HOT STORIES OF THE WEEK

Lumantad na sa tanggapan ng Integrated Bar of the Philippine-National Center For Legal Aid o IBP-NCLA si alyas ‘Bikoy’ na nasa narcolist video na kumalat sa internet.

Sa kaniyang pagharap sa press conference sa IBP, sinabi ng nagpakilalang ‘Bikoy’ na si Peter Joemel Advincula na kaya niyang napagdesisyunang lumutang dahil sa banta sa kaniyang buhay at tawag ng konsensya.

Nilinaw din ni Advincula na hindi niya kilala ang lumantad na uploader ng video na si Rodel jJayme at wala rin umano siyang kaugnayan sa sinumang pulitiko o partido pulitikal.

Isinalaysay din ni Advincula kung papaano siyang napasok sa sindikato ng iligal na droga na kinabibilangan umano nina dating special asst. to the president Bong Go.

Aniya, nagsimula siya bilang dating empleyado ng Vita Plus na pag-aari ng first quadrant multi-level company sa Bicol ngunit noong Pebrero 2010 ay inilipat na siya ng kaniyang dating boss na si Tess Rañola sa operation center ng sindikato.

Dito ay naging taga-scan umano siya ng mga tattoo ng ilang kasapi sa sindakato tulad nina Paolo Duterte at Go.

“Bahagi po ng gawain ng aming team ay ang pag i-scan ng mga codes na naka ukit sa tattoo ng mga senior member o principal ng sindikato tulad nila Paolo Duterte at Christopher Lawrence Bong Tesorogo. Pinapadala ito sa financial controller ng sindikato na nakabase sa Hong Kong, China upang ma-validate ang mga transaksyon”.

Taong 2013 umano ay nakulong siya dahil sa kasong Estafa na isinampa ng Vita Plus at nakalaya makaraan ang 4 na taon.

Ani Advincula, nagsimula muli siya at nagkaroon ng bagong trabaho, ngunit sa isang pagtitipon sa kaniyang pinapasukang kumpaniya ay naging guest umano si Go at dito siya namukhaan.

“Naging panauhin si Bong Go. Namukhaan niya ako. Simula noon, ay ginigipit na ako ng may ari ng kompanya hanggang isang araw ay sinabihan ako ng ka trabaho ko na mabuti pang umalis na ako dahil ganganib na buhay ko”.

Dahil dito ay naging buo na umano ang kaniyang loob na isiwalat ang lahat ng kaniyang nalalaman kaugnay sa sindikatong kaniya dating kinabibilangan.

Kasabay nito, tiniyak ni alyas ‘Bikoy’ na handa siyang humarap sa Senado.

“Handa po akong humarap sa ano mang imbestigasyon ng Senado upang patotohanan ang lahat ng inilabas ko sa video serye. Hiling ko lang sa bawat mamamayang Pilipino ang inyong panalangin para sa aking kaligtasan.”

Lumutang sa tanggapan ng Integrated Bar of the Philippines (IBP) si alyas “bikoy”, ang nasa likod ng “ang tunay na narcolist” video na kumalat sa internet.

Matatandaan na pinangalanan sa video ni “bikoy” ang mga anak ni Pangulong Rodrigo Duterte at dating special assistant to the president Bong Go na kabilang sa sindikato ng droga.

Sa isang press conference, nagpakilala si “bikoy” bilang Peter Jomel Advincula.

Wala umano syang kaugnayan sa sinumang pulitiko o partido pulitikal subalit marami syang kakilala sa media na isinama ng Pangulong Duterte sa inilabas nyang out duterte matrix.

Ayon kay “bikoy”, hindi nya kilala ang lumantad na uploader ng video na si Rodel Jayme.

Nagpasya anya syang lumantad dahil sa banta sa kanyang buhay at tawag na rin ng konsensya.

Nagpasya syang magpatulong sa grupo ng mga madre na syang nagdala sa kanya sa IBP.

Nakatakdang magsumite si alyas “bikoy” ng kanyang sinumpaang salaysay sa IBP para sa kanyang pangangailangang legal.

with report: Jaymark Dagala (Patrol 9)

NCLA, pagaaralan kung tatanggpin bilang kliyente si alyas “Bikoy”

Pag-aaralan pa ng National Center for Legal Aid (NCLA) ng Integrated Bar of the Philippines (IBP) kung tatanggapin bilang kliyente si Peter Joemel Advincula alyas “Bikoy”.

Ayon kay Atty. Abdiel Fajardo, National President ng IBP, nabigla rin sila sa pagdagsa ng media sa kanilang tanggapan kasunod ng pagdulog ng isang kliyente sa NCLA.

Ang NCLA anya ay binuo ng IBP upang tumulong sa mga nangangailangan ng tulong legal katulad ng ginagawa ng Public Attorneys Office.

Autonomous po ‘yung NCLA po namin. Sila ang nageevaluate talaga ng kaso and (…) I, myself, personally, ‘di ba, who is not the lawyer of this person cannot, you know, interfere with that relationship, if ever NCLA accepts the client.” ani Atty. Fajardo.

Pinangalanan na ni Department of Justice (DOJ) Sec. Menardo Guevarra ang umano’y nasa likod ng Bikoy videos na nagdadawit sa pamilya at mga kaibigan ni Pangulong Rodrigo Duterte sa illegal drug trade na tinaguriang ‘Davao Group’.

Ayon sa kalihim, ang umano’y uploader ng Bikoy videos ay si Rodel Jayme kung saan siya ay kasalukyang iniimbestigahan siya ng National Bureau of Investigation (NBI) at nakatakdang sampahan ng kasong paglabag sa Cybercrime Prevention Act of 2012.

Kinukunsidera din kasuhan inciting to sedition at paglabag din sa Republic Act 7610 o Child Abuse Law na maaaring isampa sa nasabing blogger.

Aniya ni Guevarra lumalabas sa imbestigayon na si Jayme mula sa website nito na Metro Balita ang video kaya inaresto siya sa pamamagitan ng warrantless arrest noon Abril 30.

Samantala, hindi pa tiyak kung siya rin ay si Alyas Bikoy at iginiit din na walang kinalaman ang Malakanyang sa isinagawang pag-aresto sa kanya.

with report from Bert Mozo (Patrol 3)

Pag-aresto sa nag-upload ng Bikoy video dapat malaman kung legal — Lacson

Dapat malaman kung legal ang pagkakaaresto ng National Bureau of Investigation (NBI) sa uploader nang nag viral na Bikoy video.

Ito ayon kay Senador Panfilo Lacson ay dahil base sa Revised Penal Code, maituturing na legal ang pagkakaaresto kung boluntaryong nagpasalang sa preliminary investigation ang subject ng nasabing kaso.

Subalit, sinabi ni Lacson na kung walang legal na basehan ang pag-aresto kinakailangang magpaliwanag ang Department of Justice (DOJ) at NBI.

Una nang inihayag ni Justice Secretary Menardo Guevarra na ang uploader ng video na si Rodel Jayme ay inaresto base na rin sa inisyung warrant ng Makati RTC.

written by Judith Estrada-Larino & with report from Cely Ortega-Bueno (Patrol 19)

Umano’y uploader ng ‘Bikoy’ videos kinasuhan na

Kinasuhan na ng National Bureau of Investigation (NBI) ng inciting to sedition ang inaresto nitong uploader ng nag viral na Bikoy videos.

Batay ito sa isinampang reklamo ni NBI Deputy Director Vicente de Guzman III laban kay Rodel Jayme.

Nabatid na kaagad reresolbahin ang nasabing reklamo matapos umanong i-waive ni Jayme ang karapatan nito sa preliminary investigation.

——

Dalawa ang sugatan habang libu-libong residente ang nawalan ng bahay sa sunog sa Barangay Bahay Toro at Baesa sa Quezon City.

Sa Barangay Bahay Toro, sugatan sina Nikki Codavar, 23 anyos at Senior Fire Officer 2 Carla  Wong nang sumiklab ang sunog sa Sinagtala Street na tumupok sa tinatayang 50 kabahayan.

Nasa 900 pamilya naman ang apektado nang lamunin ng apoy ang nasa 400 kabahayan sa  Ambuklao-Mendez Road, Barangay Baesa.

Ayon sa Bureau of Fire Protection, dakong alas 4:00 ng hapon nang magsimula ang sunog sa mga nabanggit na lugar.

Itinaas sa fifth alarm ang sunog sa Barangay Bahay Toro habang task force bravo sa Barangay Baesa bago tuluyang naapula mag-a-alas 9:000 kagabi.

Inaalam na ang sanhi ng sunog at halaga ng mga napinsala o natupok na ari-arian.

(with report from Jaymark Dagala)

Walang maasahang umento sa sahod ang manggagawa sa Metro Manila kasabay ng pagdiriwang ng Labor Day bukas, Mayo 1.

Ayon ito mismo sa Department of Labor and Employment (DOLE) dahil na rin sa kakulangan ng panahon batay na rin sa kanilang timeframe.

Sinabi ni Labor Undersecretary Ciriaco Lagunzad, imposible nang magpatupad ng dagdag-sahod ang Regional Tripartite Wages and Productivity Board (RTWPB) lalo’t kahapon lamang sila nagpatawag ng pulong para matalakay ang hirit na dagdag-sahod.

Dagdag ni Lagunzad, hindi rin sakop ng hurisdiksyon ng RTWPB ang magpasiya sa petisyon ng Trade Union Congress of the Philippines (TUCP) para sa across the board wage hike sa mga manggagawa sa NCR.

Una rito, tiniyak naman ng DOLE na kanilang aaksyunan at pag-aaralan ang hirit ng TUCP na itaas sa P710.00 ang minimum na pasahod ng mga manggagawa.

Tamang pasahod para sa Labor Day, hiniling ng CBCP

‘Tamang pasahod sa bawat manggagawa sa bansa.’

Ito ang panalangin ng Catholic Bishops’ Conference of the Philippines (CBCP) para sa pagdiriwang ng Araw ng Paggawa bukas, Mayo 1.

Ayon kay CBCP President Davao Archbishop Romulo Valles, hangad niya ang mabigyan ng wastong pasahod ang mga manggagawa bilang bunga ng kanilang mga pinaghirapan at pagpapahalaga sa pagkatao.

Kasabay nito, tiniyak ni Valles na kinikilala ng Simbahang Katolika ang mga naging ambag ng mga manggagawa sa pag-unlad ng lipunan, komunidad at ekonomiya ng bansa.

Patuloy din aniyang idinadalangin ng simbahan na maunawaan ng mga manggagawa na ang kanilang araw-araw na trabaho ay biyaya at bahagi ng magandang likha ng panginoon.

Ibabawas sa bayarin ng mga customers ng Manila Water ang halos kalahating bilyong pisong bahagi ng babayarang multa ng water concessionaire dahil sa pumalpak na serbisyo sa tubig.

Ayon kay Administrator Reynaldo Velasco ng Metropolitan Waterworks and Sewerage System (MWSS), posibleng maramdaman na ito ng mga customers ng Manila Water sa Hunyo.

Sa ngayon anya ay binubuo na ang mekanismo kung paano ibabawas sa bill ng mga customers ng Manila Water ang P534M na multa.

Samantala, sinabi ni Velasco na gagamitin naman sa mga proyekto ng Manila Water para sa pagsasa ayos ng serbisyo sa tubig ang P600M na bahagi pa rin ng multa.

Yung 534 [million pesos] may formula ‘yan ng regulatory office, no, so 534. Actually dalawa ‘yan, 517 [million pesos]  tyaka 534, pinili ng board ‘yung mataas, ‘yung 534. ‘Yung 600 [million pesos]  is actually board decision ‘yan, nadagdag ‘yan (…) ‘yung 534 ide-deduct yan sa bill starting June ng mga konsyumer. ‘Yung 600 ide-deduct ‘yan sa gagawin nilang project na water source in the future.” paliwanag ni Velasco.

Ratsada Balita Interview

Isinailalim na sa state of calamity ang lalawigan ng Pampanga matapos labis na maapektuhan ng magnitude 6.1 na lindol.

Ito ayon kay Pampanga Governor Lilia Pineda ay matapos umabot na sa labing isa (11) ang nasawi sa lalawigan dahil sa naturang pagyanig.

Sinabi ni Pineda na maliban sa mga indibidwal, naapektuhan din ng lindol ang mga imprastruktura sa kanilang lalawigan.

Kasabay nito ay pinakilos ni Pineda ang mga alkalde sa mga bayan sa Pampanga na naapektuhan ng lindol na kaagad isumite ang ulat hinggil sa pinsala ng pagyanig sa kanilang lugar para kaagad maibigay ang kinakailangang tulong.

Kaagad aniya niyang isusumite sa Pangulong Rodrigo Duterte ang report para matugunan ng national government ang anumang kahilingan ng local government units sakaling hindi masagot ng provincial government.

Nakatakdang magtungo ng Pampanga si Pangulong Rodrigo Duterte.

Pangungunahan ng pangulo, pasado alas-2 ngayong hapon ang itinakdang situation briefing matapos ang magnitude 6.1 na lindol.

Nais ng pangulo na personal na mabatid ang lawak ng pinsala ng nasabing pagyanig sa Pampanga.

Una nang inatasan ng pangulo ang mga gobernador ng mga apektadong lalawigan na tiyaking mabibigyan ng ayuda ang mga residente at kaagad magsagawa ng assessment sa pinsala ng nasabing lindol.

Naramdaman ang intensity 6 na lindol sa mga bayan ng Floridablanca, Lubao at Porac at maging sa Angeles City.