HOT STORIES OF THE WEEK

Hindi na muna ibibigay ng Commission on Elections o Comelec sa Smartmatic Philippines ang P90-M kabayaran sa kontrata para sa Eleksyon 2022.

Ito ay matapos mapaulat ang umano’y data breach na konektado, sa isa sa mga kontraktuwal na empleyado ng Smartmatic.

Ayon kay Comelec Chairman Saidamen Pangarungan, hindi pa niya nilalagdaan ang pagpapalabas ng bayad sa Smartmatic dahil kailangang malinaw muna ang isyu.

Gayunman, tiniyak ni Pangarungan na agad ilalabas ang bayad oras na mapatunayang inosente ang empleyado.

Noong May 2022, unang ini-award ng Comelec sa Smartmatic USA corporation at local na Smartmatic Philippines ang pag-provide ng elections software na magagamit sa Eleksyon 2022.

Umapela si Health Secretary Francisco Duque III sa publiko na gamitin ang World Immunization Week para magpa bakuna laban sa ibat ibang sakit.

Partikular na hinimok ni Duque na magpa bakuna mula April 24 hanggang 30 ang mga sanggol, buntis at mga matatanda.

Binigyang diin ni Duque na magandang pagkakataon ang pagpapa bakuna hindi lamang para humaba ang buhay kundi para magkaruon din ng malusog na pamumuhay.

Iginiit ni Duque na ligtas at epektibo ang mga bakuna na libreng makukuha mula sa health centers.

May posibilidad na tumaas muli ang kaso ng COVID-19 bunsod ng pagtaas ng mobility ng publiko.

Ito, ayon kay Dr. Ted Herbosa, Medical Adviser ng National Task Force against COVID-19, sa panayam ng DWIZ, kaya’t binigyang diin nito ang tamang pagsusuot ng face mask upang maiwasan ang hawaan ng Covid-19.

Maliban dito, sinabi pa ni Herbosa na bumaba rin ang COVID-19 testing output ng bansa.

Hinimok ng Department of Tourism (DOT) ang mga kinauukulan, na magsagawa ng nararapat na aksyon laban sa lokal na pamahalaan ng Malay sa Aklan.

Ito ay matapos lumagpas umano ang bilang ng mga turistang dumating sa Boracay noong Holy Week, mula sa dapat na limit nito.

Ayon kay tourism secretary Bernadette Romulo-Puyat, mali ang ginawa ng lokal na pamahalaan dahil mahigpit pa ring dapat ipatupad ang restriksyon laban sa COVID-19.

Nabatid na mula sa 19,215 limit ng turistang bibisita sa boracay, tumaas pa ito sa 21,252 at 22,519 noong April 14 at 15.

Ipapaubaya naman ng DOT ang pagbibigay ng parusa sa Department of the Interior and Local Government (DILG) at Department of Environment and Natural Resources (DENR).

Sa ngayon, wala pang sagot ang lokal na pamahalaan ng Malay hinggil sa isyu.

Eksaktong tatlong linggo bago ang May 9 elections, patuloy ang pamamayagpag ni presidential frontrunner, dating senador Bongbong Marcos sa pre-election survey ng OCTA Research Group.

Sa tugon ng masa survey noong April 2 hanggang 6, humakot ng 57% preference votes si Marcos mula sa 1,200 respondents.

Kumpara ito sa 55% na nakuha ni BBM noong February 12 hanggang 17 survey.

Pinaka-malaki naman ang inilundag ng puntos ni Vice President Leni Robredo na 22% kumpara sa 15% noong Pebrero.

Sinundan siya ni Manila City Mayor Francisco “Isko Moreno” Domagoso, 9% mula sa dating 11%; Senator Emmanuel “Manny” Pacquiao, 7% kumpara sa 10% at Senator Panfilo “Ping” Lacson, 4% kumpara sa 3% noong Pebrero.

Nangulelat sina dating presidential spokesman Ernesto “Ernie” Abella, 1%; negosyanteng si Faisal Mangondato at Labor Leader Leody De Guzman, na may tig-point 1% at dating defense Secretary Norberto Gonzales, .001%.

Dumagsa ang ilang mananampalataya sa iba’t ibang simbahan para ipagdiwang ang Easter Sunday o araw ng pagkabuhay ng Hesukristo.

Sa Minor Basilica of the Black Nazarene o mas kilala sa tawag na Quiapo Church, maraming deboto ang hindi na nakapasok pa sa loob kaya’t sa labas na lamang sila ng simbahan nakinig ng misa.

Isinagawa rin dito ang tradisyonal na Salubong  ng mga imahe nina Virgin Mary at Risen Christ kaninang alas 12 ng hatinggabi.

Bandang alas-6:30 ng umaga naman ginanap ang unang misa sa Baclaran Church habang  alas dos ng madaling araw naman ng isarado ang Scout Ybardolaza Street sa patungong Sacred Heart Parish sa Quezon City para sa Salubong kaninang alas-4.

Ang Linggo ng Muling Pagkabuhay ay indikasyon ng pagtatapos ng tradisyonal na kuwaresma. —sa panulat ni Abie Aliño

Pinamamadali na ni Assistant Minority Leader at ACT Teachers Representative France Castro sa Kongreso ang pagpasa ng House Bill 8621 na layuning ibalik ang asignaturang kasaysayan ng Pilipinas sa sekondarya.

Ito ay matapos magtrending sa social media ang ilang mga kabataang kalahok sa Pinoy Big Brother nang hindi masagot ng mga ito sa isang quiz show segment ang ilang mga tanong ukol sa kasaysayan ng Pilipinas.

Ayon kay Castro, hindi kasalanan ng mga kabataan kung hindi nito masagot ang mga tanong kaugnay sa kasaysayan dahil inalis aniya ito sa kurikulum sa ilalim ng K to 12 program na pinagtibay noong 2013.

Umakyat na sa mahigit P700m ang halaga ng pinsala sa agrikultura ng bagyong Agaton.

Batay sa datos ng inilabas ng Department of Agriculture (DA) hanggang alas-3 ng hapon nitong April 15, kabuuan nang P703.3m ang halaga ng nasira ng bagyo.

Apektado nito ang 11, 666 magsasaka na may production loss na 40, 850 metric tons.

Nasa 17, 530 ektarya naman ang nasira ng bagyo sa; Western Visayas, Eastern Visayas, Zamboanga Peninsula, SOCCSKSARGEN at Caraga.

Sa ngayon, patuloy ang pagtataya ng da sa halaga ng pinsala ng bagyo sa Agri-Fisheries ng bansa. — sa panulat ni Abby Malanday

Binawi na ni Agriculture Assistant Secretary Federico Laciste nauna nitong pahayag sa senado na may matataas na Government official na sangkot sa Smuggling ng agricultural products.

Mayroon pa umanong tumawag sa kanya sa harap ng paghahanda nila ng kaso sa ilang Smuggler subalit nag-name drop lamang ng Public official ang nasabing caller.

Pero nang beripikahin ay wala naman anya ang mga pangalan ng ilang opisyal ng gobyerno.

Aminado si Laciste na nasabi lang niyang may tumawag sa kanya na High profile personality sa dialogue kasama ang League of Associations sa La Trinidad Vegetable Trading areas.

Ito’y para lang umano mapahinahon si Agot Balanoy, Pangulo ng naturang liga dahil sinasabi nito na nakatatanggap na siya ng death threats sa pagsasalita hinggil sa talamak na agricultural smuggling.

Iginiit ni Laciste na hindi naman niya maaaring isiwalat ang pangalan ng mga public official dahil hindi ito direktang tumawag sa kanya.

Tumanggi rin si Balanoy na isiwalat ang hawak nilang pangalan ng sinasabing mga pulitiko o matataas na tao na protector ng mga Smuggler dahil sa takot para sa kanyang seguridad.  —ulat mula kay Cely Ortega Bueno (Patrol 19)