—-

Binasag na ni Manila Archbishop Luis Antonio Cardinal Tagle ang kaniyang katahimikan hinggil sa mga birada ni Pangulong Rodrigo Duterte tungkol sa Diyos.

Bagama’t kasalukuyang nasa Geneva, Switzerland ang Kardinal, nanawagan ito sa mga mananampalataya na manatiling mahinahon at huwag magpa-apekto sa mga gumugulo ngayon sa pananampalataya.

Binigyang linaw din ni Tagle na hindi na bago ang mga pagkuwestyon sa Diyos gayundin sa mga doktrina ng simbahan na naging sentro na ng mga pag-aaral at pagninilay ng mga eksperto sa simbahan.

Sa halip aniya na gumanti ng hindi tama sa mga naging pahayag ng Pangulo, hinimok ng Kardinal ang lahat na maglatag ng mga solusyon at mahinahong tugon sa naturang usapin.

Kasalukuyang nasa Switzerland si Cardinal Tagle para dumalo sa United Nations Conference on Migrants and Refugees na inorganisa ni Pope Francis, Caritas Internatilnalis, World Council of Churches at iba pang mga grupo.

—-

Hindi umano kailangan humingi ng patawad ni Pangulong Rodrigo Duterte sa Diyos.

Ito ang pahayag  ni Presidential Spokesperson Harry Roque kaugnay sa hiling ni Evangelical Leader Brother Eddie Villanueva.

Naniniwala umano si Roque na ang kaniyang kilalang Diyos ay hindi hihilingin na humingi ng public apology ang Pangulo bagkus ay siya umano ay isang Panginoon na puno ng pagmamahal.

“I seem to have an honest difference in opinion now with Bro. Eddie (Villanueva), because the God that I know would not demand a public apology.”

“The God I know is a god of love.  And He is too big for any words that may come from the mouth of a mortal.” Pahayag ni Roque

Una rito ay ibinabala ni Brother Eddie Villanueva ng Jesus is Lord ang mga trahedya na puwedeng harapin ng Pilipinas kung magpapatuloy ang Pangulong Rodrigo Duterte sa pangungutya sa Panginoong Diyos.

Ayon kay Villanueva, kapag nilalapastangan ang Panginoon ay para na ring isinumpa ang buong bansa.

Nasasaad aniya sa Bibliya na matinding galit ng Diyos ang naghihintay sa mga bansang punong-puno ng blasphemies o paglapastangan sa pangalan ng Diyos, pagpatay, adulteries, imoralidad at iba pa.

Dahil dito, hindi aniya malayong bumisita sa ating bansa ang iba’t ibang klase ng sumpa, mga kalamidad at iba pa na magdadala ng matinding dusa sa ating bansa.

Gayunman, sinabi ni Villanueva na naaawa siya kay Pangulong Duterte dahil naasaad sa Bibliya na sinuman ang nananatiling matigas sa kabila ng napakaraming pagpuna sa kanyang kamalian ay bigla na lamang mawawasak hanggang sa puntong hindi na ito puwedeng sagipin o ayusin pa.

Binigyang diin ni Villanueva na nangangailangan ng matinding counselling sa ngayon ang Pangulo at matinding dasal para siya ay sagipin.

—-

Huwag pakinggan ang Pangulong Rodrigo Duterte kapag nagsasalita tungkol sa bibliya.

Ito ang payo ni Davao City Mayor Sara Duterte sa publiko sa gitna ng mga batikos sa kaniyang ama matapos tawaging stupid ang diyos.

Ayon kay Sara, hindi pari, pastor o imam ang kanyang ama kundi Pangulo ng bansa kaya’t huwag itong pakinggan kung nagsasalita hinggil sa relihiyon at tanging ang mga sinasabi lamang ng Pangulo hinggil sa kanyang trabaho bilang pangulo ang dapat pakinggan.

At kung pupunahin naman, sinabi ni Sara na dapat punahin ang kanyang ama sa trabaho nito at hindi dapat sa pagiging taklesa.

Kasabay nito, idinipensa ni Sara ang ama sa mga bumabatikos ditong galit ito sa mga babae dahil siya na isang babae ay pinaka paboritong anak ng pangulo.

 Kaya’t wala aniyang katuturan ang inilunsad na #BabaeAko campaign laban sa Pangulo.