HOT STORIES OF THE WEEK

Magsasagawa ng libreng training ang Bureau of Fisheries and Aquatic Resources (BFAR) sa darating na Abril 25 hanggang 29.

Para ito sa lahat ng fisheries technologists at professionals sa produksyon at pagpapalakas ng industriya ng bangus sa bansa na magaganap via zoom.

Ayon sa BFAR, layon ng pagsasanay na paghusayin pa ang kaalaman sa operasyon, pamamahala, at mga kasanayan sa produksyon ng mga lalahok.

Para sa mga interesado, maaaring magparehistro sa pamamagitan ng link na makikita sa post ng BFAR-Central Office.

Magiging first-come, first served basis ang pagpaparehistro. —sa panulat ni Abby Malanday

Ikinokonsidera ng Department of Health o DOH ang mungkahing mandatory COVID-19 booster para makapasok ng mga establisimyento.

Ayon kay health undersecretary Myrna Cabotaje, pinag-aaralan nila ang posibilidad na pagsama ng booster shot bilang bahagi ng primary inoculation series.

Matatandaang nirekomenda ni presidential adviser for entrepreneurship Joey Concepcion ang naturang booster sa mga magtutungo sa gusali sa ilalim ng Alert level 1.

Patay ang isang political vlogger sa Manay, Davao Oriental matapos itong barilin sa ulo ng hindi pa nakikilalang suspek.

Kinilala ang biktima na si Danilo Lumikid Jr.

Ayon sa Regional Police Office, minamaneho ng biktima ang kanyang motorsiklo sa National Highway mula sa sentro ng bayan nang barilin siya sa ulo.

Sa ngayon ay naghahanap pa sila ng posibleng witness sa nangyaring pamamaril, ngunit posible umanong sakay din ng motorsiklo ang suspek.

Samantala, nagsagawa na ng checkpoint ang mga kapulisan sa boundary ng kalapit na mga bayan habang pinaghahanap na ng ilang police team ang suspek. —sa panulat ni Mara Valle

Handa si Pangulong Rodrigo Duterte na ipatigil ang operasyon ng e-sabong kapag napatunayang talamak na sa pagkalulong ang mga Pilipino sa nabanggit na sugal.

Ayon sa punong ehekutibo, kapag napatunayang lulong sa sugal mga Pinoy, ay ipapatigil niya ang operasyon ng e-sabong.

Ito ay sa kabila ng nauna nang pahayag ng pangulo na malaking halaga ng pera ang inaakyat ng e-sabong sa gobyerno lulan ng kanilang binabayarang buwis.

Nabatid na umaabot ng bilyon-bilyong piso ang nakukuhang buwis sa e-sabong sa isang taon kaya may nagagamit sa mga gastusing pang-serbisyo ng gobyerno. —sa panulat ni Mara Valle

Doble-kayod na ang DTI para pangasiwaan ang pagpasok ng Space X o Space Exploration technologies corporation sa bansa para magbigay ng internet service.

Kasunod na rin ito nang pagmamalaki ng DTI na ang Pilipinas ang kauna-unahan sa southeast asia na mag-a-avail ng Starlink, ang low earth orbit satellite network constellation ng Space X.

Ang nasabing technology ay magbibigay ng high speed satellite broadband connectivity sa mga customer partikular sa mga malalayong lugar na hindi pa naaabot ng komunikasyon.

Sa kasalukuyan ay bumubuo na ang Starlink ng local Filipino entity na siyang magiging wholly-owned subsidiary at target nitong mag-deploy ng tatlong gateways sa first phase ng launching.

Tiwala si Lopez na ang Space X/Starlink sa bansa ay magiging susi sa mas mabilis na broadband speed, mas magandang connectivity at capacity para sa telecommunications services at mas murang rates para sa customers.

Ikinababahala ng ilang eksperto ang posibilidad ng pagtaas ng kaso ng COVID-19 sa susunod na dalawa hanggang tatlong buwan.

Ito’y kasunod ng election period, Semana Santa, at mababang vaccination turnout sa bansa.

Sinabi ni Dr. Rontgene Solante, infectious diseases expert na hindi malayong maging superspreader event ang mga pangangampanya at pagdagsa ng mga tao sa iba’t ibang bakasyunan.

Ayon pa kay Solante, naobserbahan din nila na marami na sa ating mga kababayaan ang hindi nagsusuot ng face mask.

Dahil dito, hinimok ni Solante ang publiko na ‘wag magpakampante at magpa-booster shot na para madagdagan ang immunity at proteksyon laban sa COVID-19.

Itinanggi ni presidential aspirant at dating senador Ferdinand “Bongbong” Marcos, Jr. ang issue na kaya lamang ito kuma-kandidatong pangulo ay para maiwasan ng kanyang pamilya ang pagbabayad ng buwis.

Tugon ito ng Partido Federal standard bearer sa akusasyon ng kanyang kapwa kandidatong si Senador Manny Pacquiao na ma-a-abswelto ang pamilya Marcos sa mga kasong kinakaharap kung magiging presidente si BBM.

Magugunitang sinisingil na ng Bureau of Internal Revenue (BIR) ang pamilya marcos sa utang na 203 billion peso Estate Tax.

Una nang nanindigan ang kampo ni Marcos na ginagamit lamang ang isyu ng Estate Taxes sa pamumulitika ngayong halalan.

Nilinaw naman ni Partido Federal ng Pilipinas General Counsel, Atty. George Briones na 23 billion pesos lamang ang halaga ng Estate Tax sa halip na 203 billion pesos dahil “subject for reconciliation” pa at hindi pa pinal ang ruling sa penalties at surcharges.

Mananatili sa alert level 1 ang malaking bahagi ng bansa, kabilang ang National Capital Region (NCR) hanggang Abril 15.

Ito’y matapos aprubahan ng Inter-Agency Task Force (IATF) ang alert level classification sa mga lalawigan, highly urbanized at independent component cities.

Bukod sa NCR, kabilang din sa mga isinailalim sa alert level 1 ang Abra, Apayao; Ilocos Norte, Dagupan City; Batanes, Cagayan, Isabela; Aurora, Bataan, Zambales, Olongapo City;

Cavite, Laguna, Rizal; Oriental Mindoro, Marinduque; Albay, Catanduanes; Aklan, Guimaras; Siquijor, Cebu City, Biliran, Ormoc City; Zamboanga City; Camiguin, Bukidnon; Davao City; Surigao Del Sur, Surigao City at Butuan City.

Sa ilalim ng alert level 1, pinapayagan na ang lahat ng edad at may comorbidities sa intrazonal at interzonal travel.

Ang lahat ng mamamayan o establisyimento ay pinapayagan na ring mag-operate, magtrabaho o magsagawa ng buong on-site activity at seating capacity kung na-aayon sa pinakamababang pamantayan sa kalusugan ng publiko.

Hindi malayong kumalat ngayong taon ang bagong COVID-19 variant na mas nakahahawa at peligroso sa Omicron.

Ito ang isa sa mga nakikitang scenario ng World Health Organization (WHO) sa gitna ng mga panibagong COVID-19 surge na naitatala sa ilang bansa gaya sa China, Canada at South Korea.

Gayunman, sa ikalawang scenario ay nilinaw ng WHO na maaari rin namang humina ang virus dahil sa lumalakas na immunity ng publiko.

Para naman sa ikatlong scenario, maaari ring sumulpot ang isang panibagong variant pero mas mahina na ito at kahit hindi na kailanganin ng boosters o bagong formulations ng bakuna.

394 na Filipino na ang na-repatriate mula Ukraine sa gitna ng nagpapatuloy na paglusob ng Russia.

Kinumpirma ni Foreign Affairs Undersecretary for Migrant Workers’ Affairs Sarah Lou Arriola na nakalabas na sa danger zones ang mga naturang pinoy hanggang nitong Marso 29.

Kabilang sa mga naka-alis na ng Ukraine noong linggo ang tatlumpung seafarers na mula sa MV Ithaca Prospect, MV Filia Joy at MV Nord Virgo.

Simula Marso 7, ipinatupad ng Department of Foreign Affairs ang alert level 4 sa Ukraine o nangangahulugang mandatory na ang evacuation.