HOT STORIES OF THE WEEK

Posibleng magkaroon ng panibagong COVID-19 surge matapos ang Eleksyon 2022.

Ito ang ibinabala ng grupong OCTA Research makaraang madetect ang Omicron subvariant na BA.2.12 sa bansa.

Gayunman, nilinaw ni OCTA Fellow, Professor Guido David na hindi magiging kasing-panganib ang posibleng surge matapos ang halalan kumpara sa Omicron surge noong Enero.

Inihayag naman ni Dr. Rontgene Solante, isang Infectious Disease Expert at Vaccine Expert Panel member, na hindi kasing-peligroso o nakamamatay ang Omicron subvariant gaya ng Delta variant.

Karamihan anya ng mga kaso ay mild at ang tsansang maging malubha ang sakit ay mababa maliban na lamang sa mga nasa vulnerable population, tulad ng mga senior citizen at immunocompromised.

Sampung araw bago ang halalan sa Mayo 9, pitong bayan sa Pangasinan ang isinailalim sa “orange category” dahil sa mga nagdaang election-related incidents at matinding political rivalry.

Tinukoy ni Pangasinan Police Provincial Office Director, Col. Richmond Tadina ang mga bayang inilagay sa orange category ay ang Urbiztondo, Sual, Sto. Tomas, Bolinao, Calasiao, Rosales at Sison.

Inilagay din aniya ng Commission on Elections En Banc sa “yellow category” ang 41 bayan at lungsod.

Ang yellow category ay tumutukoy sa mga lugar na nakapagtala ng mga election-related violence o mayroong matinding partisan political rivalry na hindi naman nilalahukan ng mga domestic terror groups.

Magtatalaga naman ng dalawang pulis kada voting center sa mismong araw ng halalan.

Matatandaang nai-deliver na ang mga vote counting machine sa Urdaneta at Dagupan cities at provincial hubs sa Pangasinan at hinihinatay na lamang dumating ang mga official ballot.

Ipinag-utos na ni Interior Secretary Eduardo Año sa PNP at mga local government unit ang mas mahigpit na pagpapatupad ng COVID-19 protocol.

Bunsod ito ng tumataas na bilang ng mga paglabag, gaya ng mass gathering na umabot sa 5,469%.

Sa kanyang pagharap sa Talk to the People ni Pangulong Rodrigo Duterte, inihayag ni Año na dapat maiwasan pa rin ang panibagong COVID-19 surge kahit inaasahan na ito ng mga health expert.

Kabilang anya sa pinaka-malaking hamong haharapin ng gobyerno sa pagsugpo sa COVID-19 ang halalan sa Mayo 9.

Nag-withdraw na ng kanyang kandidatura sa pagka-senador sa May 9 Elections si House Deputy Speaker Rodante Marcoleta.

Nagpasya si Marcoleta na umatras labindalawang araw bago ang nasabing halalan at kahit napasama na ang kanyang pangalan sa Overseas at Local Absentee Voting.

Kinumpirma ni COMELEC Commissioner George Garcia ang naturang impormasyon kahapon at ipinaliwanag na ang mga boto para kay Marcoleta sa May 9 ay ituturing na wala.

Si Marcoleta ay tumatakbo sa ilalim ng Uniteam nina dating senador Ferdinand “Bongbong” Marcos Junior at Davao City Mayor Inday Sara Duterte-Carpio.

Batya sa Pulse Asia Survey noong April 6, nasa 24^th hanggang 30^th rank ang kongresista sa mga kandidato sa pagka-senador. —sa ulat ni Tina Nolasco (Patrol 11)

Kinalampag na ni Senator Grace Poe si Transportation Secretary Arthur Tugade at mga bus operator upang solusyonan na ang kalbaryo ng mga commuter na apektado ng Window Hours Scheme.

Ayon kay Poe, Chairperson ng Senate Committee on Public Services, hindi dapat magpakahirap ang mga biyahero sa kawalan ng masasakyan at mahabang pila.

Sa halip ay dapat anyang magpalingkuran ang mga pasaherong papasok o palabas ng mga probinsya na kapos sa panggastos at walang lugar na matutulyan sa Metro Manila.

Pinatitiyak din ng senador kay Tugade ang kaginhawaan ng mga pasahero na naglalakas-loob pumila ng mahabang oras.

Una nang isinisi ng LTFRB at MMDA sa mga bus operators ang kalituhan sa Window Hour Scheme na nagsisimula alas-10 ng gabi hanggang ala-5 kinaumagahan.

Sa mga nabanggit na oras lamang maaaring gamitin ng mga provincial bus ang kanilang mga terminal sa Metro Manila. —sa ulat ni Cely Ortega-Bueno (Patrol 19)

Tinawag na fake news ng Commission on Elections (COMELEC) -Region 2 ang ulat na may grupo umanong nagpapa-shade ng mga balota sa mga botante.

Ayon kay Atty. Jerby Cortez, Assistant Regional Director ng COMELEC – Region 2 at election officer ng Cauayan City, Isabela, hinihintay pa nila ang pagdating ng mga official ballot at election paraphernalia sa rehiyon.

Lahat ng mga vote counting machine (VCM) ay dumating na sa Region 2 at naibigay na sa iba’t ibang mga lalawigan sa rehiyon habang ang mga official ballot ay ipapadala pa lamang sa mga provincial at city treasurer.

Nilinaw ni Cortez na wala pang mga balotang naipamigay sa mga lalawigan at lungsod sa rehiyon kaya’t maituturing na fake news ang sinasabing mayroon nang grupong nagpapa-shade ng mga official ballot.

Tiniyak din ng poll official na selyado ang mga official ballot at hindi basta mabubuksan ng sinuman.

Inaasahang darating sa Cauayan City ang mga balota isang linggo bago ang May 9 elections.

Naglabas na ng subpoena ang Commission on Elections – Law Department kay Quezon City 5th District congressional candidate Rose Nono Lin at iba pang indibidwal na umano’y sangkot sa vote buying.

Ito’y makaraang maghain ng reklamo ang Koalisyong Novalenyo Kontra Korapsyon at ng Alyansa ng mga Mamamayan ng Bagbag dahil sa paglabag ng mga akusado sa Omnibus Election Code.

Ipinatawag din sina Lorelie Alejo, Danny Maniquis, Danilo Endraca, Emily Tatel, Jackie Taio, Yolanda Villaluz, Haydee Burabo, Luisito Tojon, Lucianna De Guzman, Sweet Macayan, Imelda Maniquis, Miles Mansueto, Maria Buensuceso, Erwin Manabat, Alma Polenday at Rudy Crispino.

Inatasan sila ng poll body na magsumite ng counter-affidavits sa Mayo 16 o bago ang nasabing petsa.

Alinsunod sa Omnibus Election Code, sinumang mapatutunayang guilty sa election offense ay maaaring makulong ng hindi bababa sa isang taon at hindi rin lalampas ng anim na taon.

Tatanggalan din ito ng karapatan na makaboto at magsilbi sa anumang tanggapan ng pamahalaan.

Dalawang linggo bago ang araw ng eleksyon, naghahanap pa rin ang Parish Pastoral Council for Responsible Voting (PPCRV) ng mga boluntaryo para tumulong sa pagmomonitor ng Halalan 2022.

Ayon kay PPCRV Legal Counsel and Spokesperson Atty. Van Dela Cruz, napakahalaga ng mga volunteer dahil sila ang magbabantay sa mga balota at sisiguro na ang democratic process ay nasusunod.

Kasama rin aniya sa training ng mga nasabing indibidwal kung paano lalabanan ang mga maling impormasyon.

Nakikipag-ugnayan naman ang PPCRV sa Armed Forces of the Philippines (AFP) at Philippine National Police (PNP) bilang bahagi ng preparasyon sa naturang halalan.

Umabot na sa kabuuang 11,303,887 na mananakay sa buong bansa ang napagsilbihan ng Land Transportation Frachising and Regulatory Board (LTFRB) sa ilalim ng Service Contracting Program Phase 3.

Ito ay ipinatupad sa Metro Manila- Edsa Busway Carousel, Region 1 hanggang Region 12, CARAGA at Cordillera Administrative Region (CAR).

Binuksan din ng LTFRB ang mga rutang PITX-NLET at Cubao-NLET para sa mga commuter na papunta at palabas ng National Capital Region (NCR) mula sa Region 1, 2, Region 3 at CAR.

Samantala, sinabi ng ahensya na asahan ang pagbubukas ng mga karagdagang ruta sa iba’t ibang bahagi ng bansa.

Ibinasura ng Commission on Elections (COMELEC) ang Certificate of Candidacy (COC) ni Ormoc City Councilor Vincent Rama, na tumatakbo bilang provincial board member ng 4^th District ng Leyte sa Halalan 2022.

Sa walong pahinang resolusyon, ipinawalang-bisa ng COMELEC second division ang COC ni Rama dahil hindi umano siya kuwalipikadong tumakbo bilang bokal.

Malinaw na nilabag ni Rama ang Omnibus Election Code nang ideklara nitong opisyal siyang nakatira sa Doña Concepcion Village sa Kananga, Leyte gayong sa Ormoc City ito naninirahan at kanyang maybahay.

Nagsisilbi rin si Rama bilang konsehal sa naturang lungsod.

Ipinunto ng poll body na hindi sapat ang paninirahan ng naturang kandidato sa Kananga upang maging kuwalipikado sa pagtakbo bilang bokal at ang patuloy niyang paninilbihan bilang konsehal ay patunay din na wala siyang balak lumipat ng tirahan sa labas ng ormoc.

Si Rama ay bayaw ng aktor at kasalukuyang alkalde ng Ormoc na si Richard Gomez, na tumatakbo naman sa pagka-kongresista sa ika-apat na distrito.