HOT STORIES OF THE WEEK

Iniluklok ni Pangulong Rodrigo Duterte si Associate Justice Teresita De Castro bilang bagong Chief Justice ng Korte Suprema.

Ito ang inihayag ni Justice Secretary Menardo Guevarra ngayong hapon sa mga mamahayag.

Nakatakdang ilabas ni Executive Secretary Salvador Medialdea ang appointment paper ni De Castro sa Martes, Agosto 28.

Si De Castro ay isa sa mga mahistrado na nanilbihan sa Hudikatura sa loob ng  45 na taon kung saan nagsimula siya bilang law clerk sa Korte Suprema noong 1973.

Maninilbihan lamang si De Castro sa Korte Suprema bilang Chief Justice sa loob ng halos dalawang buwan dahil nakatakdang magretiro siya sa Oktubre.

Samantala, ikinatuwa ni Presidential Spokesman Harry Roque ang naging desisyon ng pangulo sa pagtalaga kay De Castro.

“Bravo! best choice for Chief Justice (CJ)! Proven competence, known nationalist and a streak of being a judicial activist!” pahayag ni Roque.

Sa panayam naman ng DWIZ kay Senator Richard Gordon, ikinagalak din niya ang naging desisyon ng pangulo at naniniwala na maraming maisasaayos si De Castro sa Korte Suprema.

“I think she can handle ‘yung kakulangan ng courts, makakaya niya ‘yan dahil inappoint siya ng pangulo. what an honor to her family. maganda ang record niya.” aniya ni Gordon.

Sa panig naman ni Liberal Party President at Senador Francis Pangilinan, maituturing na “Endo CJ” si De Castro dahil sa sobrang ikli lamang ng mahigit dalawang buwang panunungkulan nito.

Dahil dito, sinabi ni Pangilinan na hindi makatutulong ang pagkakatalaga kay De Castro para palakasin ang judicial system sa bansa.

Maverick Matibag (Social Media Writer)

Ibinasura ng Korte Suprema ang hirit ni Senador Leila de Lima na dumalo sa oral argument kaugnay sa petisyong kumukuwestyon sa pagkalas ng Pilipinas sa Rome Statute ng International Criminal Court o ICC.

Sa botong 10-3, nanindigan ang High Tribunal na hindi uubrang dumalo si De Lima dahil wala itong bagong argumentong naiprisinta sa kanyang motion for reconsideration.

Una nang ibinasura ng SC ang kahilingan ni De Lima na personal na dumalo sa oral argument bilang isa sa mga petitioner kung saan ikinunsidera ang seguridad na kailangang ilatag kapag lumabas ang senador ng PNP Custodial Center sa Camp Crame.

Ipinag-utos naman ng High Tribunal ang pagpapatuloy ng oral argument sa August 28.

—-

Naaalarma ang Malacañang sa babala ng Estados Unidos na posibleng naglalagay na ang China ng nuclear power stations at nuclear weapons arsenal sa mga military base nito sa West Philippine Sea.

Ayon kay Presidential Spokesman Harry Roque, alinsunod sa Section 8, Article 2 ng 1987 constitution, isang deklaradong nuclear-free zone ang Pilipinas.

Kahit anya ang buong Association of Southeast Asian Nations ay nuclear-free zone sa ilalim ng nilagdaang Southeast Asia nuclear weapon-free zone treaty.

Gayunman, aminado si Roque na ang babala ay maaaring obserbasyon lamang ng US Defense Department at hindi pa nabeberipika ng Pilipinas.

Una nang nagbabala ang Amerika sa posibleng paglalagay ng China ng nuclear arsenal sa West Philippine Sea.

Ayon sa US State Department, kumpleto na ang shore based infrastructure ng Beijing sa Spratly Islands noon pang 2016 at tila inihahanda naman ngayon ang apat na outpost sa Mabini Reef, McKennan Reef, Burgos at Calderon Reefs para magsilbing nuclear station.

Sinasabing sisimulan ang bagong proyekto bago sumapit ang taong 2020.

Nangangamba ang mga eksperto na maaring magdulot ito ng dagdag na problema lalo’t pinagtatalunan ang nasabing teritoryo.

Wala pa namang pahayag ang China hinggil sa nasabing report ng Pentagon.

Samantala, siniguro naman ng Department of National Defense o DND na laging handa ang Armed Forces of the Philippines o AFP na ipagtanggol ang bansa.

Kasunod ito ng pahayag ng Amerika na posibleng naglalagay ng nuclear arsenal ang China sa bahagi ng West Philippine Sea.

Ayon kay DND Spokesman Arsenio Andolong, nakahanda ang militar na tuparin ang mandato nito at gagamitin ang lahat ng kagamitan na mayroon ang sandatahang lakas.

Ngunit nilinaw ni Andolong na sa ngayon ay wala pa silang nakikitang anumang banta sa seguridad.

Magpapatuloy naman aniya ang modernisasyon ng AFP para mapalakas pa ang pagdepensa ng bansa sa mga teritoryong pag-aari nito.

—-

Pormal nang inihain ng Magnificent 7 ang impeachment complaint laban sa pitong mahistrado ng Korte Suprema na nagpatalsik kay dating Chief Justice Maria Lourdes Sereno.

Kabilang sa mga inireklamong mahistrado ay sina Associate justices Teresita de castro, Diosdado Peralta, Lucas Bersamin, Francis Jardeleza, Noel Tijam, Andres Reyes Jr. at Alexander Gesmundo.

Naging batayan ng naturang reklamo ay ang culpable violation of the constitution at betrayal of public trust dahil naniniwala ang mga kongresista na paglabag sa konstitusyon ang pag-apruba sa quo warranto petition laban kay Sereno.

Hindi naman kasama sa mga kinasuhan si dating Associate Justice Samuel Martires dahil itinalaga na ito bilang Ombudsman.

Ang naturang impeachment complaint ay inihain nina Albay Representative Edcel Lagman, Akbayan Representative Tom Villarin, Ifugao Representative Teddy Baguilat at Magdalo Representative Gary Alejano.

Samantala, tumanggi munang magkomento ang Supreme Court sa inihaing impeachment complaint ng Magnificent 7.

Ayon kay Atty. Theodore Te, PIO-Chief ng SC, mahirap magbigay reaksyon sa nasabing reklamo dahil wala pa naman silang natatanggap na kopya nito.

—-

Tiniyak ng Malakanyang na may mga hakbang nang ginagawa ang pamahalaan upang ma-solusyonan ang krisis umano sa bigas sa Zamboanga.

Ayon kay Presidential Spokesman Harry Roque, kumikilos na ang National Food Authority o NFA pang tugunan ang problema sa rice supply sa naturang lugar.

Isa anya rito ang pagtatatag ng bigasang bayan sa Zamboanga at ibaba ang presyo ng nasabing commodity.

Gayunman, aminado si Roque na ang pagbuhos ng supply ng bigas sa Zamboanga ang nakikita nilang pinaka-mainam na solusyon upang mawakasan ang krisis.

Sa huling report, nagsisimula na umanong dumagsa ang bigas matapos aprubahan ng konseho na isa-ilalim sa state of calamity ang Zamboanga City.

(with report from Jopel Pelenio) 

Nangako ang Xiamen Air na sasagutin ang lahat ng naging gastos sa nangyaring aberya sa isang eroplano na naging dahilan ng pagkadelay at pagkansela sa maraming flight sa NAIA.

Kasabay nito, humingi ng paumanhin ang Xiamen sa mga naabalang pasahero at nagsabing hindi sila nagpabaya sa pagtugon sa pangangailangan ng mga naistranded tulad ng pagbibigay ng tubig at pagkain.

Handa naman ang kumpanya humarap at makipagtulungan sa ginagawang imbestigasyon ng Civil Aviation Authority of the Philippines at Civil Aviation Administration of China sa naturang insidente.

Sa pagtaya ng MIAA, nasa 15 milyong piso ang inisyal na kailangang bayaran ng Xiamen para pa lamang sa crane at mga tauhan na nagtanggal ng sumadsad na eroplano.

Biniberipika na ng Philippine National Police o PNP ang umano’y banta sa buhay ni Pangulong Rodrigo Duterte gayundin ang sinasabing plano ng mga retirado at aktibong military at police officials na patalsikin sa puwesto ang Pangulo.

Ipinabatid ito ni PNP Chief Director General Oscar Albayalde dahil kailangan aniyang kumpirmahin nila ang mga nasabing report sa kanilang source sa intelligence community.

Tiniyak ni Albayalde na sini seryoso nila ang seguridad ng Pangulo na patuloy namang mahigpit na binabantayan ng Presidential Security Group o PSG.

Una nang inihayag ng Pangulo na nais ng CIA o Central Intelligence Agency ng Amerika na siya ay mapatay habang tinututukan din aniya siya ng Russia, China, Israel at Indonesia.

Lumutang naman ang pagkakasa umano sa Duterte ouster sa buwan ng Oktubre.

—-

Pinawi ng Department of Agriculture o DA ang pangambang kontaminado ng formalin ang mga galunggong na aangkatin sa China at iba pang bansa.

Ayon kay Agriculture Secretary Manny Piñol, maaari namang idaan sa pagsusuri ang mga galunggong upang matiyak na ligtas itong kainin.

Sinabi ni Piñol na posibleng sa Setyembre dumating ang unang shipment ng mga imported na galunggong.

Wala aniyang babayarang taripa kung magmumula ito sa Vietnam at China samantalang limang porsyento ang taripa kung magmumula ito sa Taiwan.

Inaasang mapapababa ng mga imported na galunggong ang presyo ng mga lokal na galunggong na ngayon ay umaabot na sa 160 hanggang 170 pesos ang kilo.

—-

Posibleng ipalabas ng Civil Aviation Authority of the Philippines o CAAP ngayong linggo ang resulta ng kanilang partial investigation sa nangyaring pagsadsad ng eroplano ng Xiamen Air sa runway ng NAIA.

Ayon kay CAAP Spokesperson Eric Apolonio, kinakailangan pa nilang kumpletuhin ang nilalaman ng flight data recorder ng sumadsad na eroplano ng Xiamen bago opisyal na magpalabas ng pahayag.

Gayunman nilinaw ni Apolonio na walang nangyaring miscommunication sa pagitan ng NAIA control tower at piloto ng eroplano ng Xiamen na sinasabing dahilan naman ng pagsadsad nito sa runway.

“In fact nag-misapproach sila on the first try because of the weather, visibility, second marami naman ang nakababa, meron namang enough evidence na malalaman talaga kung ano ang totoong nangyari.” Ani Apolonio

Tiniyak naman ni Apolonio na nakikipagtulungan ang Korean national na piloto at Chinese co-pilot ng nasabing eroplano sa kanilang isinasagawang imbestigasyon.

Sa katunayan aniya ay nananatili pa ang mga ito sa bansa at dalawang beses na ring humarap sa kanilang imbestigasyon.

(Ratsada Balita Interview)