HOT STORIES OF THE WEEK

Eksaktong dalawang linggo bago ang national at local elections, nalagasan na naman ng supporters si presidential candidate at Manila Mayor Francisco “Isko Moreno” Domagoso.

Ito’y makaraang lumipat ang isang paksyon ng Partido Federal ng Pilipinas na una nang nag-endorso sa kandidatura ni Yorme, sa kampo ni Vice President Leni Robredo.

Ang naturang paksyon ay pinangungunahan ng national chairman nitong si Dating National Commission for Muslim Filipinos Commissioner Ahubakar Mangelen.

Ayon sa PFP–Mangelen faction, naniniwala sila sa liderato at kakayahan ni Robredo na pamunuan ang bansa sa gitna ng pandemya at economic crisis patungo sa recovery at pag-unlad.

Napagtanto anila ng partido na kailangan ang mas  malakas na team upang talunin ang pinaka-malaking banta sa bansa at demokrasya, na si dating senador Ferdinand “Bongbong” Marcos, Jr.

Naniniwala rin ang PFP-Faction na si Marcos ay isa sa “mga hindi kwalipikado sa lahat ng kandidato” lalo’t mismong si Pangulong Rodrigo Duterte na ang nagsabi na “weak leader” si BBM.

Tinatayang 1,600 Filipino sa Shanghai, China ang hindi pa rin nakaboboto para sa 2022 Elections bunsod ng lockdown.

Ayon kay Shanghai Philippine Consul General Josel Ignacio, nananatiling suspendido ang overseas absentee voting sa lungsod dahil sa panibagong COVID-19 surge.

Posibleng sa Mayo o Hunyo o pagtapos ng eleksyon sa Pilipinas pa anya alisin ang lockdown.

Aminado naman si Ignacio na bagaman ang tanging aprubadong paraan ng pagboto sa shanghai ay in-person at mayroon pa ring lockdown, ikinukunsidera nila ang iba pang alternatibo.

Kabilang sa mga alternatiboang manipestasyon ng intensyon na bumoto sa iba pang polling precinct, na nagpapahintulot sa mga Pinoy na rehistrado sa Shanghai na lumipat sa ibang Philippine Diplomatic Post sa China.

Nanindigan ang Commission on Elections (COMELEC) na walang makakapigil sa pagdaraos ng eleksyon sa lahat sulok ng bansa sa darating na Mayo a-9.

Kasunod ito ng babala ni Department of Health (DOH) Secretary Francisco Duque III sa posibleng suspensyon ng eleksyon sa ilang lugar sa bansa sakaling makitaan ng pagtaas sa naitatalang kaso ng COVID-19.

Ayon kay COMELEC Commissioner George Garcia, makatarungan lamang ang pagsuspinde sa eleksyon kung tataas ng 80% o higit ang COVID-19 cases sa isang partikular na lugar.

Giit pa ni Garcia, COMELEC lamang ang karapatang magdesisyon ng anumang bagay o pangyayaring may kaugnayan sa eleksyon.

Binigyang diin pa nito na papagayan lamang ang suspensyon ng eleksyon kung magkakaroon ng force majeure o hindi mapipigilang insidente gaya ng sakuna o di kaya’y mga kaso ng destruction of election paraphernalia, terorismo, karahasan o “analogous cases.”

Nauwi sa postponement ang vice-presidential and presidential debates ngayong weekend dahil sa  misunderstanding o di pagkakunawaan ng Commission on Elections (Comelec) debate contractor at ng Sofitel Garden Plaza na siyang official venue ng event.

Ayon sa Comelec debate contractor na Impact Hub Manila, pinasok nila ang pribadong kasunduan sa Sofitel upang magbigay ng logistics and technical support sa debateng inorganisa ng komisyon.

Paglilinaw ng Impact Hub, hindi kasama ang poll body sa kontratang napagkasunduan ng IHM at Sofitel na nagkaroon ng mga miscommunication dahil sa mga incomplete report.

Dahil dito, inihayag ng Impact Hub Manila, na hindi muna sila magbibigay ng iba pang impormasyon ukol sa isyu na kasalukuyan na nilang ginagawan ng paraan upang agad nang maresolba.

Matatandaan na nakansela ang vice-presidential and presidential townhall debates kahapon April 23 at ngayong araw, April 24, 2022, matapos pumutok ang balita na nagkaroon ng problema ang cheque na ibinayad sa Sofitel.

Nakatakda namang ituloy ang naudlot na debate sa April 30 at May 1, 2022.

Nagbabala ang Commission on Elections sa mga kritiko na nagsasabing may pinapanigang kandidato ang ahensya para sa darating na eleksyon.

Ayon kay  Comelec Commissioner Rey Bulay, hindi sila magdadalawang-isip na ipaaresto sa Armed Forces of the Philippines ang sinumang nagpapakalat  na sila ay mandaraya at may kinakampihan.

Aniya, ipapakulong nila ang mga mahuhuling manggugulo sa gaganaping eleksyon.

Paliwanag niya, nasa panig ng batas ang kanilang ahensya at tiniyak na magiging malinis at mapayapa ang eleksyong ito.

Nanganganib maunsyami ang dalawang nalalabing COMELEC-Sponsored Debates bukas at sa linggo.

Ito’y bunsod ng babala ng Sofitel Philippine Plaza na sususpendihin nito ang dalawang nalalabing bahagi ng event contract kung hindi magbibigay ang organizer na Impact Hub ng 14 million pesos na partial payment para sa kanilang serbisyo.

Ang Impact Hub ang kumpanyang napili ng COMELEC na mangasiwa sa serye ng debate na tinaguriang “Pilipinas Debates 2022: The Turning Point” na isinagawa sa Sofitel noong March 19, 20 at April 3.

Sa demand letter ng Sofitel noong April 20, iginiit ng pamunuan ng hotel na maka-ilang beses nag-issue ng talbog na tseke si Celeste Eden Rondario ng Impact Hub.

Inihayag din sa liham na sa ilalim ng kontrata, dapat magbayad ang Impact Hub Manila ng kabuuang 20,595,000 pesos sa apat na tranches noong March 16, March 30, April 15 at 20 para sa buong serye ng debate.

Binigyan ng Sofitel ang Impact Hub ng ultimatum hanggang alas-12 ng tanghali kahapon upang bayaran ang utang nito at kung hindi ay mapipilitan ang hotel na suspendihin ang event.

Samantala, magsasagawa naman ng press conference ang COMELEC mamayang alas-9 ng umaga sa Manila Hotel pero hindi binanggit ni Commissioner George Garcia kung kabilang sa tatalakayin ang natenggang bayad sa Sofitel. —sa ulat ni Aya Yupangco (Patrol 5)

Nagbabala si Pangulong Rodrigo Duterte na maaaring maka-apekto sa Pilipinas ang Nuclear War kung titindi pa ang digmaan sa pagitan ng Russia at Ukraine.

Sa kanyang talumpati sa graduation ceremony sa Philippine National Police Academy sa Silang, Cavite, inihayag ni Pangulong Duterte na hindi imposibleng umabot sa sukdulan at kumalat sa ibang bansa ang digmaan.

Sa oras anya na gumamit na ng mga armas nukleyar ay indikasyon ito na “seryosong problema” na ang kinakaharap ng buong mundo pero kung hindi naman mangyayari ay magpasalamat ang lahat sa Diyos.

Una nang ibinunyag ng US Central Intelligence Agency na ang nakasasagabal sa pagsakop ng Russia sa Ukraine ay maaaring maging daan para kay Russian President Vladimir Putin na gumamit na ng tactical nuclear weapons.

Napilitan nang sumakay sa mga colorum na van at taxi ang ilan sa mga pasaherong pumila sa mga bus terminal sa Metro Manila matapos mabalam ang kanilang biyahe dahil sa window hours para sa mga provincial bus.

Ilan sa mga biyahero ay pumayag na sa singil na 600 pesos per head ng mga colorum van makauwi lamang sa probinsya tulad sa Pangasinan, kumpara sa 427 pesos na regular na pasahe sa bus.

Gayunman, mayroon ding mga tumanggi sa sobrang mahal na pasaheng alok naman ng mga taxi na aabot sa 1,500 hanggang 3,500 pesos depende sa layo.

Sa pag-iikot ng DWIZ kahapon sa Cubao, Quezon City, karamihan sa pumila sa mga terminal ng Victory Liner, Baliwag Transit at Fivestar Bus Lines ay naghintay ng 8 hanggang 12 oras.

Pawang biyaheng Norte, tulad sa Pampanga, Nueva Ecija, Tarlac, Pangasinan, La Union at Bataan ang mga pasaherong naabala sa kalituhang idinulot ng polisiya ng LTFRB at MMDA.

Umapela naman ang mga mananakay kay Pangulong Rodrigo Duterte na umaksyon na sa kanilang problema at huwag na silang pahirapan ng gobyerno.

Magugunitang nagturuan ang LTFRB at MMDA sa umano’y kasunduan hinggil sa implementasyon ng window hours para sa mga provincial bus na mula alas-10 ng gabi hanggang ala-5 ng madaling araw.

Namemeligrong pagmultahin ang mga provincial bus na nahuling lumabag sa ipinatutupad na window hours na nagdulot ng kalituhan at perwisyo sa mga pasahero.

Ito ang pangamba ng public transport practitionerna si Atty. Alexander Verzosa sa oras na maglabas na ng show-cause order ang LTFRB.

Pahirap anya ang ginagawa ng gobyerno na pinapupunta pa ang biyahero sa mga Integrated Terminal Exchange, gaya sa North Luzon Express Terminal (NLET).

Bagaman wala pang sinisingil ang NLET, pinuna rin ni Verzosa ang inirereklamong napakamahal umanong bayad sa naturang terminal dahilan kaya’t iniiwasan ito ng mga provincial bus.

Samantala, nanawagan namansi Verzosa sa gobyerno na wakasan na ang paghihirap ng mga provincial bus passenger na apektado ng window hours.