HOT STORIES OF THE WEEK

Ayaw pang magsalita ng mga awtoridad sa posibilidad na may kamay ang ISIS sa naganap na pagpapasabog sa Isulan, Sultan Kudarat na ikinasawi ng dalawa katao at ikinasugat ng mahigit tatlumpu katao.

Ito ayon kay Supt. Celestino David, hepe ng Isulan PNP ay dahil wala pa silang nakukuhang ebidensyang mag-uugnay sa ISIS sa nasabing insidente.

Sinabi naman ni Captain Arvin Encinas, Commander ng 6th Infantry Division ng Philippine Army na posibleng target ng nasabing pag-atake ang security forces na nakatutok sa Hamungaya Festival.

Tinitiyak aniya nila ang pinaigting na seguridad matapos ang insidente na hindi na mauulit.

Samantala, inako ng teroristang grupong ISIS o Islamic State of Iraq and Syria ang responsibilidad sa nangyaring pagsabog sa Sultan Kudarat.

Batay sa Site Intelligence Group, inako ng mga kaanib ng ISIS sa Silangang Asya ang nangyaring pambobomba sa Isulan Sultan Kudarat kung saan target umano nito ang mga sundalo.

Nangyari ang pagsabog dakong alas-8:30 kagabi.

Ayon sa Provincial Director ng Sultan Kudarat, inilagay ang IED o improvised explosive device sa isang motorsiklo sa harapan ng tindahan ng ukay-ukay sa gitna ng pagdiriwang ng kapistahan ang bayan ng Isulan.

By Krista de Dios / Judith Estrada-Larino

Wala umanong basehan ang desisyon ni Pangulong Rodrigo Duterte na kumalas ang Pilipinas sa International Criminal Court (ICC).

Ito ang argumento ng mga petitioner na kontra sa pasya ni Pangulong Duterte sa gitna ng pagdinig ng Supreme Court sa naturang issue.

Ayon kay Atty. Romel Bagares ng Philippine Coalition for the International Criminal Court at Counsel, para sa mga petitioner, katuwaan at nagkataon lamang ang desisyon ng pangulo.

Ang mga petitioner ay sina senators Francis “Kiko” Pangilinan, Franklin Drilon, Paolo Benigno “Bam” Aquino IV, Risa Hontiveros, Leila De Lima at Antonio Trillanes IV na nanindigang dapat din ipawalang bisa ang withdrawal ng Pilipinas sa ICC.

Ito, anila, ay dahil sa kawalan ng concurrence ng Senado sa pamamagitan ng two-thirds vote.

Ipinaliwanag ni Bagares na sa ilalim ng batas ay epektibo lamang ang mga tratado o international agreements sa oras na mapagkasunduan ng kahit two-thirds ng lahat ng senador.

Hindi aniya basta maaaring magpahayag ang executive department na kakalas ang Pilipinas sa ICC nang hindi lumalabag sa batas at kung gawin man ay paglabag ito sa separation of powers.

Disyembre 28, 2000 nang lumagda ang Pilipinas sa Rome Statute na niratipikahan at inendorso noong Agosto 2011 o sa panahon ni dating Pangulong Benigno “Noynoy” Aquino III.

—-

Inireklamo ng crimes against humanity sa International Criminal Court (ICC) ang Pangulong Rodrigo Duterte.

Naniniwala si Atty. Neri Colmenares, National Chairperson ng National Union Of Peoples’ Lawyers (NUPL) na ang Pangulo ang pinaka-responsable sa mga nangyayaring ‘extrajudicial killings’ (EJK) na bumibiktima ng libu-libong Pilipino na sangkot sa bawal na gamot.

Sinabi ni Colmenares na batay sa isinampa nilang reklamo kasama ang mga pamilya ng mga biktima ng drug-related killings, halos 23,000 na ang nasawi sa pag-atake ng Duterte administration sa mga sibilyan sa pamamagitan ng ‘Oplan Double Barrel’ ng Philippine National Police (PNP).

Umaasa si Colmenares na bago matapos ang Disyembre ay may desisyon na ang prosecution ng ICC sa kasong isinampa nila laban sa Pangulong Duterte.

—-

Nanumpa na ang bagong talagang punong mahistrado ng Korte Suprema na si Chief Justice Teresita Leonardo-de Castro.

Ayon sa report, nanumpa si De Castro sa harap ng mga miyembro ng Supreme Court en banc bandang alas-10:30 ng umaga at pinangunahan na ang sesyon.

Una nang sinalubong ng mga lobo at bulaklak si De Castro sa kaniyang pagdating sa SC building kanina.

Nakatakda namang pormal na makapanumpa ni De Castro kay Pangulong Rodrigo Duterte sa Agosto 31 habang hinihintay pa ang official transmittal ng appointment papers niya mula sa Office of the President.

Itinalaga ng Pangulo si De Castro noong Sabado at sinabing seniority sa Korte Suprema ang naging batayan niya sa pagpili ng bagong Chief Justice.

(Ulat mula kay Bert Mozo)

Pinangunahan ni Pangulong Rodrigo Duterte ang pagdiriwang ng National Heroes’ Day sa Libingan ng mga Bayani sa lungsod ng Taguig ngayong araw.

Eksakto alas-8:00 ngayong umaga nang dumating ang Pangulo sa Tomb of the Unknown Heroes sa Libingan ng mga Bayani kung saan binigyan siya ng arrival honors ng Armed Forces of the Philippines o AFP.

Sinamahan ni AFP Chief of Staff General Carlito Galvez ang Pangulo sa trooping the line o inspection of troops at saka naman ito sinamahan ni Defense Secretary Delfin Lorenzana para sa pagtataas ng watawat ng Pilipinas at pag-aalay ng bulaklak.

Kabilang sa mga dumalo sa flag raising ceremony sina Executive Secretary Salvador Medialdea, National Security Adviser Hermogenes Esperon at iba pang miyembro ng gabinete ng administrasyong Duterte.

Message

Hinimok ni Pangulong Rodrigo Duterte ang mga Pilipino na tularan ang kagitingan ng mga bayani ng Pilipinas na lumaban para sa kalayaan ng bansa.

Sa kanyang naging mensahe sa paggunita ng National Heroes’ Day ngayong araw, binigyang pugay ni Pangulong Duterte ang iba pang mga bayani na nagbuwis din ng buhay para sa Pilipinas.

Gayundin ang mga sundalo at pulis na lumaban sa mga terorista para maibalik muli ang kalayaan ng Marawi City.

Binigyang parangal din ni Pangulong Duterte ang mga pulis na tapat sa kanilang tungkulin na labanan ang kriminalidad, mga guro, mga OFW o Overseas Filipino Workers na itinuturing na mga bagong bayani ng bansa at maging mga ordinaryong Filipino na nagsasakripisyo para sa ikabubuti ng kanilang pamilya at komunidad.

Binigyang pagkilala rin ni Pangulong Duterte si Lapu-Lapu na aniya’y kauna-unahang bayaning Pilipino na nakapatay ng isang dayuhang mananakop.

Gayunman, sinabi ng Pangulo na kanyang ikinalulungkot na tila nakalimutan na mga Pilipino ang naiambag ni Lapu-Lapu sa bansa at ipinangalan na lamang ito sa isang isda.

BASAHIN:
Mensahe ni Pangulong Rodrigo Duterte para sa National Heroes’ Day pic.twitter.com/3obLXr4RdQ

— DWIZ Newscenter (@dwiz882) August 27, 2018

Pangulong Duterte, nagbibigay na ng talumpati para sa selebrasyon ng National Heroes’ Day pic.twitter.com/zlR7yT09nA

— DWIZ Newscenter (@dwiz882) August 27, 2018

(May Ulat ni Jaymark Dagala)

Sinopla ni Senador Aquilino “Koko” Pimentel III ang pahayag ni Ilocos Norte Governor Imee Marcos na mag-move on na ang kanilang mga kritiko

Sa panayam ng DWIZ kay Pimentel, sinabi nito na ang mga inapi o biktima lamang ang may karapatan na magsabi ng move on at hindi ito dapat magmula sa pamilya Marcos na siyang naka-agrabyado.

Dapat gawin ng pamilya Marcos ay maghintay na sila’y patawarin ng taumbayan sa mga pagkukulang ng kanilang pamilya sa bayan na siyang dapat na magsabi ng gayung kataga.

Ang nagsasabi kasi ng move on yung biktima eh, hindi yung mga naka-agrabyado. Hindi pwede sila ang magsabi na mag move on na kayo, kayo ang mga naisahan namin, mag move on na kayo.  Ang magsasabi po ng we can move on ay yung mga biktima hindi po pwede galing sa perpetrator ng injustice or ng hardship ang magsasabi ng mag move on na kayo tapos na naisahan ko na kayo, nagamit ko na kayo mag move on na kayo. Hindi pwede yung taumbayan ang magsasabi, sige, patatawarin namin kayo mag move na kami so hintayin niyo na yun hindi pwede sila ang magsasabi na mag move on ang tao. Sila sasabihan ng tao na mag move on na po tayong lahat. Ganoon dapat po, ganoon po ang tamang sequence hindi po yung naka-agrabyado magsabi na mag move on ka na sa kanyang biktima. Hintayin muna ang reaksyon ng taumbayan. Ganoon po yun taumbayan po ang magsasabi ng move on na tayo. Dagdag ng Senador.

(Usapang Senado Interview)