HOT STORIES OF THE WEEK

Limang opisyal ng gobyerno ang kabilang sa listahan ng National Intelligence Coordinating Agency (NICA) ng mga sinasabing protektor at smuggler ng agricultural products sa bansa.

Ito ang ibinunyag ni NICA Director Edsel Batalla sa pagdinig ng Senate Committee of the whole.

Gayunman, aminado si Batalla na hindi pa nila maisasapubliko ang mga pangalan dahil may validation processing pa at itatanong pa rin nila sa kanilang superior kung maaari itong ibigay sa mga senador.

Sa gitna ng pagdinig ng senado, tinanong ni Senator Koko Pimentel si Batalla kung kailan pa nila hawak ang listahan at gaano katagal ang kanilang validation.

Tugon naman ni Batalla, kamakailan lang nila nakuha ang mga impormasyon mula sa Special Task Group on Economic Intelligence at limitado lamang ang kanilang impormasyon na nakakuha kaya’t kailangan nilang magsagawa ng puspusang imbestigasyon. —ulat mula kay Cely Ortega Bueno (Patrol 19)

Isinapubliko na ni Senate President Tito Sotto ang natanggap nilang mga pangalan ng mga sangkot umano sa smuggling ng agricultural products.

Sa pagdinig ng Senate Committee of the whole, tinukoy ni Sotto ang mga umano’y smuggler ng produktong agricultural na sina Manuel Tan, na nag-o-operate sa Subic, Cagayan de Oro at Batangas;

Andrew Chang ng Subic, MICT at Batangas; Leah Luz Cruz, Onion Queen ng MICP at Cagayan De Oro at Jun Diamante, Agri-Fisheries sa Cagayan De Oro.

Nang itanong ni Sotto kay National Intelligence Coordinating Agency Director Edsel Batalla kung nasa kanilang listahan ang mga nabanggit na pangalan, kinumpirma ng NICA Head na kasama ang apat.

Ayon kay Batalla, mahigit 20 ang nasa kanilang listahan ng mga suspected Smuggler o sangkot sa smuggling ng agricultural products.

Gayunman, itatanong umano ni Batalla sa kanilang principal kung maaari niyang isumite sa kumite ang kanilang listahan dahil nasa proseso pa sila ng validation.

Inihayag naman ni Bureau of Customs Commissioner Rey Leonardo Guerrero na pamilyar na sa kanila ang ilan sa pangalan na binanggit ni Sotto pero ang iba ay ngayon lang niya narinig kaya’t iba-validate pa ang listahan.  —ulat mula kay Cely Ortega Bueno (Patrol 19)

Patuloy ang pagdagsa ng mga pasahero sa Parañaque Integrated Terminal Exchange (PITX).

Kahapon, pumalo na sa mahigit 60K ang naitalang bilang ng mga pasaherong uuwi sa kanilang probinsya kasabay ng paggunita ng Semana Santa.

Ayon sa pamunuan ng PITX umaga palang kasi, ay nagsimula ng dumagsa ang mga pasaherong magbabakasyon ngayong Holy Week.

Fully booked narin ang mga biyahe patungong Bicol hanggang bukas, Abril a-14 maging ang mga biyahe sa Baguio City at Quezon Province. —sa panulat ni Angelica Doctolero

Nasa 20 bansa pa sa buong mundo ang mababa sa 10% ang pagbabakuna kontra COVID-19.

Ayon kay Kate O’brien, Vaccines Chief ng World Health Organization (WHO), karamihan sa mga bansang ito ay African countries na bigong maabot ang vaccination target.

Bumaba naman ang bilang mula sa 34 noong Enero.

Sa ngayon, sa kabila ng mababang datos ay umaasa ang WHO na mapapaigting pa ang programa, dahil hindi naman problema ang suplay ng mga COVID-19 vaccines.

Isinisi ni Pangulong Rodrigo Duterte sa pagkalat ng mga maling impormasyon ang mababang vaccination rate sa ilang bahagi ng bansa, partikular sa Bangsamoro Autonomous Region in Muslim Mindanao.

Aminado si Pangulong Duterte na problema ng gobyerno ang pagkalat ng mga maling impormasyon lalo sa social media.

Partikular na tinukoy ng Pangulo ang CPP-NPA na nagkakalat ng fake news o disinformation hinggil sa COVID-19 response ng pamahalaan.

Nagpakalat na ng kanilang Humanitarian and Disaster Relief Operations personnel ang Philippine Army para tumulong sa mga sinalanta ng Bagyong Agaton.

Ayon kay Army Spokesman, Col. Xerxes Trinidad, sa pangunguna ng 8th Infantry Division, tinututukan nila ang mga lugar ng Leyte at Southern Leyte na siyang nakaranas ng mga landslide dulot ng walang patid na pag-ulan.

Kabilang na aniya rito ang Baybay City kung saan may napaulat na mga nasawi at nawawala, gayundin sa bayan ng Hilongos sa Leyte maging sa Liloan, Southern Leyte.

Una nang nagpakalat ng Disaster Response teams ang Army sa Davao City at mga karatig lalawigan nito dahil din sa malakas na buhos ng ulan nuon pang isang linggo, bago maging ganap na Tropical Storm ang bagyong Agaton. —sa ulat ni Jaymark Dagala (Patrol 9)

Umabot na sa 874,000 halaga ng agrikultura ang nasira sa SOCCSKSARGEN at Bangsamoro, bunsod ng pananalasa ng bagyong Agaton.

Ayon sa National Disaster Risk Reduction and Management Council (NDRRMC), sa kabuuang 52 kabahayang nasira, 49 dito ang partially at tatlo ang totally damaged na nagmula sa Central Visayas, Northern Mindanao at CARAGA.

Nakapagtala naman ang NDRRMC ng 195 insidente ng pagbaha, 13 landslides, anim na flash floods at isang pag-apaw ng ilog.

Nasa labing-anim na kalsada at apat na tulay ang hindi madaanan dahil sa baha.

Sa ngayon, dalawang lugar na sa bansa ang nawalan ng kuryente dahil sa bagyo.

Mahigit 1,800 biyahero ang stranded sa mga pantalan sa buong bansa dahil sa bagyong Agaton.

Ayon kay Philippine Coast Guard (PCG) Commandant Admiral Artemio Abu, nasa mga pantalan ng Bicol, Eastern Visayas, at Northeastern Mindanao ang 1,813 na stranded na pasahero.

Patuloy aniyang minomonitor ng PCG ang mga pantalan sa Liloan, San Ricardo, Ormoc, Isabel, Bato, Sta. Clara, Dapdap, Daram, at Naval sa Eastern Visayas; Surigao, Lipata, Nasipit,  at Placer sa Northeastern Mindanao; at Matnog sa Bicol.

Sinabi pa ni Abu na imo-monitor ng PCG ang posibleng pagdagsa ng mga pasahero kapag nagpatuloy na muli ang mga operasyon.

Ibinaba na ng PHIVOLCS sa level 2 mula sa level 3 ang alert status ng Taal Volcano.

Ito, ayon sa PHIVOLCS, ay makaraang humina na ang pag-aalburoto ng Taal sa nakalipas na linggo.

Nabawasan na rin ang naitatalang volcanic degassing at volcanic earthquake sa main crater ng bulkan.

Mula Marso 26, 86 na volcanic earthquakes na may mahihinang magnitude na lamang ang naitala sa Taal habang wala na ring seismic activity.

Wala pang nakabinbing order na COVID-19 vaccines mula sa mga vaccine manufacturer ang Pilipinas.

Ito ang inihayag ni Department of Health Undersecretary Maria Rosario Vergeire kasunod ng panawagan ng mga senador na ipatigil pansamantala ang pagbili ng bakuna dahil sa oversupply.

Paliwanag ni Vergeire, kasalukuyan pa rin kasing pinag-aaralan ng pamahalaan ang imbentaryo ng bakuna para alamin ang pangangailangan ng bansa.

Kailangan din muna nila aniyang rebyuhin ang supply at demand ng mga bakuna.

Nabatid na nakatakdang ma-expire sa susunod na tatlong buwan ang nasa 27 milyong doses ng COVID-19 vaccine sa bansa sakaling hindi pa ito magamit.

Samantala, paglilinaw pa ni Vergeire na ang mga bakunang darating sa bansa sa susunod na linggo ay donasyon ng ibang bansa at hindi binili ng pamahalaan.—sa panulat ni Abie Aliño-Angeles