Judith Estrada-Larino

Isinulong ni Senador Imee Marcos ang pag adopt sa konseptong sponge cities para maibsan ang pinsala ng mga bagyong pinatitindi pa ng climate change.

Binigyang diin ni Marcos sa kaniyang inihaing resolusyon na naging matagumpay sa pagkontrol ng flash floods sa China at India ang sponge cities na isang storm water management strategy.

Sinabi ni Marcos na nakapaloob sa strategy ng sponge cities ang pinagsama-samang imprastruktura ng tubig mula sa pinagbagsakan ng ulan patungo sa water treatment facilities.

Layon ng hakbang na makontrol ang baha at makaipon din ng tubig para gawing inumin o gamitin bilang tubig na panlinis.

Ang mga aspaltadong kalsada at sidewalk na mayroong maliit na butas sa ibabaw ay dapat ding subukan sa mga lungsod para masipsip kaagad ang mga ulan.

Habang ang sobrang buhos ng padadaluyin patungong dagat sa pamamagitan ng isang buong sistema ng mga kanal, floodway at spillway para nmaiwasang bumigay at umapaw sa mga tabing ilog at mga lawa.

Sinabi ni Marcos na kailangang makalikha ang bansa ng sariling bersyon ng konseptong sponge cities  habang iniimbestigahan ang man-made disaster na dulot ng bagyong Ulysses at pagpapakawala ng tubig ng Magat dam.

Hindi ganap na nagagamit ng Department Of Transportation ang ibinibigay ditong pondo dahil sa maraming taong nag-underspending.

Ayon ito kay Senate Finance Sub Committee Chair Grace Poe kaya’t pinakaltasan nila ng halos P35-B ang panukalang budget ng DOtr para sa susunod na taon.

P 145. 36-B ang ipinabibigay ng Malakanyang na budget sa DOTr subalit ibinaba ito sa P109-B ng finance committee na nagsabing mas mabuting mapakinabangan ng ibang ahensya o magamit sa ibang program ang pondo kaysa matengga lang sa DOTr.

Sinegundahan naman ito ni Senate President Protempore Ralph Recto na nagsabi pang mula 2016 ay palaging may pondong hindi nagagamit ang DOTr kaya’t maaaring hindi rin maubos ng ahensya ang ibibigay ditong P106-B na budget para sa susunod na taon.

Muli na namang nagpatupad ng balasahan sa liderato ng kamara sa isinagawang sesyon kahapon.

Inalis bilang Deputy Speakers sina Congressmen Raneo Abu, Fredenil Castro at Dan Fernandez na pawang kilalang mga kaalyado ni dating House Speaker Alan Peter Cayetano.

Itinalagang mga bagong Deputy Speakers sina Congressmen Rufus Rodriguez, Camille Villar at Lito Atienza na kaalyado naman ni House Speaker Lord Allan Velasco.

Si Congressman Mikee Arroyo naman ay itinalagang Chairman ng House Committee on Energy.

Kapalit ni Speaker Velasco samantalang inalis din bilang pinuno ng House Contingent sa House of Representative Electoral Tribunal si Congressman Ron Salo at ipinalit si Congressman Dale Malapitan.

Si Act CIS Representative Eric Yap na chairman ng House Committee on Appropriations ay itinalagang Vice Chairman ng House Committee on Accounts.

Nagbitiw naman bilang House Secretary General Si Atty. Jocella Bighani Sipin na pinalitan ni dating Batangas Congressman Mark Llandro Mendoza na dating pinuno ng Nationalist People’s Coalition sa kamara noong kongresista pa.

Si Speaker Velasco ang itinalagang caretaker ng 1st district ng Cebu matapos masawi si Congressman Raul Del Mar.

Pinag-aaralan ng Pangulong Rodrigo Duterte ang draft ng Executive Order na nagtatatag ng task force para mapabilis ang rehabilitation efforts sa mga lugar na sinalanta ng mga bagyo.

Ayon kay Presidential Spokesman Harry Roque naisumite na at kinukunsider na ng Pangulo ang draft ng Executive Order sa panukalang Build Back Better Task Force.

Sinabi ni Roque na ang kalihim ng DENR ang magsisilbing pinuno ng task force  at co-chair naman ang public works secretary.

Ipinabatid ni Roque na kinukunsider ng gobyerno ang science based approach sa rehabilitation at recovery efforts ng bansa.

Gayunman pananatilihin aniya ng Office of the President ng oversight samantalang ang task force ay regular na magre-report sa Pangulong Duterte sa pamamagitan ni Executive Secretary Salvador Medialdea.

Inaprubahan na ng House Committee on Appropriations ang funding provisions ng panukalang pagtatatag ng Department of Water Resources (DWR) at ang Water Regulatory Commission.

Sa budget hearing ng komite kinatigan ng mga miyembro ang bahagi ng panukala para sa budgetary requirements na kakailanganin sa pagtatatag ng mga nasabing bagong ahensya.

Ang panukalang DWR na isa sa priority bills ng administrasyong Duterte ay magiging pangunahing ahensya na responsable sa pamamahala ng water resources sa bansa.

Ang DWR ang tutugon sa kumprehensibo at integrated planning, policy formation, management at ownership, utilization, exploitation, development at pagbibigay proteksyon sa water resources.

Sinabi ni Congressman Marvey Marinio, sponsor ng bill na layon din nito na matiyak na ligtas, sapat at tuloy-tuloy ang supply ng tubig sa mga Pilipino gayundin ang maayos na pamamahala at epektibong regulasyon sa water services.

P2-B naman ang kakailanganing pondo habang P300-M naman ang sa Water Regulatory Commission.

Nag-sorry si Chief Presidential Legal Counsel Salvador Panelo kay Vice President Leni Robredo sa pahayag nitong nakikisakay ito sa sa relief efforts ng gobyerno para sa mga biktima ng bagyong Ulysses.

Inamin ni Panelo na maling impormasyon ang nakuha niya hinggil sa paggamit umano ni Robredo ng C130 plane para maghatid ng relief aid sa Catanduanes base na rin sa serye ng text messages sa pagitan ng dalawa pang opisyal ng gobyerno.

Ipinabatid ni Panelo na nagpadala na rin siya ng text message kay Robredo para humingi ng paumanhin sa kaniyang naging pahayag laban sa Bise Presidente.

Una nang itinanggi ni Robredo na sumakay siya sa C130 plane para maghatid ng tulong sa mga taga Catanduanes.

Nakapagbayad na ng P800-M ang PhilHealth mula sa P1.1-B na utang nito sa Philippine Red Cross.

Ipinabatid ito ni Senador Richard Gordon, chairman at chief executive officer ng PRC.

Ayon kay Gordon, P400-M pa ang natitirang utang ng PhilHealth sa PRC matapos una na rin itong magbayad ng P500-M at sinundan ng tatlong tig P100-M pa.

Nadadagdagan aniya ang utang ng PhilHealth dahil nag resume na ang PRC ng COVID-19 testing kasunod na rin nang pag-uusap nila ng PhilHealth.

Pumapalo na sa 412,097 ang kumpirmadong kaso ng COVID-19 sa bansa matapos maitala ang 1, 383 na bagong infection.

Ayon sa Department of Health (DOH) ang Cavite ang nakapagtala ng pinakamataas na bagong kaso ng COVID-19 na nasa 81 sumunod ang Laguna – 74, Batangas – 71, Quezon City – 69 ay Rizal – 67.

Ipinabatid ng DOH na umakyat na sa 376, 666 ang total recoveries nang maitala ang 143 na mga bagong gumaling sa nasabing sakit.

Sumirit naman sa 7,957 ang death toll matapos madagdag ang 95 bagong nasawi sa naturang infection.

Naitala sa 29, 474 ang active cases na sumasailalim sa gamutan o quarantine kung saan 83. 8% ang mild, 8.3% ang asymptomatic, 2.7%  ang severe at 4.9% ang critical condition.