HOT STORIES OF THE WEEK

Ibinabala ni Brother Eddie Villanueva ng Jesus is Lord ang mga trahedya na puwedeng harapin ng Pilipinas kung magpapatuloy ang Pangulong Rodrigo Duterte sa pangungutya sa Panginoong Diyos.

Ayon kay Villanueva, kapag nilalapastangan ang Panginoon ay para na ring isinumpa ang buong bansa.

Nasasaad aniya sa Bibliya na matinding galit ng Diyos ang naghihintay sa mga bansang punong-puno ng blasphemies o paglapastangan sa pangalan ng Diyos, pagpatay, adulteries, imoralidad at iba pa.

Dahil dito, hindi aniya malayong bumisita sa ating bansa ang iba’t ibang klase ng sumpa, mga kalamidad at iba pa na magdadala ng matinding dusa sa ating bansa.

Gayunman, sinabi ni Villanueva na naaawa siya kay Pangulong Duterte dahil naasaad sa Bibliya na sinuman ang nananatiling matigas sa kabila ng napakaraming pagpuna sa kanyang kamalian ay bigla na lamang mawawasak hanggang sa puntong hindi na ito puwedeng sagipin o ayusin pa.

Binigyang diin ni Villanueva na nangangailangan ng matinding counselling sa ngayon ang Pangulo at matinding dasal para siya ay sagipin.

—-

Siniguro ng Department of Social Welfare ang Development o DSWD na hindi basta-basta dadamputin ang mga menor de edad na tambay.

Ayon kay DSWD Undersecretary for Luzon Affairs and Special Concerns Isko Moreno, dapat may mga social worker sa oras ng pagsagip sa mga kabataan upang masigurong dadaan ito sa proseso.

Aniya, ang mga mahuhuli ay pakakainin at kunin ang pansin ang mga magulang lalo na ang mga kabataan na mahuhulihan ng iligal na droga.

“Ang isang layunin na pinai-igting ni Pangulong Duterte ay iligtas, sagipin ang mga kabataan sa kalye, sa amin naman po kapag ‘yan ay ipinatupad, masusi po ang pagsagip hindi po bastang kinakaldad lang, alam mo naman siguro ang salitang kaldad parang nagiging aso’t pusa na hinahabol ang mga bata, dapat may social worker ‘yan kapag ini-implement ang pagsagip sa kanila. Makikipagtulungan tayo sa mga barangay officials na makilala ang bata at tawagin ang pansin ng mga magulang.” Ani Moreno

Matatandaang iniutos ng Pangulong Duterte na damputin ang mga menor de edad na pakalat-kalat sa kalsada lalo na kapag dis oras ng gabi para sa kanilang proteksyon at kaligtasan kasunod na rin ng ipinatutupad na anti-tambay drive ng pulisya.

“Below 18, you arrest the teenagers there around loitering, because we have to protect our children, nagkalat na ang droga, nagkalat na ang lahat.”

“You take them into custody not to arrest them, but for their own safety, to protect them. They are not being arrested for any crime, arrest them for their good. ‘Uwi kayong lahat. We can take custody of minors to protect them.”

“That is the obligation of the police, the barangay chairpersons. ‘Pag minors, damputin mo talaga. Tawagin ang DSWD. Pakainin diyan and release them in the morning. It should be the barangay captain who will deliver them to the parents.” Pahayag ng Pangulong Duterte

(Balitang Todong Lakas Interview)

Iimbestigahan na ng Department of Education o DepEd ang pagbili ng overpriced na razor o pang-ahit sa Northern Mindanao.

Ito ay matapos mapag-alamang aabot sa dalawanlibong piso (P2,000) ang presyo ng kada isang pang-ahit.

Sa inilabas na kalatas ng DepEd, nabili ang mga nasabing mga razors mula Abril hanggang Hunyo ng 2016 na gagamitin sa technical vocational livelihood ng senior high school.

Tiniyak ng DepEd sa publiko na hindi nila papayagan ang ganitong uri ng iregularidad sa pagbili ng nasabing mga gamit.

—-

Pormal nang tinapos ng Korte Suprema ang kanilang oral arguments hinggil sa petisyong humihiling na gawing ligal ang same sex marriage sa bansa.

Binigyan ng 30-araw ng High Tribunal ang kampo ng petitioner at oppositor para isumite ang kani-kanilang memorandum sa naturang usapin na nagsimula kahapon.

Binigyang diin kahapon ni Solicitor General Jose Calida na walang mali sa itinatadhana ng Articles 1 at 2 ng Family Code na ang pagsasagawa ng kasal ay dapat sa pagitan lamang ng babae at lalaki bagay na kinontra naman ng mga petitioner mula sa LGBT o lesbians, gays, bisexual at transgender group.

Giit naman ng mga oppositor, hindi naman pinagkaitan ng karapatan ang mga nasa LGBT community na nais nilang makasal sa kaparehong kasarian subalit mali nang maituturing ang hirit nilang ibasura ang mga probisyon sa family code para pagbigyan sila.

Pero para naman kay Senior Associate Justice Antonio Carpio, naaayon sa batas ang pagkakasal sa magkapareho ang kasarian dahil malinaw aniya na kinikilala ng batas ang kasagraduhan ng kasal.

—-

Binayaran ng DOH o Department of Health ang ilan sa magulang ng mga batang namatay matapos turukan ng Dengvaxia.

Ibinunyag ito ni Atty. Persida Rueda-Acosta, hepe ng PAO o Public Attorneys’ Office kasunod ng pag-atras para magreklamo ng ilang magulang ng mga biktima ng anti-dengue vaccine.

Sinabi ni Acosta na aabot sa P50,000 ang ibinayad sa ilang magulang bilang cash assistance kaya’t nagtaka silang dahil umatras na sa pagsasampa ng kaso ang mga ito matapos bayaran ng DOH.

Pinapirma rin aniya ng DOH sa mga magulang na binayaran nito kaya’t duda siyang cash assistance lamang ang nais ibigay ng kagawaran.

Dahil ditto, hinimok ni Acosta ang ilang magulang na huwag tanggapin ang alok na pera subalit nais nilang mabigyan ng hustisya ang kanilang mga namatay na anak.

—-

Bumuo na ang Pangulong Rodrigo Duterte ng isang 3-man committee para makipag-dayalogo sa Simbahang Katolika at sa iba pang religious groups.

Ito’y sa gitna na rin ng mga pagpuna at kritisismo sa masasakit na naging pahayag ng Punong Ehekutibo laban sa Diyos at sa mga turo ng Simbahan sa kabuuan.

Ayon kay Presidential Spokesperson Harry Roque, layunin ng dayalogo na mabawasan ang tensyon sa pagitan ng gobyerno at ng Simbahan.

“Alam ko po may separation ng Church and State. Hindi po kinakailangan makipag-dayalogo pero minabuti na po ng Presidente, na sige buksan natin ang proseso ng dayalogo.”

“Siguro po walang mawawala kung mas mabuti ang samahan sa panig ng Simbahan at ng gobyerno.” Ani Roque

Kasama sa binuong panel si Roque, Foreign Affairs Undersecretary Ernesto Abella, at Council for Philippine Affairs Secretary-General Pastor Boy Saycon.

Sinabi ni Roque na sa ngayon ay dapat mapagkasunduan pa kung ano ang magiging agenda sa gagawing dayalogo.

Tiwala naman si Roque na may tiyansa pang magkasundo ang Pangulo at ang Simbahan.

“Tingin ko naman po. Pansinin niyo naman po. ‘Yung talagang birada ni Presidente ngayon lang po ’yan halos dalawang taon matapos siyang manungkulan. Pero sa loob ng dalawang taon, wala rin pong tigil ang pula sa kanya ng Simbahang Katolika. Tao rin naman po ang Presidente.”

“Dahil nasabi na ni Presidente ang gusto niya sabihin, tignan natin kung papaano mapapabuti ang samahan dahil iisang lipunan naman ang pinaglilingkuran ng gobyerno at ng Simbahan.” Pahayag ni Roque

 

Matatandaang umani ng batikos ang pagtawag ng Pangulo sa Diyos na ‘stupid God’ at ang iba pang pagkuwestyon nito sa mga nakalathala sa Bibliya.

Samantala, hinimok naman ni Lingayen Archbishop Socrates Villegas ang mga mananampalatayang Katoliko na ipagdasal ang Pangulo para sa kagalingan nito at pagpapatawad ng Panginoong Diyos.—AR 

—-

Mga mahihirap na Pilipino ang pinaka-apektado ng kampanya kontra iligal na droga ng administrasyong Duterte.

Ito ang kinumpirma ng resulta ng pag-aaral ng mga researchers mula sa iba’t ibang malalaking unibersidad sa bansa tulad ng Ateneo de Manila at De La Salle University.

Batay sa resulta ng kanilang pag-aaral, halos kalahating porsyento ng nasa limang libong (5,000) kaso ng mga namatay sa ilalim ng war on drugs ay mga hinihinalang small time drug dealers, user o adik at mga courier.

Habang tig-isang porsyento lamang sa bilang ang narco-politicians, mga pulis na sangkot sa droga at umano’y drug lords.

Pinakamarami naman ang naitalang namatay sa ilalim ng war on drugs sa National Capital Region o NCR partikular sa Manila, Quezon City at Caloocan.

Karamihan naman sa mga napatay ay naitala sa kasagsagan ng operasyon ng pulis kung saan sinasabing nanlaban ang mga biktima.

Samantala, kinuwestiyon naman ng mga researchers kung nasusunod ng pulisya ang due process lalo’t mataas ang naitalang bilang ng mga napapatay malapit o mismong sa loob ng tahanan ng mga drug suspect.

—-

Pinanindigan ni Pangulong Rodrigo Duterte ang kaniyang naunang pahayag kaugnay sa pagtawag niya sa Diyos na istupido.

Sa harap ng mga bagong halal na barangay officials sa Cagayan de Oro City kahapon, sinabi ng Pangulo na hindi dapat kuwestyunin ng kaniyang mga kritiko ang kaniyang pananampalataya sa kinikilala  niyang Diyos.

Nilinaw ng Pangulo na ang kaniyang naging pahayag noong isang linggo ay patungkol sa kanyang banat kay Sister Patricia Fox na nakikialam sa mga usaping panlipunan ng Pilipinas.

Paliwanag ng Pangulo, tila itinatanim ng Simbahang Katolika sa isipan ng mga mananampalataya nito ang isang Diyos na gumawa ng isang perpektong nilalang subalit siya rin mismo aniya ang sumira rito.

Maliban sa aral ng simbahan hinggil sa paglikha, binira rin ng Pangulo ang doktrina hinggil sa huling hapunan na aniya’y isang malaking kahibangan.

“Totoo naman.”

“Wala akong sinabing torpe ang ginoo ko, your god is not my god because your god is stupid. Mine has a lot of common sense.”

“If I choose not to believe in any god, what’s the “f*****g thing about it? It’s about freedom to choose one.”

“Sabi ko, not everything in the bible is true. Sino nag-publish niyang Bible na iyan? Even itong last supper. Who are the idiots there? Basta nalang gi — ginawang santo kay tua man ngadto sa painting.” Pahayg ng Pangulong Duterte

 

 —-