Pinalawig pa ng sampung araw ng mga otoridad ang paghahanap sa isang hiker na una nang napaulat na nawawala sa Mount Kalatungan sa Pangantucan, Bukidnon.
Kasunod na rin ito ng pagbalik ng unang search and rescue team na idineploy para hanapin ang treynta uno anyos na hiker na si Alkhharj Zamayla na noong isang linggo pa nawawala matapos umakyat ng bundok.
Sa lumabas na video, nakita ang ilang hiker na unti-unting bumababa ng bundok pabalik ng town proper matapos bigong makita si Zamayla, kung saan hirap ang rescuers sa masukal na daan at pabagu-bagong panahon na hadlang sa kanilang paghahanap sa hiker.
Ipinabatid ni Police Regional Office 10 spokesperson Major Joann Navarro na nag-deploy na sila ng mga equipment at K9 dogs para palakasin pa ang effort sa paghahanap kay Zamayla bilang bahagi ng pagtukoy at pagtutok sa mga lugar na una nang nasakop ng operasyon, subalit bigong mahanap ang naturang hiker na huling nakita noong umaga ng June 12.
