Inamin ni Pangulong Rodrigo Duterte na matagal nang nangyayari sa Davao City ang extra judicial killings.
Sinabi ng pangulo na ito ay naiintindihan ng mga taga Davao City dahil sa EJK ay walang problema ang lungsod sa droga, patayan at nakawan.
Ayon pa sa pangulo, masamang tao ang mga pinatay habang ang mga pulis ay nakaligtas.
Ang pag amin ng pangulo ay sa gitna na rin ng matagal nang batikos sa war on drugs ng administrasyon.
Mahigit nasa 80 indibidwal ang nadakip ng mga otoridad matapos umanong masangkot sa vote buying at selling.
Ayon kay NCRPO Police Chief Dir. Guillermo Eleazar, naaresto ang mga indibidwal simula nang ipatupad ang task force kontra bigay ng Commission on Elections (Comelec), Philippine National Police (PNP) at Armed Forces of the Philippines (AFP) nuong Biyernes.
Inilunsad aniya ang naturang task force sa Malabon City, Muntinlupa City, Quezon City at Makati City.
Sa ngayon ay nakapiit sa kani-kanilang police stations ang mahigit 80 lumabag sa election code at posibleng maharap sa kaukulang kaso.
Vote buying mas malala ngayong eleksyon
Mas naging talamak ngayon ang vote buying kumpara nuong 2016 elections.
Ito ay ayon kay Comelec Commissioner Rowena Guanzon kung saan aniya hindi niya matukoy kung bakit mas marami ngayon o dahil marami ang nahuli dahil sa vote buying at selling.
Kinuwestiyon din ni Guanzon kung saan galing ang perang pinamimigay ng mga kandidato gayung wala naman umanong presidential candidate kaya’t ang ibig aniyang sabihin nito ay galing sa lokal.
Giit ng opisyal, dahil sa hindi matuldukang problema sa vote buying, nagiging kurap na rin ang kaisipan ng mga botante.
Halaga ng ipinamimigay na boto bumaba ng P20
Bumaba ng hanggang P20 ang halagang ipinamimigay ng mga kandidato para sa kanilang pagbili ng boto.
Ayon kay Comelec Education and Information Director France Arabe, ito ay batay sa kanilang mga natanggap na ulat mula sa Cavite at Muntinlupa.
Sinabi ni Arabe na mayroong P20 at P50 na inilalakip ang mga kandidato sa kanilang flyers na ipinamimigay.
Mayroon din aniyang mga kandidato na nag-ooffer ng refund ng mga pamasahe ng mga botante.
Kaugnay nito, hinimok ni Arabe ang publiko na huwag ipagbili ang boto at bumoto nang naayon sa konsensya.
Umabot na sa 266 katao ang naaresto ng mga otoridad na lumabag sa pagpapatupad ng liquor ban.
Ayon kay NCRPO Dir. Gen. Guillermo Eleazar, ang naturang bilang ay nadakip sa iba’t ibang operasyong inilunsad sa kalakhang Maynila.
Pinaka-marami aniyang naitalang lumabag sa Quezon City kung saan nasa 186 ang nahuli.
Nagsimula ang pagpapatupad ng liquor ban alas dose uno kaninang madaling araw at magtatagal hanggang alas dose ng, Lunes ng madaling araw, Mayo 13.
Ilang establisyemento sa Metro Manila nakakuha ng exemption sa liquor ban
Nakakuha ng exemption mula sa commission on elections (Comelec) ang ilang establisyemento sa Metro Manila mula sa ipinatupad na liquor ban.
Ito sa gitna ng implementasyon kaugnay sa eleksyon.
Ayon kay NCRPO Police Chief Guillermo Eleazar, nag-isyu ng exemption ang Comelec para sa mga bar na kadalasang pinupuntahan ng mga dayuhang turista.
Sakop lamang umano ng exemption ang mga dayuhan, ibig sabihin sila lamang ang maaaring bentahan ng alak.
Ngunit nilinaw ni Eleazar na paglabag pa rin sa naturang ordinansa kung magbebenta ng alak sa dayuhan kahit walang exemption notice na nakuha mula sa Comelec.
Sinopla ni Pangulong Rodrigo Duterte si reelectionist Senator Grace Poe dahil sa ginawa nitong pagtutol na maresolba ang napakatagal nang problema sa trapik sa kahabaan ng EDSA.
Ngunit ayon sa pangulo, wala naman siyang problema sakaling manalo ang senadora sa magaganap na local at national elections bukas.
Sa talumpati ng punong ehekutibo sa miting de avance ng Hugpong ng Pagbabago-Hugpong sa Tawong lungsod sa Davao City, binanggit ng presidente ang ginawang pagharang ni poe sa planong paglalaan sana ng malaking pondo para masolusyunan na ang mabigat na daloy ng trapiko sa EDSA.
Matatandaang sinabi noon ni Poe, na nangangamba siyang mauwi lamang sa kurapsyon ang malaking pondo na ilalaan para sa pagpapabuti ng sitwasyon sa EDSA.
Dahil dito, binweltahan ng pangulo ang reelectionist senator, at sinabing, puno ng malisya ang pahayag ni Poe na tila tingin nito sa sarili siya lamang ang matinong tao sa mundo.
Pahayag ng pangulo, hihingi na lamang siya ng tulong sa iba at posibleng lapitan nya ang China para dito.
Dagdag pa ni Pangulong Duterte, dahil sa ginawang pagtutol ni Poe kaya’t hanggang ngayo’y hindi parin nareresolba ang matinding problema ng trapiko sa EDSA.
Hindi umano niya nalilimutan ang kanyang pangakong sosolusyunan ang mabigat na traffic situation sa nabanggit na pangunahing lansangan pero kailangan aniya ng pera upang maisakatuparan ito lalo nat wala na aniyang libre ngayon sa mundo.
All set na ang National Capital Region Police Office (NCRPO) para siguruhin ang peace and order situation sa gaganaping 2019 midterm elections bukas.
Ayon kay NCRPO Police Maj. Gen. Guillermo Eleazar, aabot sa 16,000-strong police personnel ang ipinakalat nila sa buong Metro Manila, maliban pa aniya dito ang libu-libong police forces na nakaantabay lamang sakaling kailanganin.
Pahayag ni Eleazar, kanya nang kinansela ang lahat ng naka-leave of absence, maliban lamang sa mga may emergency reason.
Layun aniya nito na masiguro ang 100 porsyentong attendance ng mga otoridad sa iba’t ibang tanggapan at istasyon ng pambansang pulisya.
Kinumpirma naman ni Eleazar na naideliver na sa 723 polling centers ang kabuuang 8,298 vote-counting machines (VCMs) na gagamitin sa Metro Manila.
Naisagawa narin aniya ang final testing and sealing ng mga VCM at nadala na rin sa city treasurer’s office ang lahat ng official ballots na galing sa National Printing Office (NPO).
Muli namang pinaalalahanan ni Eleazar ang publiko na epektibo na kaninang alas-dose uno ng hatinggabi ang liquor ban at magtatagal hanggang hatinggabi ng May 13, election day.
Sumuko na sa otoridad kaninang umaga si Daraga, Albay Mayor Carlwyn Baldo, ang umano’y mastermind sa pagpatay kay Ako Bicol Party list Rep. Rodel Batocabe.
Ayon kay Albay Police Director Col. Wilson Asueta, sumuko ang alkalde sa Legazpi Regional Trial Court Branch 10 kung saan siya ay sinamahan ng kanyang abogado at pamilya.
Dagdag ni Asueta ikukulong si Baldo sa Legazpi City Jail at nakatakda ang arraignment sa Mayo 30, 2019.
Matatandaang naglabas ng warrant of arrest laban sa alkalde ang Legazpi RTC Branch 10 sa kasong double murder at attempted murder kay Batocabe at sa security aide nito noong Disyembre 22.
Tahasang pinangalanan ng Malakanyang ang mga nasa likod ng ‘Bikoy’ videos at black propaganda laban kay Pangulong Rodrigo Duterte.
Sa pamamagitan ng diagram, inilatag ng Palasyo ang mga personalidad at pagkaka ugnay ugnay ng mga ito para siraan ang pangulo.
Ayon kay Presidential Spokesman Salvador Panelo, kasama dito sina Antonio Trillanes, Publisher Ellen Tordesillas, Edwin Lacierda, Cocoy Dayao, Joma Sison, Arman Potejos, Rodel Jayme at iba pa.
Tinukoy din ang isang Bong Banal na siyang nagsilbing narrator sa viral video na “Ang Totoong Narcolist” batay sa initial voice recognition.
“It seem that the links between the National Union of Journalists, Alejano, Hilbay, Liberal Party, Rodel Jayme, Trillanes, Rappler, The Vera Files, Ellen Tordesillas. In other words, it is obvious that these groups have liked together to discredit the Duterte administration and to boost the candidacies of the Otso Diretso.”
(with report from Jopel Pelenio)
Hinubaran ng maskara ni Senate President Vicente “Tito” Sotto III si Peter Joemel Advincula na nagpakilalang alias Bikoy.
Sa isang press conference, inilantad ni Sotto ang sinumpaang salaysay ni Advincula nuong December 2016 na ipinadala sa kanyang tanggapan at ikinumpara ito sa pahayag ni Advincula nang dumulog ito sa Integrated Bar of the Philippines (IBP) kamakailan lang.
Ayon kay Sotto, pareho ang sinasabi ni Advincula nuong 2016 at ngayong 2019 na miyembro siya ng quadrangle syndicate.
Gayunman, makikita anya ang malaking pagkakaiba ng mga pangalang isinangkot nya nuong 2016 at sa kasalukuyan.
Binigyang diin ni Sotto na naway maging leksyon ang kaso ni Advincula sa mga grupong mabilis pumatol sa mga alegasyong nakakasira sa ibang tao.
Matatandaan na isang religious group ang nilapitan ni Advincula at sumama sa kanya para dumulog sa IBP.
Imbestigasyon kaugnay sa mga inilahad ni alias ‘Bikoy’ kinansela
Kinansela na ni Senador Panfilo Lacson ang ipinatawag nyang hearing sa Biyernes hinggil sa mga ibinunyag ni Peter Joemel Advincula alias Bikoy.
Ayon kay Lacson, pagsasayang na lamang ng panahon ang pakinggan si Advincula matapos ang mabunyag na lumapit na ito at nagsumite ng sinumpaang salaysay kay Senate President Tito Sotto nuong December 2016.
LOOK: Senador Ping Lacson kinansela ang hearing sa Senado kaugnay ng sa mga inihayag ni alias ‘Bikoy’. pic.twitter.com/cxFaCnsvwl
— DWIZ Newscenter (@dwiz882) May 8, 2019
Sa sinumpaang salaysay ni Advincula na hawak ni Sotto, mga pangalan nina dating Pangulong Noynoy Aquino, Mar Roxas, Leila de Lima, mga kongresista at lokal na opisyal ang kanyang idinawit sa illegal drug syndicate.
Samantala, sa kanyang pahayag naman sa Bikoy videos, sina Presidential Son Paolo Duterte, Atty. Mans Carpio, dating SAP Bong Go naman ang kanyang isinangkot.
Tinanggihan ng Integrated Bar of the Philippines (IBP) ang kahilingan ni Peter Joemel Advincula alias Bikoy na mabigyan ng libreng legal assistance.
Ayon sa National Center for Legal Aid (NCLA) ng IBP, nagpasya silang tanggihan si alias Bikoy matapos nilang pag aralan ang kanyang application.
Lumabas anila sa kanilang pag-aaral na hindi maaring bigyan ng libreng legal assistance si alias Bikoy batay na rin sa panuntunan na nakasaad sa NCLA Manual of Operations.
Gayunman, tiniyak ng NCLA na mananatiling confidential ang lahat ng pahayag at dokumentong ipinakita ni alias Bikoy nuong kumunsulta ito sa kanilang tanggapan.
Si alias Bikoy ay lumapit sa IBP upang humingi ng tulong na makasuhan ang mga personalidad na sinasabi nyang sangkot sa illegal drug syndicate.
Nakatakda nang simulan ng Senado ang imbestigasyon sa mga inilahad ni Pete Joemel Advincula o mas kilala bilang si alyas Bikoy sa Biyernes, May 10.
Ayon kay Senador Panfilo Ping Lacson, chairman ng Senate committee on public order and dangerous drugs, magsisimula ang pagdinig bandang alas 9:30 ng umaga.
Ani ni Lacson, arangkada ang pagdinig sa oras na matiyak ni Bikoy ang kaniyang pagdalo para patunayan ang kaniyang mga alegasyon.
Magpapadala umano ang komite ng pormal na imbistasyon kay Advincula sa pamamagitan ng Integrated Bar of the Philippines (IBP).
Si Advincula ang nagpakilalang si Bikoy na nasa “Ang Totoong Narcolist” video na kumalat sa internet.
Barbers duda kay alyas ‘Bikoy’
Duda si House Committee on Dangerous Drugs Chair Robert Barbers sa timing ng paglantad ni Peter Advincula o alyas Bikoy na nasa “Narcolist video”.
Ayon kay Barbers, malaki ang posibilidad na nais lamang ni Advincula na sirain ang mga kandidato ng administrasyon lalo’t ilang araw na lamang ay eleksyon na.
Kinuwestiyon din ni Barbers ang pag-agarang pag-prisinta sa sarili sa imbestigasyon sa Senado sa halip na sa National Bureau of Investigation (NBI) dumeretso.
Ipinagtataka rin ng opisyal kung bakit hindi agad nakipagtulungan sa mga otoridad si Advincula kung talagang may hawak itong mga ebidensya sa halip ay idinaan ang kaniyang mga paglalahad sa social media.
Dagdag pa ni Barbers, kung seguridad naman ang pinagaalala ni Advincula ay mayroon naman siyang karapatang humingi ng tulong sa Department of Justice (DOJ) para isailalim sa witness protection program.