HOT STORIES OF THE WEEK

Sumailalim na sa inquest proceedings ang dalawang bilanggong suspek umano sa pagpatay kay Genesis Argoncillo alyas “Tisoy”.

Kinilala ng Quezon City Police District ang dalawang preso na sina Richard Bautista at Justin Mercado, kapwa miyembro umano ng Sputnik gang na sinampahan ng kasong murder.

Hunyo 15 nang arestuhin si Argoncillo dahil wala umano itong suot na pang-itaas habang nagpapa-load sa isang tindahan sa Barangay Sauyo, Novaliches.

Gayunman, apat na araw ang nakalipas ay namatay si Tisoy dahil sa multiple blunt force trauma matapos umanong bugbugin nina Bautista at Mercado.

Nanawagan ang Kabataan Partylist sa PNP o Philippine National Police na pakawalan na ang lahat ng naarestong tambay.

Ayon kay Kabataan Partylist Rep. Sarah Elago, dapat na papanagutin si Pangulong Rodrigo Duterte dahil sa pahayag nitong dapat na damputin ng mga pulis ang mga taong walang ginagawa sa daan dahil posible silang mamerwisyo.

Patunay aniya ang pangyayari na naging blind followers na ng pangulo ang mga pulis dahil na rin sa utang na loob ng mga ito sa pagdoble sa kanilang sweldo.

Isinusulong ng PAO o Public Attorney’s Office na ihiwalay ng detention cell ang mga mahuhuling tambay.

Ayon kay Pao Chief Presida Acosta, hindi dapat isama sa mga kriminal ang mga mahuhuling umiinom, naninigarilyo o kaya ay naka – istambay sa mga pampublikong lugar.

Inihalimbawa ni Acosta ang kaso ni Genesis “ Tisoy” Argoncillo na napatay sa loob ng kulungan matapos na pagtulungang bugbugin ng dalawang miyembro ng Sputnik gang.

Posible aniyang naiwasan ang sinapit ni Argoncillo kung hinsi isinama sa kulungan ng mga kriminal.

Paalala ni Acosta, dapat na maging maingat ang mga pulis sa pagsita sa mga pinaniniwalaang tambay at tiyakin na mapapangalagaan ang karapatan ng mga inaaresto.

Kuwestyunin sa Korte Suprema.

Hamon ito ng Pangulong Rodrigo Duterte sa mga bumabatikos sa direktiba niyang damputin ang mga tambay sa lansangan.

Sinabi ng Pangulo na bahagi ng police power ng estado ang pag-disiplina sa mga pakalat kalat sa lansangan.

If you are unruly, talagang sabihin ko ‘uwi ka o hindi aarestuhin ka,’ that is a police power of the state. Let them contest it sa Supreme Court.

Nilinaw ng Pangulo na hindi niya ipinag-utos na arestuhin ang mga tambay maliban na lamang sa mga nag iinuman sa gilid ng kalsada na dapat naman talagang hulihin.

Inamin pa ng Pangulo na hindi krimen ang pag-tambay o loitering subalit dapat malinis ang mga lansangan mula sa mga pasaway.

‘Yang tambay, I never said arrest them. Napakag*g* naman nito. Why don’t you listen to what I said? Why don’t you rewind the tape? Dagdag ni Pangulong Duterte

Ikinalugod ng ilang mga mambabatas ang ganap nang pagsasabatas sa Mental Health Bill.

Ayon kay Akbayan Party-list Representative Tom Villarin, maituturing na magandang balita ang ginawang paglagda ni Pangulong Duterte sa nasabing batas.

Ipinakikita aniya nito na pinahahalagahan ng pamahalaan ang pagkakaroon ng holistic mental health care para sa lahat anuman ang estado sa buhay.

Umaasa naman si House Deputy Speaker Miro Quimbo na magiging daan ang Mental Health Act para mapigilan ang mga kaso ng pagpapatiwakal sa bansa.

Gayunman aminado rin ang mambabatas na marami pang dapat gawin ang pamahalaan, advocacy groups at iba pang stakeholders para matiyak ang mahigpit at epektibong pagpapatupad nito.

Sinabi naman ni Bayan Muna Party-list Representative Carlos Zarate na napapanahon ang pagsasabatas dito lalo’t naiulat ang mga pinakabagong kaso ng depresyon at suicide sa ilang mga kilalang personalidad tulad nina Anthony Bourdain at Kate Spade.

Dagdag ni Zarate, bagamat marami pang dapat ayusin sa nasabing batas, mahalaga pa ring nabigyan na ng pansin at kinilala na ang pangangailangan sa mental health ng bawat Pilipino.

Senate

Ikinatuwa din ng mga senador ang ganap na pagsasabatas sa Mental Health Act.

Ayon kay Hontiveros, isa sa mga author at nag-sponsor sa Mental Health Act, magbibigay daan ang nasabing batas para maisama na sa general health care system sa bansa ang mental health care.

Dagdag ni Hontiveros, sa pagsasabatas ng Mental Health Act, wala nang Pilipino ang patagong magdudusa sa kadiliman at magiging bukas na rin ang usapin hinggil sa problema sa mental health.

Pinatitiyak naman ni Senate President Vicente Sotto III na siyang main author ng Mental Health Act sa Department of Health ang agarang pagpapatupad ng nasabing batas na makatutulong sa kaso ng mga nagpapatiwakal sa bansa.

Samantala, nais naman ni Senate Commitee on Health Chairman JV Ejercito ang mapalawak pa ang coverage ng PhilHealth sa mga pasyenteng nangangailangan ng mental health care.

Habang umaasa naman si Senador Sonny Angara na makatutulong ang nasabing batas na maalis na ang stigma sa mental health illness at agad na makahingi ng propesyunal na tulong ang mga Pilipinong dumaranas nito.

Batay sa ipinalabas na kopya ng Malacañang, nilagdaan ng Pangulo ang nasabing batas noong Hunyo 20, isang araw bago ito mapaso.

Layon ng Mental Health Act ang mabigyan ng sapat na atensyon at maprotekatahan ang karapatan ng mga Pilipinong may pangangailangang psychiatric, neurologic at psychological.

Nakapaloob din dito ang pagkakaroon ng mabilis, abot kaya at pantay na tulong medikal para sa mga dumaranas ng problema sa mental health.

Dahil din dito, isasama na sa basic health services ang mental health kung saan inaatasan ang lahat ng mga ospital na maglaan ng unit para lamang sa mga pasyenteng may mental health problem.

Gayundin ang pagbuo ng bawat lokal na pamahalaan ng kanilang mental health program na layuning maabot ang mga pasyente hanggang sa barangay level.

(May Ulat ni Cely Bueno)

Makabubuting ipaubaya na muna sa mga barangay ang pagpapatupad ng kampaniya kontra sa mga tambay ng administrasyong Duterte.

Iyan ang pananaw ni Senador JV Ejercito sa dahilang nakabatay naman sa mga ordinansa ng lungsod at bayan ang pagpapatupad nito.

Giit ni Ejercito, mas higit na nakakikilala ang mga opisyal ng barangay sa kanilang nasasakupan kaysa sa mga pulis.

Maaari lamang aniyang pumasok ang mga pulis sa kampaniya kung hindi na kakayanin ng mga taga-barangay ang sitwasyon sa kanilang komunidad.

Mga pulis pinaalalahanang maging responsable sa pag-aresto sa mga tambay

Samantala, mahigpit ang naging bilin ni PNP Chief Director General Oscar Albayalde sa mga pulis na igalang ang karapatang pantao ng bawat Pilipino.

Iyan ang binigyang diin ni Albayalde sa harap na rin ng mga kritisismong kanilang natatanggap hinggil sa pagsunod nila sa utos ng pangulo na lipulin ang mga tambay sa kalsada.

Pagtitiyak ni Albayalde, handa silang pakinggan ang lahat ng mga reklamo hinggil sa isinasagawang mga operasyon ng pulisya pero sa ngayon ay wala naman silang natatanggap na reklamo.

Dagdag pa ni Albayalde, malinaw din ang kaniyang direktiba sa lahat ng hepe ng pulisya sa buong bansa na maging responsable sa pagpapatupad ng atas na iyon ng Pangulo.

—-