Ligtas na nakabalik sa bansa ngayong araw, Hunyo 21, ang mga Pilipinong na-detain sa Yakutsk, Russian Federation sa loob ng siyam na buwan dahil sa isyu sa kanilang immigration documents. Sinalubong sila ng mga kinatawan mula sa Department of Foreign Affairs (DFA), Overseas Workers Welfare Administration (OWWA), at Department of Migrant Workers (DMW).
Dumating sa Ninoy Aquino International Airport (NAIA) Terminal 1 ang mga repatriated OFWs na dalawang batch, pasado 12:00 ng madaling araw at bandang 4:00 a.m.
“Nung ni-request ni Pangulong Marcos, the very next day, ni-release kaagad itong ating mga kababayan, agad-agad” saad ni Foreign Affairs Secretary Ma. Theresa Lazaro.
Binubuo ng 22 kababaihan at dalawang kalalakihan ang mga napauwing OFW. Makakatanggap sila ng agarang tulong gaya ng accommodation, transportation, and financial support.
Napauwi sila matapos hilingin ito ni Pangulong Ferdinand R. Marcos Jr. sa kanilang bilateral meeting ni Russian President Vladimir Putin sa sidelines ng ASEAN-Russia Commemorative Summit sa Kazan noong June 17.
Nagpaabot ng pasasalamat si Pangulong Marcos kay Pangulong Putin at sa mga awtoridad ng Russia dahil sa kanilang agarang pagtugon at pakikipagtulungan para mapabilis ang pagpapauwi sa mga OFW.
