Judith Estrada-Larino

Otomatiko nang walang pagtaas sa presyo ng mga pangunahing bilihin sa Luzon matapos itong isailalim sa state of calamity ng Pangulong Rodrigo Duterte.

Ayon ito kay Trade Undersecretary for Consumer Protection Ruth Castelo kaya’t nangangahulugang nasa ilalim ng price freeze ang buong Luzon.

Sinabi ni Castelo na malinaw sa section 6 ng Republic Act No. 7581 o Price Act na maliban na lang na alisin ng pangulo ng bansa ang state of calamity, otomatikong iiral ang price freeze o walang ipatutupad na paggalaw sa presyo ng mga pangunahing bilihin tulad ng bigas, mais, tinapay, fresh, dried at canned fish at iba pang marine products, karneng baboy, baka, itlog, gulay at iba pang commodity na tutukuyin ng DTI at Department of Agriculture.

May basehan ang Pangulong Rodrigo Duterte sa pagkastigo nito kay Vice President Leni Robredo matapos siyang hanapin nito sa kasagsagan ng Bagyong Ulysses.

Ayon kay Presidential Spokesman Harry Roque, hindi siya sigurado kung nabigyan lamang ng maling impormasyon ang pangulo matapos na itanggi ni Robredo ang claim ng pangulo.

Sinabi ni Roque na sa tingin niya ay hindi maiirita ang pangulo kung wala itong personal na kaalaman hinggil sa paghahanap sa kanya ni Robredo, publiko o pribado man.

Magugunitang mahigit 20 minuto ng halos isang oras na ulat sa bayan ng pangulo ay inilaan nito sa pagbatikos kay Robredo na aniya’y hindi karapat-dapat manguna sa bansa.

Wala ni isa man sa mga evacuee ang nagpositibo sa coronavirus disease 2019 (COVID-19).

Ayon ito kay Health Undersecretary Maria Rosario Vergeire matapos ianunsyo ng gobyerno ang pagpapatupad ng antigen test sa mga evacuee.

Tiniyak ni Vergeire na bibigyan ng priority sa posibleng COVID-19 infection ang mga nagpapakita ng mga sintomas.

Sinabi ni Vergeire na bukod sa testing, nagpakalat na rin ang Department of Health ng health emergency response teams sa mga lugar na apektado ng Bagyong Ulysses para sa COVID-19 surveillance gayundin ang pagbibigay ng medical, sanitation at mental/psychosocial support para sa mga evacuee.

Nag-anunsyo ng tigil-suplay ang Maynilad Water Services Incorporated mula ngayong araw na ito hanggang sa ika-24 ng Nobyembre.

Ayon sa Maynilad, kailangan pa nilang linisin ang kanilang treatment plants na pinasok ng maliliit na buhangin sa pagdaan ng Bagyong Ulysses noong isang linggo, para bumalik sa normal ang volume ng tubig na kanilang napo-produce.

Sa kanilang Facebook page, ipinabatid ng Maynilad na maaaring malabo o may kulay ang unang labas ng tubig kaya’t padaluyin muna saglit hanggang luminaw na ito.

Humihingi ng paumanhin ang Maynilad sa 70% ng kanilang customers na apektado ng water interruption at nangakong tuluy-tuloy ang pagsisikap nilang maibalik sa normal ang suplay ng tubig.

Dalawa na lamang mula sa 200 residente ng Cagayan na humingi ng tulong sa Office of the Vice President ang natagpuan na ng kampo ng pangalawang pangulo.

Ayon kay Vice President Leni Robredo, nakausap na nila at ligtas na ang 198 residente na umiiyak nang magpasaklolo sa kaniyang tanggapan.

Lumalabas aniya sa report na mayroong tatlong hindi nila makontak subalit natagpuan na ng kanilang team ang isa sa mga ito na nakilala bilang ‘Racquel’ ng Gosi Sur, Tuguegarao.

Ipinabatid pa ni Robredo na nahanap din ng kanilang team ang residenteng si Janice Narag, anak ni Johnny Narag, na nasawi sa heart attack ilang oras bago sila marescue ng mga otoridad.

Sinabi ni Robredo na si Janice ang sumisigaw at humihingi ng tulong sa isang viral video sa social media sa kasagsagan ng Bagyong Ulysses.

Initial reports show that there were about three who did not make it. But we requested them to double check. One of those they could not contact was Raquel of Gosi Sur, Tuguegarao. We were getting nervous already. But they found her today❤️ pic.twitter.com/5J7IKox9iz

— Leni Robredo (@lenirobredo) November 17, 2020