HOT STORIES OF THE WEEK

Mabibili na simula sa susunod na linggo ang mga inangkat na bigas ng national food authority mula sa Vietnam at Thailand.

Ayon kay National Food Authority o NFA Spokesperson Rex Estoperez, naidiskarga na ang nasa limang libong (5,000) sako ng NFA rice para sa National Capital Region o NCR.

Habang naipamahagi na ang dalawampu’t walong libong (28,000) sako ng bigas sa mga lalawigan kabilang na ang Bulacan at Pampanga.

Samantala, inaasahan namang darating na sa Hulyo at Agosto ang ikalawang batch ng inangkat na bigas ng pamahalaan.

Matatandaang naantala ang pamamahagi ng bigas sa mga pamilihan dahil sa walang tigil na pag-ulang naranasan noong mga nakalipas na araw.

—-

Magpapatupad ang Department of Agriculture o DA ng suggested retail price o SRP sa walong pangunahing bilihin sa Metro Manila simula ngayong araw.

Ang ipatutupad na SRP ay napagkasunduan ng stakeholders matapos ang ilang konsultasyon sa iba’t ibang mga sektor para maiwasan ang ilang pang-aabuso ng mga negosyante.

Kabilang sa mga lalagyan ng SRP ay ang regular milled rice na mabibili na ng tatlumpu’t siyam na piso (P39) kada kilo habang wala namang itinakdang SRP sa well-milled rice at iba pang mas mataas na klase ng bigas.

Nasa isandaan at limampung piso (P150) kada kilo naman ang itinakdang SRP para sa bangus, isandaang piso (P100) kada kilo para sa tilapia at isandaan at apatnapung piso (P140) kada kilo para sa galunggong.

Habang ang pulang sibuyas naman ay mabibili na ng siyamnapu’t limang piso (P95) kada kilo, pitumpu’t limang piso (P75) kada kilo naman para sa puting sibuyas at pitumpung piso (P70) kada kilo para sa imported na bawang.

Sinabi naman ni Agriculture Secretary Manny Piñol na kailangang isailalim pa sa konsultasyon ang SRP para sa mga gulay, karne at mga poultry products.

—-

Naniniwala ang tagapagsalita ng Associated Labor Unions-Trade Union Congress of the Philippines o ALU-TUCP na si Alan Tanjusay na hindi solusyon ang pagpapatupad ng kampanya kontra tambay para masolusyunan ang problema sa kahirapan, unemployment at underemployment sa bansa.

Ayon kay Tanjusay, tila ginagawa lang ito ng pambansang pulisya para masabing mayroon silang ginagawa o accomplishments.

Pero ang totoo aniya, hindi nito nareresolba ang talamak na endo, kontraktwalisasyon at maliit na sweldo ng mga ordinaryong manggagawa kaya marami sa kanila ang nakatira sa mga depressed area.

“Parang instinct lang ng ating kapulisan na nanggigil sa ating mga kababayan na meron lang silang mai-report, meron lang silang masabing accomplishment pero ang totoo niyan ay hindi natin ina-address ang dahilan kung bakit meron tayong mga ganitong na napakaraming tambay. Nariyan ang kahirapan, karamihan sa kanila ay endo (mga kontraktuwal), at higit sa lahat, hindi sapat ang kanilang mga sahod kaya’t marami sa kanila ang nakatira ngayon sa mga distressed areas.”

Dagdag pa ni Tanjusay na lumalabas sa survey ng labor force na aabot sa 11 milyong pilipino ang tambay at mahigit 4 na milyon dito ay pawang mga kabataaan.

Welcome sa Department of Education ang pahayag ng Catholic Bishop Conference of the Philippines o CBCP na suportado nito ang mandatory drug test para sa mga grade 4 student na ipinanukala ng Philippine Drug Enforcement Agency o PDEA.

Ayon kay DepEd Undersecretary Anne Sevilla, kung ano ang kinakailangan para sa improvement o ikabubuti ng komunidad ay hindi ito tututulan ng kagawaran.

Dagdag ni Sevilla, nakatakdang makipagpulong ang DepEd sa mga opisyal ng PDEA upang matiyak na magiging maayos at maiiwasan ang overlapping sa pagpapatupad ng panukalang random drug test sa mga grade 4 student.

“Wine-welcome natin ang mga panukala we want to make some improvement lalo na kung ang environment natin ay constantly changing. So ibig sabihin po, kung ano po ang mas kailangan na ng society then DepEd will comply. Ang gusto lang po nating sabihin dito, kaya nga po magkakaroon ng meeting together with PDEA, ay gusto naming i-share baka kasi po magkaroon tayo ng redundancy or baka magkaroon ng overlap and ofcourse, gusto natin ay efficiency ng ating mga resources.”

Binigyang diin ng Department of Education na labag sa batas ang panukalang mandatory testing sa mga grade 4 students pataas.

Ayon kay Education Secretary Leonor Briones, labag ito sa Republic Act 9165 na nagtatakda na maari lamang isailalim sa random drug testing ang mga estudyante sa sekondarya at kolehiyo.

Maari aniyang maging bangungot o nightmare ang panukalang ito ng PDEA dahil 14 na milyong estudyante mula grade 4 hanggang 12 ang sangkot dito.

Marami aniyang dapat isaalang alang lalong lalo na ang privacy ng mga menor de edad gayundin ang magiging gastos dito.

Tutol si Senador Sherwin Gatchalian sa panukala ng PDEA o Philippine Drug Enforcement Agency na magsagawa ng mandatory drug testing sa mga guro at mga estudyante mula grade 4 pataas.

Ayon kay Gatchalian, walang ligal na basehan ang pagsasailalim sa mandatory drug testing sa mga batang edad siyam pataas.

Posibleng aniyang matakot ang mga bata sakaling gawin ito at maaring magkaroon ito ng epekto sa kanilang estadong emosyonal at psychological.

Binigyang diin ng senador na mayroon din sapat na prevention program ang DepEd para mapigilan at mabawasan ang paggamit ng iligal na droga ng mga estudyante.

Idinipensa ng DILG o Department of Interior and Local Government ang anit – tambay campaign ng PNP o Philippine National Police.

Ayon kay DILG OIC Eduardo Año, hindi anti – poor ang ginagawang operasyon kundi bahagi ito ng pagdidisiplina.

Binigyang diin ni Año na mayroong sinusunod na proseso ang mga pulis sa kanilang mga operasyon.

Aniya, ibabalik din sa lokal na pamahalaaan ang pagpapatupad ng kaayusan kung makikita na ang disiplina at pagsunod sa mga tao.

Nababahala si Pangulong Rodrigo Duterte sa patuloy na pagtaas ng presyo ng mga bilihin sa bansa na nagreresulta ngayon sa pagtamlay ng economic activities sa mga lalawigan.

Ginawa ng pangulo ang pahayag matapos na muling itaas ng Bangko Sentral ng Pilipinas o BSP ang interest rates sa ikalawang pagkakataon, simula setyembre ng nagdaang taon para labanan umano ang epekto ng inflation.

Aminado ang punong ehekutibo na problema ng kanyang administrasyon ang sitwasyon sa mga probinsya dahil sa progreso ng mga proyektong pang-imprastraktura.

Ayon kay Pangulong Duterte, sinisira ng patuloy na pagtaas ng interest rates ang kasalukuyang economic gains dahil sa pinapababa nito ang halaga ng piso.

Samantala, wala namang nakikitang ano mang problema si Pangulong Duterte sa mga mega-projects sa Metro Manila dahil maayos aniya itong nasimulan at umaasa siyang matatapos ito sa itinakdang araw.

—-

Hindi kumbinsido si Senate President Vicente “Tito” Sotto III sa impresyon na nagbabadya na naman ang martial law dahil sa implementasyon ng ‘anti-tambay campaign’ o paghuli sa mga lumalabag sa mga ordinansa.

Ayon kay Sotto, malabong maranasan muli ang batas militar sa bansa lalo’t masyadong aktibo ang mainstream media at social media hindi tulad noong dekada sitenta.

Kung martial law ang pag-uusapan edi wala na sana ‘yang mga Facebook at social media, malayong malayo ‘yang martial rule, buhay na buhay ang Kongreso eh. Pahayag ni Sotto

Hindi naman aniya lahat ng mamamayan ay target ng ‘anti-crime campaign’ ng Philippine National Police kundi  mga tambay na maaaring gumawa ng krimen.

Yung mga city ordinance, kung gusto nila, i-suspend nila. Itong national directive, directive lang ito para ipatupad ang mga local ordinance. Dagdag ni Sotto