Inamin ni Ateneo Blue Eagles team manager Christopher “Epok” Quimpo na sinubukan na nitong pigilan ang mala-militar na pagsasanay ng head coach ng koponan na si Tab Baldwin sa mga manlalaro ng Ateneo de Manila.
Ito ang ibinunyag ni Tudor Clee, abogado ng asawa ni Baldwin na si Efi, matapos niyang isapubliko ang umano’y audio clip ng pag-uusap ng kanyang kliyente kasama ang kanyang anak na si Giota Kalogirou at si Quimpo noong 2019.
Sa naturang audio clip, mapakikinggan si Quimpo na nagpapaliwanag kay Gng. Baldwin na may mga babala na siyang natanggap tungkol sa pakikitungo ng head coach ng Ateneo sa mga atletang estudyante.
Bagaman batid umano ni Quimpo ang mga babala, wala siyang naging aksyon tungkol dito, kundi nagbigay lamang siya ng babala sa mga kapwa coach.
Mapakikinggan din ang pagsasalarawan ni Quimpo sa naturang pag-uugali ni Baldwin bilang isang “sickness” o “sakit.” — Sa panulat ni Anjo Riñon
