Judith Estrada-Larino

Nalampasan ni Energy Secretary Alfonso Cusi ang net worth ni DPWH Secretary Mark Villar noong isang taon.

Dahil dito si Cusi na ang itinuturing na pinakamayamang miyembro ng gabinete sa kauna-unahang pagkakataon simula nang maluklok sa kapangyarihan ang Duterte administration noong 2016.

Ayon sa record ng Malakaniyang naitala ang net worth ni Cusi sa P1.429-B noong 2019 na mas mataas sa P1. 407-B ni villar.

Malaking bahagi ng personal na yaman ni Cusi ang cash nito, placements, mga alahas, furniture at fixtures na nasa mahigit isang bilyong piso at mga investments sa pamamagitan gn shares of stocks na nasa mahigit P137-M.

Si Finance Secretary Carlos  Dominguez III ang ika-3 pinakamayang cabinet member na may net worth na halos P370-M, ika-4 si Transportation Secretary Arthur Tugade  na halos may P311-M at ika-5 si PCOO Secretary Martin Andanar – mahigit P172-M.

Pasok sa 10 pinakamayamang miyembro ng gabinete sina dating Neda Director General Ernesto Pernia – mahigit P120-M, DFA Secretary Teodoro Locsin, Jr. – halos P103-M, Chief Legal Presidential Legal Counsel Salvador Panelo – halos P78-M, Agriculture Secretary William Dar – halos P72-M at Executive Secretary Salvador Medialdea – halos P58-M.=

Itinuturing namang pinakamahirap na Cabinet Member si Agrarian Reform Secretary John Castriciones – P7-M samantalang hindi pa available ang kopya ng SALN nina National Security Adviser Hermogenes Esperon, Jr. Tesda Chief Isidro Lapenia, Presidential Legislative Liason Office Chief Adelino Sitoy at Presidential Spokesman Harry Roque.

Pambili lamang ng bakuna ang inihingi ng pondo ng Department Of Health at hindi ang iba pang malaking pagkakagastusan tulad ng storage sa freezer, distribution, transportation, bayad at training nang magtuturok at mga gamit sa pagtuturok.

Ito ang lumitaw sa deliberasyon sa panukalang budget ng DOH para sa susunod na taon matapos na  mapuna nina Senate President Protempore Ralph Recto at Senador Pia Cayetano.

Tinatayang P7-B  ang kailangan para sa mga nasabing bagay na may kaugnayan sa pagbili ng bakuna  at kung ang bibilhing pinakamurang storage ay hanggang -10 °F.

Ayon kay Recto nakakadismayang maliit na nga ang inilaang budget para sa pagbili ng bakuna, hindi pa aniya isinama sa pinapopondohan ang supply chain o ang pag-iimbak at pamamahagi nito na tiyak na mas mataas ang presyo kaysa sa bakuna.

P2.5-B lang ang inilaan ng Malakanyang na pambili ng bakuna na  itinaas ng senado sa P18-B bagamat may P10-B na  unprogrammed o depende sa availability ng pondo.

Sinabi ni Recto na may pagkakataon sila sa senado na padagdagan ito kahit pa anya gawing P150-B ang unprogrammed budget para dito, ang mahalaga ay mayroong  standby authority na para sa pagbili ng gobyerno ng bakuna kapag naging available na ito. —ulat mula kay Cely Ortega-Bueno (Patrol 19)

Tiwala si dating House Speaker Alan Peter Cayetano na huli na ang ikinasang pagbalasa sa house leadership posts noong Miyerkules.

Kasunod na rin ito nang pagsibak ni House Speaker Lord Allan Velasco sa 3 sa mga kaalyado ni Cayetano  bilang deputy speakers.

Sinabi ni Cayetano na mayorya ng mga kongresista ang sumusuporta sa administrasyon ng Pangulong Rodrigo Duterte  kahit kanino pang pinuno ng kamara sila nakapanig.

Umaasa si Cayetano na maayos na ang mga puwesto sa kamara bagamat hindi naman aniya kontrolado ang kalooban ng lahat ng mga kongresista.

Pinabibilisan ni Senador Sherwin Gatchalian ang paglilipat ng mahigit 60k poste ng kuryente na sagabal sa mga pinalapad na mga kalsada sa bansa.

Sinabi ni Gatchalian na nasasayang ang road widening projects dahil sa mga naturang poste ng kuryente.

Iginiit ni Gatchalian na  noon pang 2019 dapat natanggal ang mga naturang poste dahil napondohan na ng  P3.78-B ang relokasyon  ng mga ito.

Sa halip  na  mapaluwag ang mga kalsada inihayag ni Gatchalian na  naging parking lot ang pinalapad na mga kalsada at nagsilbing marker ang mga poste para sa pagparada ng mga sasakyan.

Tugon naman ng DPWH, naantala ang paglilipat ng mga poste dahil sa mga ipinatupad na quarantine na dahil sa COVID-19 pandemic.

Sa bilang ng DPWH, 24k na lang ang  electric posts na nasa gitna ng road widening projects at kakayanin anitong ilipat sa susunod na taon ng mga electric cooperative na may-ari ng mga naturang poste.

Pinaiimbentaryo ni Senate President Vicente Tito Sotto III ang mga environmental laws kasabay ang pagpaparepaso sa implementasyon ng ehekutibo ng mga ito.

Ito ayon kay Sotto ay dahil maaaring hindi na angkop sa kasalukuyan ang ilang patakaran sa pagpapatupad ng mga batas pang kapaligiran.

Sa harap nang naranasang malawakang pagbaha sa maraming lalawigan sa Luzon kung saan nabulaga ang national at local government units binigyang diin ni Sotto ang kahalagahang ma repaso ang estado ng implementasyon ng environmental laws.

Ipinasa aniya ang mga nasabing batas para matiyak na ang bansa lalo na ang mga local government unit ay handa kapag may tatamang malakas na bagyo tulad ng mga bagyong Rolly at Ulysses.

Sa ilalim ng mga batas pang kapaligiran sinabi ni Sotto na mayroong nakalatag na mga guidelines at protocols kung ano ang dapat gawin ng LGU’s at mga ahensya ng gobyerno bago, sa panahon at pagkatapos ng paghagupit ng bagyo.

Kinuwestyon ni Sotto kung hindi ba sumunod sa mga alituntunin na nakasaad sa batas kayat hindi naging handa ang gobyerno at LGU’s sa hagupit ng magkasunod na bagyo at kung ipinatutupad ba ng mga ahensya ng gobyerno ang mga batas hinggil sa kalikasan at natural disasters.

Dahil dito humihingi si Sotto sa DENR ng estado ng implementasyon ng environmental laws para maprotektahan ang publiko at kanilang lugar na tinitirhan mula sa galit ng inang kalikasan. —ulat mula kay Cely Ortega-Bueno (Patrol 19)

Inakusahan ng Malakanyang ang 2 anak ni Vice President Leni Robredo na umatake sa Pangulong Rodrigo Duterte sa kasagsagan ng bagyong Ulysses noong isang linggo.

Una nang binakban ng Pangulo si Robredo sa anya’y paghahanap sa kanya nang manalasa ang bagyong Ulysses na mahigpit namang itinanggi ng bise Presidente.

Ayon kay Presidential Spokesman Harry Roque nagkaroon ng palitan ng mensahe ang 2 anak na babae ni Robredo laban sa Pangulo na hindi naman direktang tinukoy sa twitter messages.

Sinabi ni Roque nag-post si Tricia Robredo sa twitter ng mga katagang:  tulog pa rin? Alas-8 na, sinagot naman ng kapatid nitong si Aika na:  Sabado e, weekend!

Ayon kay Roque hindi nakakatulong ang mga ganitong mensahe bagamat hindi niya alam kung talagang hinahanap ng bise Presidente ang Pangulo subalit may mga taong malalapit dito ang naghahanap sa Pangulo.

Tinukoy din ni Roque ang spokesman ni Robredo na si Atty. Barry Gutierrez na umano’y binatikos ang Pangulong Duterte sa pasya nitong mananatili lamang sa Malakaniyang habang binabayo ng bagyong Uysses ang Luzon.

Sumagot naman si Gutierrez sa pamamagitan ng tweet nyang ang bagyo ang pumatay sa mga Pilipino at nagdulot ng malaking pinsala subalit inuubos ng administrasyon ang oras nito sa pagbibigay kahulugan sa mga tweet ng mga anak ng Vice President.

Nagtanong pa si Gutierrez kung sino ang namumulitika gayong si Robredo ay balik trabaho na samantalang ang Malakanyang ay 3 araw nang hindi tinatantanan ang bise Presidente.

Bumulusok sa 7 antas ang English proficiency o galing sa pagsasalita ng ingles ng mga Pilipino.

Batay sa inilabas na global ranking ng international language training company na education first mula sa 20th spot noong isang taon nasa rank 27 na ang Pilipinas sa 2020 English Proficency Index matapos umiskor ng 562 mula sa 700 points.

Nangunguna naman sa global ranking ang Netherlands sa 652 output nito.

Samantala pumuwesto naman sa ika-2 ang Pilipinas sa English competency sa asya o sunod sa Singapore na nasa 10th rank sa global index matapos magtala ng 611 points.

Ayon sa education first ang Pilipinas ay mayroong markang “high” sa proficiency band na may kinalaman sa paggawa ng presentation habang nasa trabaho, pag-intindi o comprehension sa mga television shows at pagbabasa ng diyaryo.

Ang index ay ibinase sa mga survey na isinagawa sa pamamagitan ng isang online quiz na sinalihan ng mahigit 2-M indibidwal mula sa 100 bansa at teritoryo.

Maaawa ang mga senador sa kanilang sarili at magmumukhang barangay kagawad kapag nakita ang napakalalaking  infrastructure funds para sa mga congressional district .

Ayon ito kay Senador Panfilo Lacson makaraang  ibunyag ang  220 congressional districts na tatanggap ng hindi bababa sa P1-B na infrastructure funds na pinakamataas ay P15.351-B batay na rin sa inaprubahang bersyon ng 2021 budget sa kamara.

Sinabi ni Lacson na P620-M naman ang pinakamababang infra funds sa ibang congressional district na hindi  kasama sa  bilyones ang halaga ng budget allocation sa imprastraktura.

Sa  impormasyon ni Lacson ang mga kongresista ang nasa likod ng malalaking infra funds at hindi ang DPWH.

Hindi naman pinangalanan ni Lacson ang kongresista sa mga tinutukoy nyang distrito para ma-focus lang sila sa pondo at hindi sa mga personalidad

Pumapalo na sa 413, 430 ang kumpirmadong kaso ng  COVID-19 sa bansa matapos maitala sa 1, 337 ang mga bagong kaso ng impeksyon.

Ayon sa Department Of Health, Davao City ang nakapagtala ng pinakamataas na bagong kaso ng COVID-19 na nasa 110, sumunod ang Laguna – 74, Quezon City – 66, Batangas – 54 at lungsod ng Maynila – 53.

Nasa 286 ang nadagdag na mga bagong gumaling sa COVID-19 kayat pumapalo na sa 374, 939 ang total recoveries sa nasabing sakit.

Halos 8k na ang death toll nang madagdag ang 41 mga bagong nasawi sa COVID-19.

Nasa 30, 492 ang active cases na sumasailalim sa gamutan o quarantine  kung saan 84. 5% ang mild, 8 % ang asymptomatic, 2. 5%  ang severe at 4.7%  ang critical condition.

Samantala, target ng gobyerno na maselyuhan ngayong buwan ang kasunduan ng supply ng COVID- 19 vaccine mula sa mga manufacturer sa China, United Kingdom at Amerika.

Ayon ito kay Vaccine Czar Carlito Galvez, Jr.  na nagsabi ring tiyak nang makakuha ang Pilpinas ng 30 hanggang 50-M supply ng COVID-19 vaccine.

Ipinabatid ni Galvez na mababa at negotiable ang presyong nakuha ng gobyerno para sa mga nasabing bakuna mula sa 2 hanggang 3 kumpanya kapag nakuha ng Pilipinas ang commitment ng mga ito hanggang sa katapusan ng buwang ito.

3 manufacturers pa aniya ang kinakausap nila at nakausap na niya ang UK at Chinese embassies gayundin ang US embassy para sa supply ng bakuna na kapag naselyuhan na ang advance market commitment ay kaagad ilalatag ng mga ito ang kanilang manufacturing supply.

Inihayag ni Galvez na posibleng pinakamaagang makapag-supply ng COVID-19 vaccine sa bansa o sa unang quarter ng 2021 ang Russia.

Sinabi pa ni Galvez na sa posibleng 50-M COVID-19 vaccine supply tiyak na ang 17-M mula sa Covax facility at maaaring mapasakamay ng bansa sa Mayo o Hunyo ng susunod na taon.