Nilinaw ni House Prosecutor at Bicol-Saro Party-list Rep. Terry Ridon na walang epekto sa nakatakdang impeachment trial ni Vice President Sara Duterte ang 2025 unmodified opinion na ibinigay ng Commission on Audit sa Office of the Vice President.
Ayon kay Cong. Ridon, nangangahulugan ang naturang audit opinion na maayos ang presentasyon ng OVP sa kanilang financial reports at pagsunod sa mga umiiral na accounting standards.
Gayunman, iginiit ng kongresista na maaari pa ring magkaroon ng unmodified opinion kahit may iba pang mga natukoy ang COA, kabilang ang mga notice of disallowance na may kaugnayan sa paggasta ng isang ahensya sa mga nakalipas na taon.
Binigyang-diin ni Cong. Ridon na nananatiling dapat sundin ni Vice President Duterte ang utos ng COA na isauli ang nasa 448 million pesos na confidential funds na naging bahagi ng mga naunang audit findings ng komisyon.
—sa panulat ni Jordan Gutierrez
