Judith Estrada-Larino

Tiniyak ng Palasyo na 70%  ng populasyon ng Pilipinas ang mababakunahan kontra COVID-19.

Ito ayon kay Presidential Spokesman Harry Roque ay kasunod ng kasunduan ng  Food and Drug Administration (FDA) sa US State Department hinggil sa bakunang gawa ng Pfizer bukod pa sa kasunduan ng Pilipinas sa iba pang bansa para sa dagdag na bakuna.

Sinabi ni Roque na uunahing bigyan ng bakuna ang 20 milyong frontliners, mga beneficiary ng pantawid pamilyang Pilipino program ng DSWD, mga sundalo at pulis bilang pagtupad na rin aniya sa pangako ng Pangulong Rodrigo Duterte.

Walang ginawang pambu-bully si Presidential Spokesman Harry Roque sa mga anak ni Vice President Leni Robredo matapos na direkta umanong atakihin ang Pangulong Rodrigo Duterte sa social media noong kasagsagan ng Bagyong Ulysses.

Ayon kay Roque, ang sinasabi lamang niya ay nagkomento ang mga anak ng bise presidente hinggil sa pagresponde ng pangulo noong bagyo.

Sinabi ni Roque na hindi nila batid kung sino ang nambu-bully, subalit isiniwalat lamang nilang talagang nagsalita ang mga anak ni Robredo sa isyu ng #NasaanAngPangulo.

Nagtrending ang #NasaanAngPangulo sa Twitter sa kasagsagan ng Bagyong Ulysses subalit hindi naman ito ginamit ng magkapatid na Aika at Tricia sa palitan nila ng mensahe sa Twitter.

Isinulong ng International Labour organization (ILO) ang pagpapatatag pa sa pension system sa third world countries tulad ng Pilipinas, sa gitna na rin ng patuloy na hamon ng coronavirus disease 2019 (COVID-19) pandemic.

Ito, ayon sa ILO, ay dahil maraming indibidwal na kahit dekada na sa kanilang mga trabaho ay wala pa ring ibang benepisyo maliban lamang sa kanilang buwanang suweldo.

Sinabi ni Nuno Meira Cunha, senior specialist on social protection ng ILO, na kahit mayroong mekanismo tulad ng Social Security System sa Pilipinas, hindi pa rin ito sapat para matulungan ang mga empleyado na kakarampot lamang anila ang kinikita.

Hindi lamang anito pension scheme ang nasusubukan subalit maging ang bulsa ng mga Pilipino at hindi imposibleng mas malaking problema sa hinaharap kung hindi maayos na mapoprotektahan ang mga maliliit na manggagawa.

Iminungkahi rin ng ILO sa gobyerno na pag-aralan ang tinatawag na universal pension kung saan mabibigyan ng pensyon ang senior citizens kahit wala silang kontribusyon sa SSS o iba pang institusyon tulad ng Government Service Insurance System.

Magiging magastos ito sa gobyerno subalit malaki naman anito ang maiaambag nito sa ekonomiya ng bansa sa mga darating na panahon.

Nasa 36 ang rank ng Pilipinas mula sa 39 na bansang pasok sa 2020 Mercer CFA Institute Global Pension Index.

Nagpapasaklolo na sa Pangulong Rodrigo Duterte ang mga biktima ng Maguindanao Massacre para makuha ang danyos matapos mahatulang guilty ang mga akusado sa kaso.

Kasunod na rin ito sa paggunita sa ika-11 taon ng Maguindanao massacre ngayong araw na ito kung saan halos 70 ang nasawi kabilang ang maraming media men.

Sinabi ng pamilya ng mga biktima ng massacre na pagod na silang magtiis pa ng dagdag na 10 taon para makuha ang moral damages na ipinasiya ng korte para sa kanila.

Inamin ng pamilya ng mga biktima na kung alam lamang nilang tatagal ang proseso sa pagbibigay ng moral damages sa kanila, noon pa sana ay tinanggap na nila ang alok na pera sa kanila.

Tiwala ang gobyerno sa tagumpay ng antigen pilot testing para mapalakas pa ang local tourism na matinding hinagupit ng coronavirus disease 2019 (COVID-19).

Ayon kay Presidential Spokesman Harry Roque, ang antigen test na nasa pilot run sa Baguio City ay nakikitang mura at mas mabilis na alternatibo sa RT-PCR testing na isa sa mga requirement para sa sinumang bibisita sa mga travel destinations na una nang binuksan sa publiko.

Ang pahayag ni Roque ay kasunod na rin ng obserbasyong iilan lamang ang nagtutungo sa mga tourist spots tulad ng Baguio City at Boracay Island matapos isara ng ilang buwan dahil sa mga kumplikadong requirements na itinakda ng mga otoridad.

Una na ring pinaboran ni Tourism Secretary Bernadette Romulo-Puyat ang antigen test dahil sa bilis na paglabas ng resulta nito kumpara sa RT-PCR testing.

Posibleng dumami pa ang mga Pilipinong mag-o-online selling kahit pa luwagan ng gobyerno ang ipinatutupad na quarantine sa bansa.

Ito, ayon kay Trade Secretary Ramon Lopez, ay dahil nakita ng mga Pilipino ang bilis at magandang transaksyon ng online business.

Magugunitang tumaas ang bilang ng mga pumapasok sa online selling mula nang ipatupad ang lockdown dahil sa coronavirus disease 2019 (COVID-19) pandemic.

Inaasahan rin ng Department of Trade and Industry (DTI) na dadami pa ang bilang ng mga magbubukas ng negosyo ngayong unti-unti na ring binubuksan ng bansa ang ekonomiya.

Hindi dapat ginagamit na panggamot sa mga pasyente ng COVID-19 ang anti-viral drug na Remdesivir.

Ito, ayon sa World Health Organization (WHO) guideline development group, ay dahil walang sapat na ebidensyang magpapatunay na ang Remdesivir ay nakapagpapabuti sa kondisyon ng pasyente.

Una nang inaprubahan sa Amerika, European Union at iba pang mga bansa ang pansamantalang paggamit ng gamot matapos lumitaw sa pag-aaral na pinabibilis nito ang recovery time ng COVID-19 patients.

Mismong si US President Donal Trump ay ginamitan ng Remdesivir nang siya ay magpositibo sa sakit.

Inaprubahan na ng US Food and Drug Administration ang  coronavirus disease 2019 (COVID-19) self-testing kit na uubra sahome use.

Ang single use test ay kayang makapaglabas bg resulta sa loob lamang ng 30minuto.

Ang naturang self-testing kit ay gawa ng kumpanyang Lucira Health na napagkalooban na ng emergency use authorization for home use.

Ginagamitan din ang test ng self-collected nasal swab samples para sa mga indibidwal na may edad katorse pataas na suspected COVID-19 patient.

Sinabi ni FDA Commissioner Stephen Hahn na ito ang maituturing na unang self-administered COVID-19 test kit na maaari ring gamitin sa mga pagamutan.

Ikinakasa na ng Department of Trade and Industry (DTI) ang iba’t ibang infrastructure commitments nito sa Taiheiyo Cement Group para masuportahan ang demand sa pabahay sa bansa, commercial at infrastructure development sector lalo na sa pinalawak na Build, Build, Build program.

Ang kasunduan, ayon kay DTI Secretary Ramon Lopez ay bahagi ng letter of intent na nilagdaan ng DTI at Taiheiyo para pataasin ang production capability ng kumpanya kabilang ang pagpapalawak sa shipping bases nito mula sa Cebu patungo sa ibang lugar tulad sa Luzon, Iloilo at Davao.

Committed din ang Taiheiyo na mapalawak ang logistics at maging environmental protection programs sa pamamagitan ng paglalagay ng 2km marine belt conveyor , expansion ng berth at jetty sa San Fernando, Cebu at pag-adopt ng energy efficient production processes.

Binigyang diin ni Lopez na ang bagong Traiheiyo cement expansion project ay isang strategic investment hindi lamang sa Build,  Build, Build program kundi sa pananaw na makaagapay sa demand ng economic recovery ng bansa na tinataya ng world bank at international monetary fund na aabot sa 6.2 hanggang 6.8% sa 2021.