HOT STORIES OF THE WEEK

Kinuwestyon ni Senate Committee on Public Information and Mass Media Chairman Ramon “Bong” Revilla, Jr. ang Facebook sa tila censorhip nito sa post ng ilang opisyal at tanggapan ng gobyerno.

Iginiit ni Revilla na dapat ay magbigay ang Facebook ng basehan sa pagpigil at pagkwestyon sa lehitimong mensahe at gawain ng pamahalaan sa platform ng nasabing socia media giant.

Katulad anya ng pinost ni National Security Adviser Hermogenes Esperon at Philippine News Agency, hindi rin nakaligtas sa censorship ng FB ang post ni Commission on Higher Education Chairman Popoy De Vera hinggil sa libreng edukasyon sa bansa.

Ayon sa senador, marami rin silang natatanggap na reklamo sa pag-suspinde ng mga account sa hindi mabatid na kadahilanan at tila pagsupil sa malayang pamamahayag.

Binigyang-diin ni Revilla na kinikilala naman ang mga hakbang ng facebook at parent company nitong Meta laban sa disinformation, bullying, paghahasik ng hidwaan at terorismo sa pamamagitan ng paglalatag ng mga mekanismo at community standards.

Gayunman, tila nag-malabis na anya ang FB at naging balakid sa pagganap ng tungkulin ng matataas na opisyal ng pamahalaan. —sa ulat ni Cely Ortega-Bueno (Patrol 19)

Isinapinal na ng Korte Suprema ang kontrobersyal na Anti-Terrorism Act makaraang ibasura ang mga ‘Motion for Reconsideration’ na inihain ng iba’t ibang grupo laban sa naturang batas.

Nakasaad sa briefer ng Supreme Court, na naka-summer session sa Baguio City, na pinagtibay ng mga mahistrado ang kanilang boto sa desisyon noong December 7, 2021 na pinonente ni Dating Associate Justice Rosmari Carandang.

Ito’y dahil sa kakulangan ng “substantial issues” at argumento ng mga petitioner.

Pumanig sa mayorya ng mga mahistrado ang bagong-talagang si Associate Justice Antonio Kho Junior.

Sa botong 12-3 noong Disyembre, dalawang probisyon ang tinanggal dahil sa pagiging ‘unconstitutional’ kabilang na ang depinisyon ng terorismo sa Section 4 dahilan para matanggal ang pagsasagawa ng mga adbokasiya;

Protesta at iba pang kahalintulad na gawaing sibil at politikal sa ‘Act Of Terrorism’ hanggang walang intensyon na magdulot ng pagpaslang o panganib sa buhay ng isang tao at kapayapaan.

Sa boto namang 9-6, pinawalang-bisa ang ‘Method for Designation’ sa Section 25 na nagbibigay sa Anti-Terrorism Council na mag-adopt ng “request for designations by other jurisdictions or supranational jurisdictions” kung susunod sa criteria na itinatakda ng United Nations Security Council Resolution. —sa ulat ni Bert Mozo (Patrol 3)

Tinatayang 2,000 OFW sa Saudi Arabia ang dumagsa sa Philippine Embassy sa Riyadh upang bumoto.

Ayon kay Philippine Ambassador Adnan Alonto, inasahan na nilang daragsain ang Overseas Absentee Voting sa Saudi Arabia lalo noong weekend kung kailan naka-day-off ang maraming OFW.

Handa naman anya ang embahada sa pagtanggap ng sunud-sunod na pagdating ng mga botante.

Gayunman, ilang Pinoy ang nagreklamo sa halos tatlong oras na pagpila para lamang makabot.

Pinayuhan naman ni Alonto ang mga OFW na bumoto kapag weekdays kung kakayanin ng kanilang oras upang makaiwas sa mahabang pila.

Itinanggi ni Philippine Ambassador to Canada Rodolfo Robles na mayroong mga pre-shaded ballot na ipinamahagi sa mga Overseas Filipino sa naturang bansa.

Ito’y makaraang makatanggap si Robles ng reklamo mula sa isang Pinoy sa Vancouver, na nagsabing pre-shaded umano ang kanyang balota.

Gayunman, imposible anya itong mangyari dahil natanggap ang reklamo sa mismong araw na ipadadala pa lamang ang mga balota mula sa Ottawa at aabutin ng dalawang araw bago makarating ang mga ito sa Vancouver.

Ikinukunsidera naman ng embahador na fake news ang nasabing reklamo na layuning sirain ang sistema ng botohan.

Dismayado na ang mga pasahero sa alanganing biyahe ng mga bus sa mga Integrated Terminal Exchange (ITX) sa gitna ng kalituhan at mahabang pila bunsod ng Window Hours Scheme para sa mga provincial bus sa Metro Manila.

Ito’y dahil limitado pa rin ang mga bus na bumibyahe sa North Luzon Express Terminal (NLET) sa Bocaue, Bulacan.

Umaasa ang mga pasahero na magkakaroon ng malinaw na mga schedule ng bus trip mula NLET patungong Northern Luzon.

Sa ilalim ng Window Hours Scheme, na napagkasunduan ng MMDA at mga bus company, maaari lamang gamitin ang mga provincial bus ang kanilang mga terminal sa Metro Manila simula alas-10 ng gabi hanggang ala-5 kina-umagahan.

Dahil dito, libu-libong pasahero ang inabot ng dose oras sa pagpila sa mga bus terminal para lang makasakay.

Gayunman, nilinaw ng LTFRB na maaari namang sumakay ng mga bus ang mga pasahero sa ITX, tulad ng NLET at hindi rin nangangahulugan na bawal bumiyahe ang mga provincial bus kahit may window hours.

Iimbestigahan na rin ng NBI ang mga nagpakalat ng mga peke at malaswang video laban sa mga anak ni Vice President Leni Robredo na ipinost sa social media.

Ayon kay NBI–Cybercrime Division Chief Victor Lorenzo, maaaring kasuhan ng cyberlibel ang mga nag-share ng nasabing video.

Maituturing anyang primary author ang unang nag-post ng mga malisyosong atake sa mga Robredo.

Tiniyak naman ni Lorenzo na tinututukan na nila ang naturang reklamo ng mga anak ng presidential candidate.

Magugunitang nagpasaklolo sa cyber-crime division ang mga anak ng bise presidente na sina Aika at Trisha Robredo.

Ipinauubaya na ng Palasyo sa mga botante ang pagpili ng napipisil nilang party-list group para sa May 9 elections.

Ito’y sa kabila ng pahayag ni Pangulong Rodrigo Duterte na ang progresibong party-list groups ay umaakto bilang “legal fronts” ng Communist Party of the Philippines (CPP).

Ayon kay Acting Presidential Spokesman at Communications Secretary Martin Andanar, may kalayaan ang publiko na pumili at maghalal ng mga leader na kanilang pinaniniwalaang makapagsisilbi sa bayan.

Hindi naman na anya bago na may ilang organisasyon o indibidwal na kaalyado ng mga komunistang grupo ang matagal nang gustong makapasok sa gobyerno sa pamamagitan ng mga party-list group o pagsuporta sa ilang kandidato.

Gayunman, naniniwala si Andanar na ang mga botante ay may karapatan na maghalal ng nais nilang kandidato at party-lists alinsunod sa batas.

Nanindigan ang Meta, ang mother company ng social networking platform na Facebook na walang fact-checkers o company officials na sangkot sa flagging ng facebook posts ng philippine news agency.

Ito ang nilinaw ng Facebook matapos ang akusasyon ng PNA, National Press Club at PDP-Laban party na may censorship sa nasabing social media platform.

Ayon sa Meta, batid nila na tila na-block ng isang automation system ang pag-share ng ilang links ng PNA at Radyo Pilipinas sa kanilang platform.

Dahil dito, naka-flagg din ang posts ng ibang Facebook pages na una nang nag-share ng mga nasabing link kaya’t iniimbestigahan at nireresolba na nila ang issue.

Nilinaw ng Meta na ang third-party fact-checking partners ay hindi basta nagtatanggal ng content, accounts o pages mula sa kanilang apps.

Nagtatanggal lamang ang FB ng content kung lumalabag ito sa kanilang community standards, na iba pa sa fact-checking programs nito.

Magugunitang inihayag ng PNA noong linggo na na-flagg ang kanilang Facebook post maging ng Radyo Pilipinas habang unang na-flagg ng Facebook ang post ni national security adviser Hermogenes Esperon na napasok na umano ng mga komunista ang kongreso.

Sa Mayo 9, gaya ng power interruption. Tiniyak ni COMELEC Commissioner George Garcia na handang-handa na sila para sa May 9 Elections.

Pinayuhan ni Garcia ang mga botante na silipin ang kanilang pangalan sa precinct finder, magdala ng kodigo o hintayin ang voters registration sheet bago pumunta sa mga polling precinct.

Hindi na rin anya dapat magdala o tumanggap ng mga sample ballot.

Pinag-hihinay-hinay naman ni Garcia ang mga botante sa paggamit ng cellphone sa mismong araw ng halalan.

Tiniyak din ng poll official na nakahanda ang poll body sa anumang posibleng aberya.

Inihayag ni National Task Force (NTF) against COVID-19 special adviser Dr. Teodoro “Ted” Herbosa na dapat munang isantabi ang pangangampaniya ng mga kandidato at iprayoridad ang pagbabakuna sa bansa.

Ayon kay Herbosa, mas mahalaga ngayon ang antas ng pagbabakuna kontra sa COVID-19 upang makontrol ang pagkalat ng virus.

Nabatid na bago paman nagsimula ang campaign period, umabot na sa halos 1M doses ng bakuna ang naipamahagi na sa bansa kung saan, hinihikayat ang mas maraming Pilipino na magpabakuna upang maging ligtas laban sa COVID-19.