HOT STORIES OF THE WEEK

Nanindigan ang Land Transportation Franchising and Regulatory Board (LTFRB) na sapat ang P5,000 fuel subsidy ng gobyerno na ipinagkaloob sa mga jeepney driver na apektado ng excise tax sa langis.

Ito’y matapos umangal ang transport group na ACTO dahil sa umano’y kakarampot ang nasabing halaga para umalalay sa araw-araw na gastusin sa kanilang gasolina.

Ayon kay LTFRB Chairman Martin Delgra, kung tutuusin ay mas malaki ang pondong inilaan ngayon ng pamahalaan para sa pantawid pasada program na nasa halos isang bilyong piso kumpara sa budget nuong 2011.

Bukod dito sinabi ni Delgra na posible pa aniyang tumaas ang allocated budget sa naturang programa sa susunod na taon.

Inisa-isa ni Senador Sherwin Gatchalian ang mga dahilan kung bakit dapat nang buwagin ang National Food Authority (NFA).

Ayon kay Gatchalian, isa sa pangunahing rason ay dahil hindi na nito nagagampanan ang tungkulin na tiyakin na may NFA rice sa mga pamilihan at panatilihing stable ang presyo at suplay nito sa bansa.

Sinabi pa ni Gatchalian na sayang din ang pitong bilyong pisong subsidy na binibigay sa NFA kada taon dahil hindi naman aniya nagagamit sa tama.

Isa rin umanong dahilan ang malaking posibilidad na pagbaba ng presyo ng bigas sa halos P10 kada kilo kapag binuwag ang NFA dahil tiyak na papayagan na ang importasyon ng mas murang bigas.

Kaugnay nito, iginiit ni Gatchalian na sa tatlumpung taong pag-iral ng NFA, panahon na aniya para aminin na bigo ito sa kanilang trabaho, kaya’t kailangan na umanong maghanap ng paraan para masulosyunan ang problema sa bigas tulad ng isinusulong na rice tariffication.

(Ulat ni Cely O. Bueno)

Muling nagbabadya ang pagtaas ng presyo ng mga produktong petrolyo sa susunod na linggo.

Batay sa source mula sa industriya, maglalaro sa piso at 15 sentimos hanggang dalawang (2) piso ang kada kilong dagdag sa presyo ng LPG sa Setyembre 1.

Sa unang araw ng trading nasa 93 sentimos kada litro ang iminahal ng inangkat na diesel habang 63 sentimos naman ang sa gasolina at 74 sentimos ang inaasahang dagdag sa kerosene.

Gayunman, posible pang magkaroon ng pagbabago sa presyuhan ng mga produktong petrolyo ang dalawang araw pang kalakalan.

Suportado ni dating Pangulo at ngayo’y House Speaker Gloria Macapagal-Arroyo ang posibleng pagpapalawig ng batas militar sa Mindanao matapos ang pagsabog na nangyari sa Sultan Kudarat na ikinasawi ng tatlo (3) katao.

Ayon kay Arroyo, nauunawaan niya ang mga hakbang ni Pangulong Rodrigo Duterte bilang siya ay naging dati ring Pangulo.

Sinabi pa ni Arroyo na may kapangyarihan si Pangulong Duterte na magdesisyon ukol dito at hindi na kinakailangan pang idikta ng kung sinuman.

Una rito, sinabi ni Executive Secretary Salvador Medialdea na tinitingnan ng Malakanyang ang posibilidad na palawigin ang batas militar sa Mindanao matapos ang nasabing insidente.

Pinangangambahan ang pagtaas ng 65 porsyento ng posibilidad na maranasan ang El Niño sa bansa.

Ipinabatid ni Climate Monitoring and Prediction Section Officer in Charge Ana Liza Solis na posibleng mamuo ang El Niño weather pattern sa pagitan ng Setyembre hanggang Nobyembre.

Sa kasalukuyan aniya ay nakakaranas ang bansa ng isang neutral weather condition o wala alinman sa La Niña o El Niño ang nararanasan.

Gayunman, sa unang bahagi ng 2019 ay posibleng pumalo sa 78 porsyento ang posibilidad nang pamumuno ng El Niño.

Sinabi ni Solis na asahan na ang mas tuyot na kondisyon ng panahon sa ilang lugar ng bansa sa unang bahagi ng 2019.

—-

Sinegundahan ng Department of Health o DOH ang pahayag ni Agriculture Secretary Manny Piñol na ligtas pa ring kainin ang mga inangkat na bigas ng pamahalaan na tinamaan ng bukbok.

Ayon kay Health Secretary Francisco Duque III, dapat lamang ay hugasan at lutuing mabuti ang mga binukbok na bigas.

Sinabi pa ng kalihim na hindi rin makakaapekto sa kalusugan ng taon ang ginawang fumigation ng National Food Authority (NFA) sa mga binukbok na bigas dahil ang kemikal aniyang ginamit para patayin ang mga bukbok na ito ay dumaan sa masusing pagsusuri ng fertilizer ang pesticide authority.

Una rito sinabi ni Piñol na handa siyang kumain ng binukbok na bigas para patunayang ligtas pa ring kainin ang mga ito.

—-

Mariing kinondena ng Malacañang ang pagsabog sa Isulan, Sultan Kudarat kung saan namatay ang dalawang (2) tao habang sugatan ang higit 30 iba pa.

Ayon kay Presidential Spokesman Secretary Harry Roque, tinitiyak ni Pangulong Rodrigo Duterte na mapapanagot ang mga nasa likod ng nangyaring pag-atake.

Aniya, gagawin ng pamahalaan ang lahat upang matukoy kung sino ang utak ng pagsabog at gagamitin ng pamahalaan ang buong lakas nito para maparusahan ang mga salarin.

Itinaas na ang full alert status ng Philippine National Police (PNP) sa buong Mindanao kasunod ng pangyayari.

—-

Nag-alok na ang Sultan Kudarat provincial government ng isang milyong piso sa sinumang makapagbibigay ng impormasyon para sa ika-aaresto ng mga posibleng nasa likod ng pambobomba sa bayan ng Isulan, noong Martes.

Ito, ayon kay Sultan Kudarat Governor Pax Mangudadatu, ay upang mapabilis ang pagbibigay katarungan sa mga biktima at imbestigasyon sa insidente.

Dalawa (2) ang nasawi habang 35 ang nasugatan sa naturang insidente na naganap sa gitna ng 7^th Humangya Festival.

Una ng inihayag ng 6^th infantry division ng Philippine Army na may indikasyon na Bangsamoro Islamic Freedom Fighters (BIFF) ang nasa likod ng pagpapasabog.

Sinimulan na ng Senate Committee on Public Services ang pagdinig sa nangyaring aberya sa Ninoy Aquino International Airport o NAIA matapos sumadsad sa runway ang eroplano ng Xiamen Air noong Agosto 16.

Kabilang sa mga dumalo sa pagdinig ang General Manager ng Xiamen Air na si Lin Huagun at iba pang kinatawan ng nabanggit na Chinese airline company.

Gayundin ang mga opisyal ng Department of Transportation sa pangunguna ni Secretary Arthur Tugade at Manila International Airport Authority General Manager Ed Monreal.

Dumalo rin sa pagdinig ang dating namumuno sa Committee on Public Services na si dating Senador Sergio Osmeña III.

Samantala sa kanyang opening statement, sinabi ni Senate Committee on Public Services Chairman Grace Poe na sentro ng pagdinig pananagutan ng Xiamen Air sa insidente, posibleng kapabayaan ng DOTr at MIAA at kakulangan ng iba pang mga private airlines sa kanilang mga pasahero.

Gayundin aniya ang mga kasalukuyang estado ng paliparan sa bansa partikular ang NAIA.

Muli namang humingi ng paumanhin si Transportation Secretary Arthur Tugade sa publiko partikular sa libu-libong pasaherong matinding naapektuhan ng pagsasara ng NAIA dahil sa pagsadsad sa runway ng eroplano ng Xiamen Air noong Agosto 16.

Sa pagdinig ng Senate Committee on Public Services sa nangyaring aberya sa NAIA, sinabi ni Tugade na kanilang ikinalulungkot ang inisidente na hindi rin anila ginusto.

Kasabay nito, iginiit ni Tugade na ginawa nila ang trabaho para maibalik sa normal ang operasyon ng paliparan sa kabila ng mga natanggap na kritisismo.

Pagdinig ng Senado ngayong umaga ukol sa NAIA runway mishap kamakailan, pinangungunahan ni Committee on Public Services Chair Senator Grace Poe | via @blcb pic.twitter.com/LWwfRju3iG

— DWIZ Newscenter (@dwiz882) August 29, 2018

(Ulat ni Cely Bueno)

Aprubado na ng House Committee on Appropriations ang proposed budget para sa Office of the President sa susunod na taon.

Agad na inaprubahan ni House Committee on Appropriations Chairman Karlo Nograles ang motion ni Albay Representative Edcel Lagman na aprubahan na ang 6.77 billion pesos na budget ng Office of the President matapos ito ipresenta sa komite.

Ang 2019 proposed budget para sa tanggapan ng Pangulo ay mas mataas ng 12.32 percent mula sa kasalukuyang anim na bilyong piso.

Samantala, lusot na rin sa committee level ang proposed 447.6 million pesos na pondo ng Office of the Vice President para sa 2019.

Mas mababa ito ng 95 million pesos mula sa 543 million pesos na pondo ng Office of the Vice President sa kasalukuyang taon.

TINGNAN: Panukalang budget ng Office of the Vice President na inaprubahan ng Appropriations Committee | via @JILLRESONTOC pic.twitter.com/PypVriHak5

— DWIZ Newscenter (@dwiz882) August 29, 2018

(Ulat ni Jill Resontoc)