HOT STORIES OF THE WEEK

Pinuna ng isang public transport practitioner ang pagtuturuan ng LTFRB at MMDA sa perwisyong idinulot sa libu-libong pasahero ng implementasyon window hours para sa mga provincial bus.

Ayon kay Atty. Alexander Verzosa, isang public transport practitioner, ang nasabing polisiya ay taliwas sa prinsipyong ang “kapakanan ng taumbayan ang pinaka-mataas na batas ng bayan”.

Sa kanyang liham kay LTFRB Chairman Martin Delgra, ipinunto ni Verzosa na ini-rerequire pa rin naman ng board sa mga provincial bus operator na gamitin ang mga Integrated Terminal Exchange alinsunod sa Memorandum Circular 2020-051 noong September 30, 2020.

Gayunman, lalo anyang gumulo nang mag-anunsyo ang MMDA na magpapatupad ng window hours simula alas-10 ng gabi hanggang ala-5 ng umaga para sa mga provincial bus.

Sa nasabing mga oras lamang maaaring maglabas-masok sa Metro Manila o gamitin ng mga provincial bus ang kanilang mga pribadong terminal batay sa “paki-usap” upang maiwasan umano ang mabigat na daloy ng trapiko.

Nagtataka naman si Verzosa kung kailan pa pinayagan ang MMDA na amyendahan o baguhin ang memorandum ng mandatory policy ng LTFRB.

Iginiit ni Attorney Verzosa na karapatan ng publiko, partikular ang mga pasahero na maramdaman ang maayos at konbinyenteng public transport service na responsibilidad ng gobyerno.

Maglalagay ng nakabukod na ‘polling area’ para sa mga botante na makikitaan ng sintomas ng COVID-19 pagsapit ng eleksyon sa Mayo 9 ang Commission on Elections (COMELEC).

Ayon kay COMELEC Commissioner George Garcia, plano nilang makipag-ugnayan sa Department of Health (DOH) upang maplantsa ang mga pa­nuntunan ukol dito.

Inaasahang dadagsa sa mga voting precincts sa araw ng halalan ang nasa 67.5 million na botante na agad munang susuriin kung nagtataglay ng sintomas ng COVID-19.

Nabatid na ilalagay ang mga ‘isolation polling area’ sa tabi lang ng presinto at plano rin ng COMELEC na maglagay ng nakahandang medical team sa mga presinto para mabilis na maaksyunan ang mga taong magkakaroon ng isyung medikal.

Nilinaw ng Philippine Health Insurance Corporation (PhilHealth) na sumusunod lamang sila sa joint memorandum ng DOH at CHEd hinggil sa pag-oobliga sa mga mag-aaral na kumuha ng health insurance bago makabalik sa face-to-face classes.

Ayon kay PhilHealth Vice President for Corporate Affairs at Spokesperson Dr. Shirley Domingo, layon nito na maprotektahan ang mga mag-aaral sakaling tamaan sila ng COVID-19 o iba pang sakit.

Kailangan lamang aniyang magparehistro ng mga estudyanteng edad 21 pataas para makasama sila sa database ng PhilHealth at mapadali ang pag-access sa mga benepisyo.

Samantala, ipinaliwanag din ni Domingo na ang lahat ng mga Pilipino ay otomatikong miyembro na ng PhilHealth sa ilalim ng Universal Health Care Law.

Isinusulong ng Commission on Elections (COMELEC) at Commission on Higher Education (CHEd) ang voter education sa mga kabataan bago sumapit ang Halalan 2022.

Nakasaad sa ilalim ng Memorandum of Agreement (MOA) na nilagdaan nina COMELEC Executive Director Bartolome Sinocruz Jr. at CHEd Executive Director Cinderella Filipina Jaro, na magsasagawa ng voters’ education forum sa lahat ng Higher Education Institutions (HEI) sa bansa.

Layon nito na gawing well-informed ang mga kabataang botante sa pamamagitan ng pagtuturo ng kanilang karapatang bumoto, paano at kailan magpaparehistro, sino ang mga kandidato at ang electoral process.

Itinuturing ng Commission on Elections (COMELEC) na “hotly contested” ang 12 munisipalidad sa Maguindanao na sa darating na eleksyon sa Mayo 9.

Ayon kay COMELEC Chairman Saidamen Pangarungan, sa ngayon ay nagsisimula nang magkaroon ng tensiyon sa naturang lugar at kung lumala pa umano ang sitwasyon dito ay mapipilitan siyang mag-deklara ng COMELEC control.

Nauna nang isailalim ng COMELEC ang mga bayan ng Malabang at Tubaran sa Lanao Del Sur sa ilalim ng kontrol nito.

Samantala, napagdesisyunan ni Pangarungan na huwag nang isama ang bayan ng Pilar sa Abra sa COMELEC control sa kabila ng iringan sa pagitan ng mga pulis at armadong tauhan ni vice mayor ng lugar kamakailan.

Kasunod ng pagkaantala ng botohan sa Timor-Leste dahil na-delay ang pagpapadala ng mga election material bunsod ng logistical problems sa shipment ay nagsimula na kahapon sa naturang bansa ang overseas voting.

Ayon sa embahada ng Pilipinas sa Timor-Leste, maaaring magtungo sa Philippine Embassy Chancery sa Bairro Farol, dili ang mga rehistradong pilipinong botante upang makaboto.

Nabatid na nagsisimula ang botohan sa ganap na alas-9 ng umaga hanggang alas-5 ng hapon mula Abril 21 hanggang sa Mayo 9, 2022.

Nananatiling offline ang dapat na online precinct ng Commission on Elections (COMELEC).

Ito ay sa kabila ng pag-anunsiyo ng komisyon na handa na sila para sa pambansa at lokal na eleksyon sa Mayo 9.

Ayon kay Commissioner George Erwin Garcia, malaki sana ang tulong ng precinct finder dahil magagabayan nito ang mga botante kung saan ang kanilang presinto bago pa man sumapit ang araw ng eleksyon.

Samantala, aminado naman si Garcia na bagamat noong Abril pa sinimulan ang online precinct finder ay hindi pa handa ang naturang proyekto.

Iginiit ng Associated Labor Union-Trade Union Congress of the Philippines (ALU-TUCP) na hindi na sapat ang existing minimum wage ng mga manggagawa sa Region 3.

Ayon kay Alan Tanjusay, tagapagsalita ng ALU-TUCP, ito ay dahil sa bumababang purchasing power ng piso sa lugar kung saan, sa 420 pesos na sahod ng mga manggagawa ay 368 pesos na lamang ang kakayahang bumili ng mga ito.

Maliban dito, patuloy rin aniya ang pagtaas ng presyo ng mga bilihin o inflation sa lugar at nananatiling matindi ang pangangailangan ng mga manggagawa dahil sa epekto ng umiiral na pandemya.

Sinabi pa ni Tanjusay na taong 2019 pa nagkaroon ng taas-sahod sa naturang rehiyon.

Inihayag ng National Task Force (NTF) against Covid-19 na maliit lamang ang naitalang covid-19 vaccine wastage sa bansa, partikular sa mga lugar na tinamaan ng bagyo.

Ayon kay NTF against Covid-19 Chief Secretary Carlito Galvez Jr., inaasahan nilang aabot sa 5 milyon ang bilang ng mga masasayang na bakuna ngunit batay aniya sa kanilang natanggap na mga ulat ay humigit kumulang 200,000 doses lamang ang vaccine wastage.

Gayunman, sinabi ng opisyal na patuloy na inaalam ng gobyerno at ng Department of Health ang bilang ng mga nasirang bakuna dahil sa bagyong Agaton.

Sinabi pa ni Galvez na hindi maiiwasan ang pagkasira ng mga bakuna dahil sa maikling shelf-life ng mga ito na tatlo hanggang apat na buwan lamang.

Pinaplano na rin aniya ng gobyerno na i-donate ang mga mapapasong bakuna upang maiwasan ang lalong pagkasayang ng mga ito.

Nakapagtala ng positive growth rate ng aktibong mga kaso ang ilang mga lugar sa Metro Manila.

Ayon sa Department of Health (DOH), nakapagtala ng positive one-week growth rates mula Abril 12 hanggang 18 ang Pateros na may 100%; Navotas, 80%; Las Piñas, 27.3%; Parañaque, 16.4%; Taguig, 7.5%; Muntinlupa, 14.3% at Marikina, 10%.

Hindi naman sinabi ng doh ang eksaktong bilang ng mga kaso sa naturang mga lugar.

Samantala, tumaas ang total bed at intensive care unit (ICU) utilization rates sa Valenzuela City dahil sa binawasang bilang ng mga nakalaang kama para sa mga pasyenteng may covid-19.

Bahagya namang tumaas ang overall hospital admissions ng mga may covid-19 sa Pasig City.

Nitong Miyerkules nang makapagtala ang doh ng 365 na bagong kaso ng covid-19.