Isang bangkay ng Filipina ang nadiskubre sa loob ng maleta na iniwan sa ilalim ng tulay sa Dubai, United Arab Emirates.
Ayon kay Philippine Consul General to Dubai Renato Duenas Junior, sinakal ang Pinay batay sa post-mortem examination.
Hindi naman pinangalanan ni Duenas ang biktima dahil na rin sa hiling ng pamilya nito maging ang suspek na naaresto na agad ng mga otoridad.
Nakikipag-ugnayan na ang Philippine Embassy sa Abu Dhabi sa pamilya ng Pinay sa gitna ng nagpapatuloy na imbestigasyon.
Sisimulan nang ipakalat ngayong araw ng National Capital Region Police Office (NCRPO) ang nasa 11 libong Pulis sa iba’t ibang panig ng Metro Manila.
Ito’y para tiyakin ang seguridad para sa tahimik, maayos at mapayapang pagguita ng mga Katoliko sa Semana Santa habang long weekend naman ito para sa iba.
Ayon kay NCRPO Spokesperson, P/LtCol. Jenny Tecson, inatasan na ni NCRPO Director, P/MGen. Felipe Natividad ang lahat ng District Directors nito na gawin ang ibayong hakbang para sa okasyon.
Partikular aniya rito ang paglalatag ng help desk sa mga places of convergence tulad ng mga Terminal ng Bus, mga Paliparan at Pantalan maging sa mga Simbahan at Mall gayundin sa iba pang mga pook pasyalan.
Dahil dito, pinapayuhan ng NCRPO ang publiko na planuhing maigi ang kanilang pagbabakasyon at tiyaking susunod sa mga itinakdang minimum health protocols kontra COVID 19. —sa ulat ni Jaymark Dagala (Patrol 9)
Pinangunahan ng Pangulong Rodrigo Dutere ang pagsasapubliko ng 1,000 banknotes na gawa sa polymer.
Ang ceremonial program na isinagawa sa Malakaniyang ay dinaluhan ng mga opisyal ng Department of Finance (DOF) at Bangko Sentral ng Pilipinas (BSP).
Ipinabatid ng BSP na darating sa buwang ito mula sa Australia ang unang batch ng Philippine Peso Banknotes na gawa sa polymer at sisimulang ipapakalat sa kalagitnaan ng taong ito.
Una nang isinulong ng BSP ang paggamit ng polymer dahil mas magbibigay ito ng proteksyon laban sa virus at bacteria at uubra ring i-sanitize ng hindi ito sinisira.
Posibleng maging maulan ang Semana Santa sa susunod na linggo.
Ito ayon sa PAGASA ay dahil sa pagpasok ng isang bagyo na mino-monitor nila ngayong nasa mahigit 200,000 kilometro Silangan ng Mindanao.
Sinabi ng PAGASA na inaasahang papasok sa Lunes ang nasabing tropical depression na kapag naging bagyo ay tatawaging ‘Agaton’.
Samantala, dapat pa ring asahan ang maulap na panahon na may kalat-kalat na pag-ulan at pagkulog ngayong Huwebes sa Visayas, Mindanao, MIMAROPA, Bicol at lalawigan ng Quezon dahil sa Low Pressure Area (LPA) na nakapaloob sa Inter-Tropical Convergence Zone (ITCZ).
Inanunsyo ng Miss Universe Philippines (MUPH) Organization ang pangalan ng mga kandidatang nanguna sa interview challenge nito.
Pasok sa Top 4 sina Julia Saubier ng Albay, Jeanne Nicci Orcena ng Davao Del Norte, Aidyl Mhay Sanchez ng Guiguinto, Bulacan, at Vanessa Ann Caro ng Iloilo Province.
Una rito, ay inanunsyo ng MUPH ang mga nagwagi sa iba pang mga challenge kung saan nanalo sa headshot challenge si Isabel Luche ng Mandaue City at nanguna naman sa introduction challenge si Pauline Amelincx ng Bohol.
Wagi naman si Ma. Katrina Llegado ng Taguig sa swimsuit challenge habang nasungkit naman ni Ghenesis Latugat ng Baguio City ang fashion at runway challenge.
Bubuksan na sa publiko ngayong araw ng Department of Public Works and Highways ang Binondo – Intramuros bridge, sa Maynila.
Ayon kay DPWH undersecretary Emil Sadain, “all systems go” na ang ahensya para sa ceremonial launching ng tulay na inaasahang magpapaluwag sa daloy ng trapiko sa lungsod, maging sa Metro Manila.
Mas magiging mabilis na rin anya ang pagbiyahe mula at patungong Binondo at Intramuros na pinaka-sentro ng kalakalan sa Maynila at inaasahang nasa 30,000 motorista ang makikinabang kada araw.
Samantala, inaasahang pangungunahan ni Pangulong Rodrigo Duterte ang pagpapasinaya sa Binondo-Intramuros bridge.
Tiniyak ng Department of Foreign Affairs ang tulong sa apat na Filipinong inaresto at nakakulong sa Australia dahil sa pagdadala ng malaking bulto ng cocaine.
Ayon sa Department of Foreign Affairs, nakausap na ng mga kinatawan mula sa Philippine Consulate General ng melbourne at Philippine embassy sa Canberra ang apat na tripulanteng Pinoy.
Nakikipag-ugnayan na rin ang Philippine Overseas Labor Office (POLO) sa Canberra sa shipping o manning agency ng cyprus-flagged bulker vessel na kypros bravery.
Samantala, hiniling din ng mga naturang pinoy sa australian authorities na makausap ang kanilang pamilya.
Humaharap sa mga paglilitis ang apat at maaaring hatulan ng habambuhay na pagkaka-kulong sakaling mapatunayang nagkasala.
Apat na Filipino seafarers ang nasakote sa pagdadala umano ng 416 kilos ng cocaine sa Australia.
Kinilala ng Australian authorities ang mga Pinoy na sina Ian Gelan Dizon, Alcris Dente Mabini, Mark Torrenueva Enriquez at Angelito Devalaque Balansag.
Kinumpirma naman ng Department of Foreign Affairs na kabilang ang apat na Pinoy sa crew ng cyprus-flagged bulker vessel na Kypros Bravery na dumaong sa Adelaide City.
Nakausap na rin ng Philippine Consulate General sa Melbourne ang mga nasabing tripulante na kasalukuyang nakapiit at nasa maayos na kalagayan.
Dumalo na rin sa hearing sa port Adelaide Magistrates court noong Abril 1 ang mga Filipino crew.
Nahuli ang apat na tripulante na nagtatapon umano ng mga bloke ng cocaine sa karagatan ng South Australia noong Marso 15.
Nagkakahalaga ng 166 million dollars ang mga nasabat na cocaine, na pinaka-malaking bulto ng ilegal na drogang nakumpiska sa South Australia.
Mahigit isang milyong manggagawa ang kinakailangan ngayon sa bansang Canada.
Ito’y para matugunan ang seryosong labor shortage sa pagbagsak ng birth rates sa paglipat ng mga kabataang Canadian sa mga trabahong mas malaki ang sweldo.
Dahil dito, pumasok ang Pilipinas sa isang bilateral labor agreement sa ilang probinsiya sa Canada tulad ng Ontario, Quebec at Alberta kung saan libo-libong OFWs ang naninirahan doon mula pa taong 2004.
Binigyan ng permiso ng Ottawa ang ilang probinsiya sa nasabing bansa na kumuha ng temporary foreign workers hanggang 2024 at malaki ang lamang ng mga Pilipino na pumasok sa mga trabahong ito.
Samantala, binigyan ng Philippine Overseas Employment Agency (POEA) ng akreditasyon ang ilang licensed recruitment agencies para sa libo-libong trabaho sa Canada, at sa ilalim ng recruitment ng mga ahensyang ito ay walang hihingin na placement fee.
Hinimok ng Philippine Economic Zone Authority (PEZA) ang mga Information Technology-Business Process Outsourcing (IT-BPO) companies at iba pang PEZA-Registered Locators na mag-apply para sa 70-30 hybrid work arrangement.
Ang hybrid work arrangement ang nagpapahintulot sa ilang mga empleyado na magwork-from-home sa gitna ng COVID-19 pandemic.
Ayon kay PEZA Director General Charito Plaza, para mag-avail ng 70-30 work scheme, kailangang mangatwiran ng mga kumpanya kung bakit nila ito kailangang gawin.
Suportado naman ni Plaza ang hybrid work scheme na tulong na rin sa mga empleyado sa gitna ng taas-presyo sa langis.
Una nang ni-reject ng Fiscal Incentives Review Board ang panawagang extension ng 90-10 ratio na pabor sa work-from-home.
Dahil dito, obligado nang pumasok on-site ang mga empleyado na nagsimula nitong Abril 1. —sa panulat ni Abby Malanday