Naibalik na ng Converge ang serbisyo nito sa lahat ng kaniyang service areas.
Batay ito sa advisory ng Converge matapos madismaya ang mga subscriber nito sa biglaang pagkawala ng signal, ala-1 ng hapon kahapon, kaya’t maraming online classes ang nakansela na.
Tiniyak ng Converge ang tuluy-tuloy na pagpapabuti sa kanilang mga pasilidad para masigurong hindi na mauulit ang problema.
Nagpasalat naman ang Converge sa kanilang subscribers.
Hinikayat ni Health Secretary Francisco Duque III ang Pangulong Rodrigo Duterte na maglabas ng executive order para sa Emergency Use Authorization (EUA) ng coronavirus disease 2019 (COVID-19) vaccine.
Sinabi ni Duque na makakatulong ito upang mapaikli ang pagbibigay ng Food and Drug Administration (FDA) ng grant para sa emergency use authorization ng iba’t ibang bakuna na papasok sa bansa mula anim na buwan.
Ayon pa kay Duque, dahil sa EUA ay maaaring gumamit ang bansa ng mga gamot, bakuna at iba pang health technologies sa pamamagitan ng process of reliance at recognition.
Ang reliance ay tumutukoy sa proseso ng pagtitiwala ng FDA sa mga evaluation na ginawa ng National Regulatory Authorities (NRA) sa ibang bansa sa pagdedesisyon naman nito ng application sa Pilipinas.
Habang ang recognition naman ay acceptance ng FDA ng regulatory decision ng NRA o iba pang trusted institutions.
Inihayag pa ni Duque na magagamit lamang ang EUA kung mayroong medical health emergency, serious o life threatening disease at iba pa.
Magsasagawa naman ang FDA ng post-marketing surveillance activities at ang EUA ay maaaring i-revise o i-revoke ng nasabing ahensya kung kinakailangan para maprotektahan ang kalusugan ng taumbayan.
Nagtrending sa twitter ang tatlong ‘hashtag’ na ang topic ay ang Pangulong Rodrigo Duterte, matapos niyang paringgan si Vice President Leni Robredo.
Kabilang sa tatlo sa limang Top Philippine Trends sa Twitter, miyerkules ng umaga, ang #DuterteMeltDown, #NasiraanAngPangulo at #NaasarAngPangulo.
Maraming netizens ang nadismaya nang sabihan ng pangulo si Roberedo na itigil ang pakikipagkumpetensya sa kaniya sa pagtugon sa kalamidad.
Sa kaniyang talumpati kagabi, 20-minutong binanatan ng pangulo si Robredo na aniya’y naiisip niyang may pakana nang pagkalat ng hashtag na nasaan ang pangulo noong kasagsagan ng pananalasa ng Bagyong Ulysses.
Subalit ayon kay Robredo, kahit minsan ay hindi siya nagtanong o hinanap ang pangulo.
Maaari aniyang nabulungan na naman ng ‘fake news’ ang pangulo kaya’t pikon na pikon na naman ito sa kaniya.
Hindi muna uubrang tumuntong ng China ang mga Pilipinong mayroong valid na visa at residents permits dahil sa banta ng coronavirus disease 2019 (COVID-19).
Ayon ito sa Chinese government, bagamat exempted sa temporary entry ban ang mga Pilipinong may hawak na diplomatic, service, courtesy and crew visas.
Ang mga non-Chinese nationals na nasa Pilipinas na naisyuhan ng visa pagkalipas ng ika-3 ng Nobyembre ay hindi rin apektado.
Naharang ng Philippine Coast Guard ang dalawang lantsa sa karagatang sakop ng Barangay Bato-Bato sa Indanan, Sulu.
Sa isinasagawang coastal security patrol ng PCG, ininspeksyon nito ang ML FAIDA, sakay ang siyam nitong crew at natuklasan ang 39 master cases ng smuggled na sigarilyo, matapos walang maiprisintang vessel o safety certificate at walang boat captain.
Ang naturang kontrabando ay nai-turn over na sa Bureau of Customs para sa kaukulang imbentaryo. — ulat mula kay Aya Yupangco (Patrol 5)
INCIDENT REPORT: The PCG has intercepted ML FAIDA and its nine ship crew, for the absence of a boat captain and vessel safety certificate, as well as the presence of 39 cases of smuggled cigarettes onboard.https://t.co/X1fIclHfgi#DOTrPH#CoastGuardPH#MaritimeSectorWorks pic.twitter.com/WItYZrPzmA
— Philippine Coast Guard (@coastguardph) November 18, 2020
Nasa 11 road sections na lamang ang nananatiling sarado matapos manalasa ng Bagyong Ulysses.
Ayon sa Department of Public Works and Highways (DPWH), dalawang kalsada ang sarado pa sa Cordillera Administrative Region (CAR), tatlo sa Region 2, lima sa Region 3 at isa sa Region 4A kasunod nang naitalang soil collapse, landslide, road slip, mudflow at pagbaha.
Patuloy ang clearing operations ng DPWH sa mga apektadong kalsada para mabuksan ito sa mga motorista sa lalong madaling panahon.
Ikinakasa na ng kumpanyang Pfizer ang application nito para sa emergency use approval ng kanilang coronavirus disease 2019 (COVID-19) vaccine, anumang araw ngayong linggo.
Ayon sa Pfizer, nakumpleto na nila ang pagkolekta ng safety data na isusumite nila sa US Food and Drug Administration (FDA).
Ang bakuna ng Pfizer ay binuo, katuwang ang BioNTech ng Germany, na batay sa resulta ng testing ay mayroong mahigit 90% effectivity rate pagkatapos ng ikalawang dose.
Sinabi ng Pfizer na makikipag-ugnayan na sila sa US FDA para maihain ang application para sa emergency use authorization.
Desidido si Manila Mayor Isko Moreno na ibalik sa lahat ng paaralan sa lungsod ang Good Manners and Right Conduct (GMRC) program.
Binigyang diin ni Moreno sa kaniyang pakikipagpulong sa mga opisyal ng Department of Education at Manila Division of City Schools ang kahalagahan ng GMRC program sa mga kabataan na aniya’y napapanahon nang ibalik sa mga ito ang paggalang at pagmamalasakit sa isa’t isa.
Ipinabatid ni Moreno na magsasagawa siya ng information campaign tulad ng seminars para sa GMRC program sa mga mag-aaral at guro.
Bukod sa pagbabalik ng GMRC, handa ring pondohan ng city government ang Science, Technology, Engineering and Mathematics (STEM) program para sa senior high schools sa pamamagitan ng pagtatayo ng mas maraming science and math laboratories.
Magugunitang binabalangkas na ng national government ang implementing rules and regulations ng Republic Act 11476 o kilalang GMRC and Values Education Act.
Nagkabit ng mga bagong CCTV cameras ang pamunuan ng Manila Metro Rail Transit System Line 3 (MRT-3) sa mga istasyon nito bilang bahagi ng malawakang rehabilitasyon na isinasagawa sa buong linya.
Sa kabuuan, nasa 59 na ang mga bagong CCTV camera units ang naikabit na sa North Avenue Station, Quezon Avenue Station at GMA Kamuning Station.
Nakapaglagay rin ng mga bagong platform monitors sa mga nasabing istasyon.
Target na makapaglagay ng mga bagong CCTV camera units sa lahat ng mga istasyon ng MRT-3 para maging tulong na mapanatili ang kaayusan sa MRT-3 area.
Mayroon ding mga nakadeploy na station at train marshalls sa mga istasyon at loob ng mga tren para mapanatili ang kaayusan at mapaalalahanan ang mga pasahero sa mga health at safety protocols na ipinatutupad ng linya.
MAGANDANG BALITA!
Mga bagong CCTV cameras, naikabit na sa mga istasyon ng MRT-3
BUONG DETALYE: https://t.co/7UnsN4v78I#DOTrPH #DOTrMRT3#SulongMRT3 pic.twitter.com/c6d97nOtb9
— DOTr MRT-3 (@dotrmrt3) November 16, 2020
Pinalawig ng PhilHealth ang dialysis coverage nito, mula 90 ay naging 144 sessions na ito hanggang sa ika-31 ng Disyembre.
Ayon kay PhilHealth President Dante Gierran, kaagad silang magpapalabas ng guidelines para sa pagpapalawig ng dialysis coverage na una nang inaprubahan ng Board of Directors.
Dahil dito, ipinag-utos ni Gierran sa lahat ng regional offices at kinauukulang healthcare facilities na patuloy na kilalanin ang lahat ng availment sa lampas 90 session-limit depende sa prescription ng doktor.
Inabisuhan din ang mga pasyente na nagbayad sa kaniyang hemodialysys sessions na magfile ng claims sa pinakamalapit na PhilHealth office.
Una nang lumutang ang mga sumbong na ilang private clinics ang sumusuway sa PhilHealth policy hinggil sa kawalan ng limit sa dialysis sessions habang nasa state of calamity ang bansa hanggang ika-31 ng Disyembre dahil sa coronavirus disease 2019 (COVID-19) pandemic.