HOT STORIES OF THE WEEK

Pina-iimbestigahan na rin sa Senado ang pagkamatay sa kulungan ng isang lalakeng inaresto sa operasyon ng pulisya kontra tambay subalit kalaunay ikinulong dahil sa kasong alarm and scandal.

Ang Senate Resolution No. 772 na inihain ni Senador Bam Aquino ay humihiling sa Senate Committee on Public Order and Dangerous Drugs na imbestigahan ang pagkamatay ni Genesis ‘Tisoy’ Argoncillo.

Ayon kay Aquino, maraming detalye ang hindi tumutugma lalo na sa pabago-bagong pahayag ng pulisya.

Pinuna ni Aquino na unang sinabi ng PNP na nasawi si Tisoy dahil sa sugat na siya mismo ang may gawa habang nagwawala sa loob ng kulungan.

Nang lumabas ang awtopsiya, ipinaliwanag ng PNP na binugbog ng kanyang mga kapwa preso si Tisoy dahil madalas itong magwala.

Una nang naghain ng resolusyon para imbestigahan ang pagkamatay ni Tisoy si Congressman Kit Belmonte.

—-

Hinamon ng Teachers’ Dignity Coalition o TDC ang Philippine Drug Enforcement Agency (PDEA) na tutukan ang pagbuwag sa mga smugglers at malalaking sindikato ng illegal drugs kung nais nilang manalo sa kanilang giyera kontra droga.

Ayon kay Benjo Basas, Pangulo ng TDC, hindi naman makakatulong sa kampanya kontra droga ang plano ng PDEA na isalang sa drug test ang mga batang may edad sampu pataas.

Bukod dito, iginiit ni Basas na labag sa RA 9165 ang pag-drug test sa mga bata dahil ang sakop lamang ng batas ay ang mga nasa sekondarya at kolehiyo.

“Hindi ito mahuhuli, conveniently hindi ito mahuhuli dahil lang sa pagkuha ng statistical data kung gaano karami ang mga bata, at kung sino-sino ang mga batang ito na involved sa droga, maliban pa diyan of course babalik tayo doon sa ligalidad kung hindi naman talaga puwedeng i-drug test ang mga batang sampung taong gulang o ‘yung mga nasa elementaryeh paano natin gagamitin itong panukalang ito?” Ani Basas

Kasabay nito, sinabi ni Basas na bukas ang mga guro na tulong para i-educate ang mamamayan lalo na ang mga bata hinggil sa epekto ng illegal drugs.

“’Yan ang panawagan namin sa PDEA at PNP, willing po kami, ang ating mga teachers na tumulong sa pag-educate sa taongbayan at sa mga bata, kahit konting oras lang naman po talaga na nakakapiling natin ang mga bata, mas malaking panahon na nasa kani-kanilang pamilya ang mga bata natin, sa mga barkada, sa komunidad lalo na ngayong may internet na, pero kung ano man po ang aming maitutulong at magagawa para tulungan ang ating pamahalaan sa laban kontra droga ay gagawin po namin ‘yan.” Pahayag ni Basas

(Ratsada Balita Interview)

Isinusulong ni House Committee on Dangerous Drugs Chairman Surigao del Norte Representative Ace Barbers ang pagsasailalim sa mandatory drug testing ng lahat ng halal na opisyal ng pamahalaan.

Ayon kay Barbers, ito ang paraan para mapatunayan ng mga senador, kongresista, gobernador, mayor at iba pang elected officials na hindi sila sangkot sa iligal na droga at dapat pagkatiwalaan ng publiko.

Dagdag ni Barbers, dapat din aniya isapubliko o i-anunsyo ang resulta ng mga drug tests at agad na tanggalin sa puwesto ang mga magpopositibo.

Kasabay nito, hinikayat ni Barbers ang liderato ng Kamara na gawin nang polisiya ang mandatory drug test sa lahat ng mambabatas lalo’t ilan aniya rito ay kabilang sa narco-list ni Pangulong Rodrigo Duterte.

Magugunitang, 2008 nang ideklarang iligal ng Korte Suprema ang Section 36 ng Comprehensive Dangerous Drugs Act of 2002 na nag-aatas sa mga national at local elective officials na sumailalim sa drug test.

—-

Binuweltahan ng ilang obispo ng Simbahang Katolika si Pangulong Rodrigo Duterte.

Kasunod ito ng pagtawag ng Pangulo sa Panginoong Diyos bilang “stupid” sa kanyang naging talumpati sa Davao City noong Biyernes.

Ayon kay Sorsogon Bishop Arturo Bastes, hindi na mas nagiging katanggap-tanggap sa mga normal at matitinong tao ang mga ikinikilos at inihahayag ni Pangulong Duterte.

Dagdag ni Bastes, kinakailangan na ng masigasig na pagdarasal para matigil na ang paglapastangan sa Diyos at patungo na sa diktaturyang gawi ng aniya’y wala na sa katinuang Pangulo.

Sinabi naman ni Balanga Bishop Ruperto Santos na sumusobra na ang Pangulo sa mga ginagawa nito.

Iginiit naman ni Tagbilaran Bishop Alberto Uy na hindi stupido ang Panginoon.

Aniya, ang Diyos ang pinakamakapangyarihan, pinakamaalam at pinakamapagmahal sa lahat ng nilalang sa mundo.

Samantala, nanawagan naman si Caloocan Bishop Pablo Virgilio sa lahat ng religous scholar na pagbutihin pa ang pagtuturo ng bibliya at aral ng Panginoon sa mga kabataan.

—-