Inaasahang ilulunsad ng Indonesian shipbuilding company na PT PAL ang ikatlong Tarlac-class landing platform dock para sa Philippine Navy sa Hunyo a-trenta.
Sa naging panayam ng defense and security news outlet na Janes kay PT PAL CEO Kaharuddin Djenod, nagpapasalamat siya sa pamahalaan ng Pilipinas dahil naresolba ng dalawang panig ang mga gusot nito pagdating sa scheduling ng pagsasagawa ng barko sa loob ng anim na buwan.
Inaasahan namang isasagawa ang outfitting ng barko, na hindi pa napapangalanan, bago ito i-deliver sa Philippine Navy sa taong 2027.
Bahagi ang naturang barko sa dalawa pang Tarlac-class vessels na follow-up order ng Pilipinas noong 2022 matapos na-commission sa serbisyo ng Hukbong Dagat ang BRP Tarlac noong 2016 at BRP Davao del Sur noong 2017. — sa panulat ni Anjo Riñon
