Tiniyak ng United Broiler Raisers Association (UBRA) sapat ang suplay ng manok.
Sa panayam ng DWIZ, sinabi ni Atty. Bong Inciong, presidente ng UBRA, kabilang sa posibleng dahilan ng pagtaas ng presyo ng manok ay dahil sa mataas na demand nito.
Nakaapekto aniya rito ang panahon at maging ang pangangampanya ng mga kandidato.
Aniya, malalaman sa darating na weekend kung gagalaw ang demand ng manok.
Nakatakdang maglabas ng Show Cause Order ang Land Transportation Franchising and Regulatory Board (LTFRB) laban sa provincial bus operators dahil sa kaguluhang ibinibintang sa pagpapatupad ng Window Hours Scheme.
Ayon kay LTFRB Executive Director Tina Cassion, nagda-draft na ng Show Cause Order ang kanilang legal na posibleng ilabas sa nasabing operator ngayong araw dahil hindi dumaan ang mga ito sa kanilang ruta kahapon na nakaapekto sa libu-libong stranded commuters.
Aniya, ang problema sa mga bus operator ay ginawa nitong hostage ang kapakanan ng mga mananakay sa kagustuhan na payagan sila sa mga pribadong terminal sa Metro Manila sa gastos ng mga pasahero.
Gayunman, nilinaw ng LTFRB na nakasaad sa kasunduan ng mga operator at MMDA na lampas sa window period namaaaring gumamit ng mga piling Integrated Terminal Exchange (ITX) areas ang mga provincial bus.
Umabot na sa 1.45 billion pesos ang halaga ng pinsala sa pampublikong imprastruktura na dulot ng papanalasa ng Bagyong Agaton.
Batay sa report ng Bureau of Maintenance, sinabi ni Department of Public Works and Highways (DPWH) Secretary Roger Mercado na tinatayang nasa 1.30 billion pesos ang danyos sa mga kalsada at tulay sa Region 8 o Eastern Visayas.
6.06 million pesos naman ang tinatayang danyos sa national roads sa SOCCSKSARGEN Region kung saan nasa 27 million pesos ang pinsala sa mga kalsada at tulay.
Muli namang binuksan ng DPWH ang 47 sa 50 na kalsada sa mga rehiyon ng Western Visayas, Central Visayas at Eastern Visayas.
Nilinis din ng quick response teams ang tatlong natitirang saradong bahagi ng national road sa mga probinsya ng Leyte at Southern Leyte.
Layunin ng DPWH na muling buksan ang mga natitirang kalsadang hindi madaanan dahil sa pagguho ng lupa bago matapos ang Abril.
Nilinaw ni Philippine National Police (PNP) Spokesperson Police Colonel Jean Fajardo na matagal ng may usaping legal sa pineapple plantation sa Bukidnon na pinangyarihan ng shooting incident kung saan naroon si Presidential Aspirant Ka Leody De Guzman.
Sa panayam ng DWIZ, sinabi ni Fajardo na bago ang insidente ay nagkaroon ng pagpupulong ang may-ari ng lupa at katutubo na nagke-claim nito kasama ang Department of Environment and Natural Resources (DENR) para mapanatili ang kapayapaan at maresolba ang kaso.
Dagdag pa niya na kanila pang iniimbestihagan ang presensya ni Ka Leody sa nabanggit na planta.
Binigyang-diin ni Albay Representative Joey Salceda na laganap ngayon ang smuggling o pagpupuslit ng agricultural products sa bansa.
Ayon kay Salceda, hindi magiging laganap ang naturang problema kung ginagampanan lamang ng Department of Agriculture (DA) ang trabaho nila na bigyan ng sapat na proteksyon ang interes ng mga magsasaka.
Dagdag pa ng kongresista, naaabuso ang import clearances na iniisyu ng ahensya dahilan upang mag-fiesta ang mga smuggler ng gulay at iba pang produktong pang agrikultura.
Stranded sa Dau Mabalacat City Bus Terminal mula kahapon ng umaga ang halos 3,000 pasahero dahil sa kawalan ng mga bus na masasakyan papuntang Maynila.
Ayon sa pamunuan ng terminal, may ilang mga bus sa terminal pero sarado ang mga pinto at hindi nagsasakay kasunod umano ng direktiba ng Metropolitan Manila Development Authority (MMDA) na bawal nang pumasok sa Metro Manila sa araw.
Samantala, nangako naman anila ang Land Transportation Franchising and Regulatory Board (LTFRB) na magpapadala ng labing apat na rescue buses na magdadala sa mga pasahero hanggang sa bahagi ng NLEX sa Valenzuela.
Pinabulaanan ng Land Transportation Franchising and Regulatory Board (LTFRB) na wala silang kinalaman sa sinasabing kasunduan sa pagitan ng mga provincial buses operators ng Metro Manila Development Authority (MMDA) kaugnay sa ipatutupad na window hours sa Metro Manila.
Ito ang ginawang paglilinaw ng LTFRB sa pahayag ng ilang provincial bus operators na sila ay mag-ooperate mula alas-10 ng gabi hanggang alas-5 ng umaga lamang batay sa polisiya ng MMDA.
Ayon sa LTFRB, ang Window Scheme Agreement ng mga bus companies sa pagitan ng MMDA ay hindi pakikialaman ng LTFRB at nirerespeto nila ito.
Niliwanag din ng LTFRB na ang naturang Window Hours Scheme ng MMDA ay hindi nangangahulugan na ang mga provincial buses ay mag-ooperate lamang sa gabi at ang window hours ay para lamang sa mga pribadong terminal ng mga provincial bus operators sa Metro Manila.
Nakapagtala ang Department of Health -Davao region ng apat na nasawi dahil sa leptospirosis ngayong taon.
Ayon kay DOH Davao Assistant Regional Director Dr. Gerna Manatad mula ang mga namatay sa lalawigan ng Davao del Norte, Davao City at Davao Occidental.
Kumpara noong 2021, mas mataas ang death toll na naitala ngayong taon.
Samantala, ang mataas na pagkamatay ay dahil sa masamang panahon at tropical cyclones na nagdulot ng pagbaha sa naturang rehiyon.
Itinuturing na ang Pilipinas bilang “low” risk sa ilalim ng United States Centers for Disease Control and Preventions (US CDC) para sa travel risk assessment, base sa mga bumababang COVID-19 cases.
Batay sa datos ng (US CDC) sa Southeast Asia noong Abril a-18, tanging ang Pilipinas at Myanmar ang nasa “level 1: COVID-19 low.”
Para mailagay ang isang destinasyon sa antas na ito, dapat na magkaroon ng 49 o mas mababang bagong kaso sa bawat 100K residente sa nakalipas na 28 araw.
Isinailalim naman ng US CDC System ang mga bansa sa mga kategoryang ito:
Level 3: high risk for COVID-19
Level 2: moderate risk for COVID-19
Level 1: low risk for COVID-19
Unknown: not enough data to assess risk
Samantala, ang mga bansang Germany, Greece, Ireland, italy, Portugal, Spain, gayundin ang Brazil, Canada, Egypt, Malaysia, Mexico, South Korea at Thailand ay napapabilang sa ‘high risk’ o Level 3.
Nabatid na 224 na lamang ang arawang kaso ng COVID-19 nitong Abril a-12 hanggang a-18.
Inaprubahan ng Food and Drug Administration (FDA) ang Emergency Uuse Authorization (EUA) ng anim na COVID-19 vaccines bilang pangalawang booster shot.
Ayon kay Dr. Myrna Cabotaje, Health Undersecretary at National Vaccination Operations Center Chairperson, kabilang sa mga inaprubahang bakuna ay ang Pfizer, Moderna, Sinovac, Astrazeneca, Sputnik Light at Janssen.
Aniya, handa na ang guidelines para sa roll out nito at hinihintay na lamang ang pinal na rekomendasyon ng Health and Technology Assessment Council (HTAC).
Inaasahang masisimulan na sa susunod na linggo ang pagtuturok ng ikalawang booster shot, kung saan prayoridad dito ang healthcare workers, senior citizens, at immunocompromised individuals.