Judith Estrada-Larino

Nakiisa ang Malakaniyang sa paggunita sa ika-11 anibersaryo ng Maguindanao massacre.

Sinabi ni Presidential Spokesman Harry Roque na nakamit na ang hustisya sa ilalim ng Administrasyong Duterte dahil nakakulong na ang magkapatid na ampatuan at ang hatol na guilty sa mga nag-plano ng masaker ay katarungan na rin para sa mga biktima at kaanak ng mga nasawi sa nasabing krimen.

Tiniyak ni Roque ang pag-aresto sa iba pang suspek na nakakalaya pa rin at hindi nakakalimot ang Palasyo na mapanagot ang mga ito sa ginawang krimen.

Nasa kabuuang 58 kabilang ang 32  media workers ang nasawi sa nasabing masaker nuong 2009 habang patungo sa pagpa-file ng kandidatura ng nuoy Buluan Town Vice Mayor Esmael Mangudadatu laban sa nuoy incumbent Mayor Andal Ampatuan, Jr.

Hinimok ng isang grupo ng mga Pinoy nurses ang gobyerno na alisin na nito ang cap o itinakdang bilang ng health workers na papayagang mag-abroad at bayaran ang mga nagsisilbing frontliner laban sa COVID-19.

Ayon kay Maristela Abenojar, national president ng Filipino Nurses United halos 30,000 healthcare workers ang hindi pa nakakatanggap ng ilang buwang suweldo nila, hazard pay at special risk allowance.

Tila aniya killing me softly ang nangyayari sa kanilang mga nurse unti-unti silang pinapatay sa pagiging exposed nang hindi nabibigyan ng sapat na proteksyon sa COVID-19 kasabay nito ay pinapatay din sila sa gutom.

Dahil dito ipinaabot ni Abenojar ang panawagan nila sa gobyerno lalo na ngayong malapit na ang pasko na maawa sa kanilang mga nurse at iba pang health workers at kumilos na para makuha nila ang perang para sa kanila.

Una nang inaprubahan ng Pangulong Rodrigo Duterte ang pag-lift ng ban sa pagpapadala ng Pinoy health care workers sa ibayong dagat sa gitna ng COVID-19 pandemic na may limitasyon lamang na hanggang 5,000 kada taon.

Inaasahang i-aanunsyo ng Malakaniyang ngayong linggo ang price cap sa COVID-19 testing.

Ito ayon kay Presidential Spokesman Harry Roque ay dahil tinatalakay pa ng DOH at DTI ang price range ng coronavirus diseases tests.

Una nang nagpalabas ng executive order 118 ang Pangulong Rodrigo Duterte na nag aatas sa DOH at DTI na magpatupad ng price cap sa COVID-19 testing at test kits para matiyak ang accessibility at affordability ng mga ito.

Kung sumuway sa price cap maaaring bawiin ang lisensya o accreditation ng health establishments na nago-operate ng COVID-19 diagnostic laboratory.

Nakatakdang magsumite ng panibagong data ang mga expert sa Inter-Agency Task Force for the Management of the Emerging Infectious Diseases (IATF)  sa loob ng linggong ito kaugnay sa mga kaso ng COVID-19.

Ito ayon kay Presidential Spokesman Harry Roque Ang magiging batayan ng IATF sa kanilang isusumite namang rekomendasyon sa Pangulong Rodrigo Duterte para sa magiging susunod na quarantine classification para sa susunod na buwan.

Ang Metro Manila at karatig lalawigan ay nasa ilalim ng general community quarantine hanggang Nobyembre 30, 2020.

Nauna nang inihayag ng Metro Manila mayors na nais nilang panatilihin pa rin sa ECQ status ang kalakhang maynila hanggang katapusan ng taon.

Ipinag-utos ng Department of Labor And Employment (DOLE) ang work stoppage sa construction project sa Skyway extension site sa Muntinlupa sa pagbagsak ng steel grider nuong Sabado na ikinasawi ng isa katao at ikinasugat ng apat na iba pa.

Ang kautusan ng DOLE-NCR  ayon kay labor spokesperson Rolly Francia ay sumasakop sa buong kahabaan ng nasabing proyekto o mula Susana Heights sa Muntinlupa City patungong Sucat sa Parañaque.

Sinabi ni Francia na ang hakbang ay para bigyang daan ang imbestigasyon upang malaman ang mga paglabag na nagawa sa construction site at alamin din ang hawak na lisensya ng contractors at sub-contractors bukod sa kung may paglabag sa labor and safety standards.

Ang suspensyon aniya ay tatagal hanggang i-lift ito ng regional office o makumpleto ang imbestigasyon sa nasabing insidente.

Ipinabatid ni Engr. Noel Binag, executive director ng Occupational Safety and Health Center ng DOLE na makikita sa mga video na walang traffic enforcers at warning signs sa lugar nang mangyari ang insidente.

Inihayag ni Binag na kailangang magsumite ang kumpanya ng incident report sa dole sa loob ng 24 oras para hindi maharap sa multa.

Kapag natanggap na ang incident report ipinabatid ni Binag na kaagad nilang iba validate ang report bago gumawa ng technical report na maaaring gamitin ng pamilya ng mga biktima sa paghahain ng reklamo.

Halos 2,000 pang customers ng Meralco ang wala pa ring supply ng kuryente matapos maapektuhan ng Bagyong Ulysses.

Ayon sa Meralco kabilang sa wala pa ring supply ng kuryente ang ilang customers sa mga bayan ng San Miguel, Sal Ildefonso, Norzagaray at Paombong sa Bulacan at Candaba sa Pampanga.

Tiniyak naman ng Meralco ang restoration efforts ng Meralco para maibalik ang supply ng kuryente sa mga apektadong lugar.

Posibleng masimulan na sa susunod na buwan ang clinical trials ng potential COVID-19 vaccine sa Pilipinas.

Ayon kay Dr. Jaime Montoya , Executive Director ng DOST-Philippine Council for Health Research Development (PCHRD) naka-depende sa compliance ng manufacturers sa requirements ng Food and Drug Administration ang pagsisimula ng clinical trials.

Ito aniya ay bagama’t sa Disyembre naman itinakda ng World Health Organization ang solidarity trial para sa potential COVID-19 vaccines.

Sinabi ni Montoya na kabilang sa mga nag apply paa sa clinical trials sa bansa ang Sinovac mula sa China, Janssen, Sputnik 5 mula Russia, Clover Biopharmaceuticals at Astrazeneca.

Para makapagsagawa ng clinical trials sa bansa kailangan munang makakuha ng clearance ang potential vaccine manufacturer mula sa panel of vaccine experts sa ilalim ng DOST bago makakuha ng approval mula sa ethics board at FDA.

Una nang inihayag ni FDA Director General Eric Domingo na tanging ang Sinovac pa lamang ang nakakakuha ng clearance mula sa vaccine expert panel.