HOT STORIES OF THE WEEK

Nakatakdang bumiyahe patungong Israel si Pangulong Rodrigo Duterte simula ngayong araw.

Kasama ni Pangulong Duterte ang mahigit isandaan limampung negosyante sa kanyang official trip na magtatapos sa Setyembre 5.

Inaasahang aalis mamayang hapon ang Punong Ehekutibo para sa kauna-unahang official visit ng Pangulo ng Pilipinas sa Israel.

Kabilang sa mga tatalakayin ang posibleng pagbili ng mga armas ng Pilipinas mula Israel, kalakalan at sitwasyon ng mga overseas Filipino worker.

Matapos nito ay bibisita naman si Pangulong Duterte sa Jordan simula Setyembre 5 hanggang Setyembre 8.

Patuloy ang paghina ng piso kontra dolyar.

Nagsara kahapon ang halaga ng piso sa P53.475 kontra isang dolyar mula sa P53.430 nuong Huwebes na mas mababa ng 4.5 centavos.

Paliwanag naman ng chief economist ng UnionBank of the Philippines na si Ruben Carlo Asuncion, ang paghina ng piso kontra dolyar ay bunsod ng tensyon sa pagitan ng Amerika at China.

Nakaapekto umano sa market currencies ang plano ni US President Donald Trump na patawan ng mas mataas na taripa ang $200 bilyon na halaga mga produkto mula China.

Inaasahang papalo sa 5.9 percent ang inflation o pagbilis ng pagtaas ng presyo ng mga bilihin at serbisyo nitong Agosto.

Sa taya ng Bangko Sentral ng Pilipinas (BSP), posibleng nasa saklaw ng 5.5 hanggang 6 percent ang rumehistrong pinakabagong inflation.

Bunsod umano ito ng pagtaas ng presyo ng bigas at ilang pang produktong pagkain na bunsod ng mga naranasang pagtama ng bagyo at pananalasa ng habagat.

Maliban dito, posibleng maka-apekto rin sa pagbilis pa ng inflation nitong nakaraang buwan ang pag-akyat ng presyo ng mga produktong petrolyo at LPG maging ang bahagyang pagtaas sa singil sa kuryente ng Meralco.

Kasabay nito, tiniyak ng BSP na patuloy silang nakabantay sa mga posible pang makaapekto sa inflation.

Idinepensa ng Malacañang ang naging pahayag ni Pangulong Rodrigo Duterte kaugnay sa mga kaso ng rape sa kababaihan.

Sa isang speech sa Mandaue City nitong Huwebes ay nagbiro ang Pangulo na kaya umano maraming kaso ng rape sa Davao City ay dahil marami rin ang magagandang babae sa syudad.

Ayon kay Presidential Spokesperson Harry Roque hindi dapat seryosohin ang pahayag na ito ng Pangulo.

“I don’t think we should give too much weight on what the President says by way of a joke.”

“Some may not approve but you know I can tell you this already: there is a difference between sense of humor in Luzon, Visayas and Mindanao. And from what I have seen myself although I am from Luzon, people in the south, particularly in Cebu and the Visayas, they don’t take things as seriously as people in Luzon.” Ani Roque

Idinagdag ni Roque na alam ng Punong Ehekutibo ang kanyang limitasyon sa kung hanggang saan lang ang kanyang magiging biro.

“I think the President is mature enough to know to what extent he can go and he thinks that it is not putting it too low.” Dagdag ni Roque

Una nang umani ng batikos mula sa mga grupo ng kababaihan ang naging pahayag na ito ni Duterte na anila’y hindi katanggap-tanggap lalo’t mula mismo sa pinakamataas na opisyal ng bansa.

Anila nakakapangamba ang maling mensahe na ibinibigay ng Pangulo na ang pagiging maganda ang dahilan ng rape.—AR

—-

Isasagawa na sa lalong madaling panahon ang joint exploration ng Pilipinas at China sa West Philippine Sea.

Ito ang inihayag ni Department of Foreign Affairs (DFA) Secretary Alan Peter Cayetano sa House hearing ng proposed budget ng DFA para sa susunod na taon.

Gayunman, nilinaw ni Cayetano na kailangan pang pumasa sa Supreme Court ang babalangkasin nilang legal framework.

“If you talk about the whole West Philippine Sea where the Philippines have claims, the possible natural gas and oil there is about 50-100 times of Malampaya. If makahanap tayo ng framework na payag ang Chinese, payag ang Pilipino it will pass with flying colors sa Supreme Court and we can protect our territorial and economic rights.” Pahayag ni Cayetano.

Samantala, tiniyak naman ng kalihim na hindi maisasantabi ang iba pang claimant sa pinag-aagawang teritoryo.

Tumaas na rin ang presyo ng tuyo sa ilang pamilihan sa Metro Manila.

Mula sa dating P280, aabot na sa P340 ang presyo ng tuyong salinas sa Marikina at ilang karatig lugar.

Ito, ayon sa mga tindera, ay dahil nauubos na ang imbak na frozen fish ng mga supplier habang humina rin ang huli ng mga mangingisda matapos ang pananalasa ng habagat at magkakasunod na bagyo.

Nagmahal din ang presyo ng kada kilo ng dilis at dulong na ngayon ay aabot na sa P600;

Aabot naman P320 ang kada kilo ng tinapang salinas habang P240 sa kada kilo ng tinapang galunggong.

Maigi pang magkaroon ng diktador ang Pilipinas tulad ni dating Pangulong Ferdinand Marcos kung magpapatuloy ang problema sa iligal na droga.

Ito ang inihayag ni Pangulong Rodrigo Duterte sa kanyang talumpati sa selebrasyon ng 49th Mandaue Charter Day sa Cebu.

Ayon kay Pangulong Duterte, kung hindi siya titigil sa pagsugpo sa iligal na droga at korapsyon ay maaaring mas marami umanong mamatay.

“If I stop now my crusade against drugs and if there is said no order in this place Philippines, ang corruption will continue, patay yun. I said you’re better off choosing a dictator with the likes of Marcos. That is what I suggested.” Pahayag ni Duterte.

Kasabay nito, muling minaliit ng Punong Ehekutibo si Vice President at opposition leader Leni Robredo.

Nanindigan din si Pangulong Duterte na naging talamak ang shabu sa Naga City, Camarines Sur na hometown ni Robredo.

“Pwede naman kayo mag constitutional succession, it’s Robredo. But she cannot hack it. I stand by my word na the hotbed of the…yung brother-in-law niya ang nagdala ng drugs sa Bicol, totoo yan.” Ani Duterte.