HOT STORIES OF THE WEEK

Nagbabala si National Task Force o NTF against COVID-19 medical adviser Dr. Ted Herbosa sa posibleng surge sa kaso ng COVID-19 sa susunod na dalawang buwan.

Ito aniya ay dahil sa malalaking kaganapan tulad ng Halalan, Ramadan at mahal na araw.

Paliwanag pa niya na sa kabila ng pagbaba ng COVID-19 cases ay hindi imposible ang muling pagsirit ng kaso ng nasabing sakit.

Umaasa naman si Herbosa na hindi na bumalik ang mataas na bilang ng COVID-19 cases dahil sa high vaccination rate ng Metro Manila maliban na lamang sa ilang lugar na nananatiling mababa ang inoculation coverage.—sa panulat ni Airiam Sancho

UMARANGKADA na ang “Oplan Harabas” ng Inter-Agency Council for Traffic o I-ACT at iba pang ahensya bilang bahagi ng kanilang kampanya laban sa “drunk and drugged driving.”

Sa isang social media update, binanggit ng I-ACT na nasa 296 drivers ang sumalang sa random drug tests at alcohol breath analyzer tests sa mga terminal sa SM Mall of Asia at Parañaque Integrated Terminal Exchange o PITX.

Ayon sa council, anim ang nagpositibo sa ipinagbabawal na droga habang isa ang lango sa alak at isa naman ang tumangging sumailalim sa test.

Dalawa naman sa 33 Public Utility Vehicles (PUV) ang bumagsak sa safety inspection tests.

Naging katuwang ng I-ACT sa malawakang operasyon ang Philippine Coast Guard, Land Transportation Office, Land Transportation Franchising and Regulatory Board o LTFRB, Metropolitan Manila Development Authority, Philippine National Police, at PDEA.

Tiniyak ng LTFRB na maayos ang pasilidad ng mga terminal sa bansa kasabay ng pagdagsa ng mga pasaherong uuwi ng probinsya ngayong Semana Santa.

Kasunod ng pagpupulong ng LTFRB sa mga kinatawan ng LTO, MMDA, I-ACT, PNP-HPG, at mga LGUs sa Metro Manila, sinimulan na ang paghahanda sa ‘Oplan Biyaheng Ayos: Semana Santa’ na magsisimula sa April 8 hanggang April 18.

Dahil dito, agad pinaigting ang seguridad sa mga terminal kung saan bubuhos ang mga pasaherong uuwi sa kani-kanilang probinsya.

Naglagay na ng Malasakit Help Desks na gagabay sa mga pasaherong bibiyahe ngayong Semana Santa.

Base sa inilabas na Memorandum Circular No. 2021-051, ang mga sumusunod na Integrated Terminal Exchange ang pinapayagan na magbaba at magsakay ng mga pasahero:

• North Luzon Expressway Terminal (NLET)
• Paranaque Intergrated Terminal Exchange (PITX)
• Santa Rosa Integrated Terminal (SRIT)
• Araneta Center Terminal

Pinapayagan ang mga provincial bus na gamitin ang kanilang private terminal base sa window scheme na ipinatupad ng MMDA mula alas-10 ng gabi hanggang alas-5 ng umaga. —sa panulat ni Abby Malanday

Nagsampa ng reklamo ang executive ng Pharmally na si Mohit Dargani Laban sa isang huwes ng Court of Appeals (CA).

Dahil ito  sa umano’y hindi nararapat na pagkaantala sa pagresolba ng kanyang petisyon, na kumukuwestiyon sa gitna ng isyu ng pagbili ng gobyerno ng mga kagamitan sa gitna ng pagtugon sa COVID-19.

Sa nasabing reklamo, hinimok ang Judicial Integrity Board, na magpataw ng Administrative Sanctions kay CA Associate Justice Apolinario Bruselas Jr.

Nilabag kasi ng mahistrado ang New Code of Judicial Conduct for the Philippine Judiciary, na mabuting pagganap ng kanilang tungkulin.

Si Dargani at ang kapwa opisyal ng Pharmally na si Linconn Ong ay inilipat sa Pasay City Jail noong Nobyembre 2021, matapos silang i-contempt ng Senate Blue Ribbon Committee dahil sa pagtanggi na sagutin ang mga tanong.

Bahagyang nalutas ang usapin noong Marso 1 nang i-dismiss ng CA ang pakiusap ni Twinkle para sa pagiging Moot and Academic dahil pinalaya siya mula sa detensyon para sa humanitarian reasons noong Enero 11. —sa panulat ni Abby Malanday

Sinang -ayunan ni health secretary Francisco Duque III  ang panukala ni presidential adviser on entrepreneurship Joey Concepcion na i-require ang booster cards sa pagpasok sa mga enclosed establishment.

Ayon kay Duque, tatalakayin ang naturang panukala sa gagawing pagpupulong ng Inter-Agency Task Force for the Management of Emerging Infectious Diseases o IATF-MEID sa Martes, April 12.

Magugunitang  iminungkahi ni Concepcion sa gobyerno na i-require ang COVID-19 booster cards simula sa Hunyo para mapataas ang bilang ng mga magpapa-booster sa bansa.

Inilatag na rin ng Land Transportation Franchising and Regulatory Board (LTFRB) ang kanilang mga preparasyon para sa inaasahang pagdagsa ng libu-libong pasahero ng public utility vehicle sa Semana Santa.

Ayon kay LTFRB Executive Director Tina Cassion, partikular na tututukan sa ilalim ng “Oplan Biyaheng Ayos: Summer Vacation 2022” ang seguridad sa iba’t ibang bus at integrated terminal sa bansa.

Sinimulan na rin anya nilang inspeksyunin ang mga terminal bilang bahagi ng safety protocol.

Samantala, sasailalim din sa road worthiness check ang mga unit ng mga public utility vehicle, simula ngayong araw.

Halos 2,700 personnel ang idedeploy ng MMDA iba’t ibang pangunahing kalsada, transport hub at simbahan sa National Capital Region.

Ito’y bilang bahagi ng “Oplan Metro Alalay Semana Santa 2022” upang matiyak ang kaligtasan ng publiko sa inaasahang Holy Week Exodus.

Ayon kay MMDA Chairman Romando Artes, ide-deploy ang mga nasabing personnel simula ngayong araw hanggang Abril 18.

Tutukan anya ng kanilang mga tauhan ang mga entry at exit points gaya ng North Luzon Expressway, South Luzon Expressway, Coastal Road, McArthur Highway, Mindanao Avenue at A. Bonifacio Avenue.

I-aassign din ang mga traffic enforcer at iba pang personnel sa mga simbahang madalas puntahan tulad ng Baclaran sa Parañaque City; Sto. Domingo sa Quezon City, San Agustin sa Intramuros at Quiapo Church sa Maynila.

Nagdeklara naman ang ahensya ng “no day-off at no absent policy” para sa lahat ng traffic at field personnel ngayong inaasahan na ang pagbigat ng daloy ng trapiko.

Ilalarga na ng Regional Tripartite Wages and Productivity Board (RTWPB) sa Eastern Visayas ang serye ng public consultations para sa hirit na dagdag-sahod sa mga manggagawa sa pribadong sector.

Ayon kay Reynaldo Soliveres, Secretary ng RTWPB-Eastern Visayas, matapos ang mga konsultasyon ay magkakaroon ng deliberasyon hinggil sa socio-economic indicators sa rehiyon.

Isasagawa anya ang public consultation sa Macrohon, Southern Leyte sa Abril 22 na dadaluhan ng mga employer at manggagawa.

Simula naman Abril 27 hanggang Mayo 23 ay magsasagawa ng konsultasyon sa Ormoc City para sa Western Leyte; Borongan City, Eastern Samar; Calbayog City, Samar; Catarman Northern Samar at Tacloban City, Leyte.

Bago matapos ang Mayo ay tiniyak ni Soliveres na magkakaroon na sila ng desisyon sa hirit na dagdag-sahod.

Una nang hiniling ng Solidarity of Unions in the Philippines for Empowerment and Reforms na itaas sa 750 pesos ang arawang sahod ng mga manggagawa sa pribadong saktor sa rehiyon mula sa kasalukuyang 325 pesos.

Aabot sa 101 million pesos na halaga ng mga smuggled agricultural product ang winasak ng Bureau of Customs (BOC) sa Pampanga.

Kabilang sa mga iligal na produktong sinira ang mga sibuyas, carrots, isda at iba pang seafoods na nadiskubre sa loob ng 14 na 40-footer container vans.

Ayon kay Port of Subic District Collector Maritess Martin, nakapangalan ang mga naturang kontrabando sa iba’t ibang consignees, kabilang ang Zhenpin Consumer Goods Trading, Gingarnion Agri Trading at Schnellwert OPC.

Dumating ang mga smuggled products sa bansa noong December 2020, June at December 2021 at nasabat ng Port of Subic dahil sa paglabag sa iba’t ibang administrative orders at circular ng Department of Agriculture (DA).

Tiniyak naman ni Martin na patuloy ang pagbabantay ng Port of Subic upang mapigilan ang pagpasok sa bansa ng mga smuggled product.