Tuluy-tuloy ang paghahanap ng Filipino community sa Pinoy dialysis nurse na nawawala sa New York, USA.
Kinilala ang Pinoy nurse na si Leo Sactigador, 39 anyos at nagtatrabaho sa Mount Sinai Hospital sa New York City.
Ayon sa report, si Castigador ay nawala sa 125th St. sa Manhattan, New York nitong nakalipas pa ng araw ng linggo.
Ang nasabing lugar kung saan nawala si Castigador ay pinamumugaran umano ng Black Americans.
Kanselado ang pagbisita sa bansa ni Japanese Prime Minister Yoshihide Suga dahil sa pagtaas ng kaso ng coronavirus disease 2019 (COVID-19).
Ayon kay Presidential Spokesman Harry Roque, iginagalang ng Malacañang ang pasya ni Suga na ipagpaliban ang pagdalaw sa Pilipinas lalo pa’t katuwang ng bansa ang Japan sa laban kontra COVID-19.
Ang punong ministro ng Japan ay nakatakdang bumisita sana sa bansa ngayong taon kasabay ng 65 anibersaryo mng bilateral relations ng dalawang bansa.
Kanya-kanyang interpretasyon na ang lumabas matapos ihalintulad ni Lt. Gen. Antonio Parlade ang istorya sa bibliya ni Eba at ng mansanas sa organizer ng Maginhawa Community Pantry.
Binigyang diin ito sa DWIZ ni Parlade matapos linawin na hindi niya ikinukumpara kay “Satanas” si Anna Patricia Non.
Nagugulat na lamang aniya siya sa mga lumulutang na iba’t iba’t interpretasyon sa nasabing pahayag niya.
Hindi [totoo ‘yan], mali, interpretation nila ‘yan. Ako, nagsa-cite lang ako ng example. Sabi ko, let’s not belittle an act of one, of one person, I’m not saying si Ana Patricia ito. I’m just saying na ‘yung mga ganyang bagay sa pandemya, nagsisimula lang sa isang maliit na maliit na bagay. I cited nga si Eve atsaka ‘yung mansanas, dun lang nagsimula ‘yon, e, of course, bibigyan nila ng magandang twist ‘yan para maging controversial, para alam mo na, d’yan sila magaling,” ani Parlade.
Inihalimbawa ni Parlade ang naging takbo nang dagsa ng kanyang media interviews nitong nakalipas na mga araw na nagmula sa umano’y pag-amin niyang isinasailalim nila sa profiling ang mga organizer ng community pantries sa bansa dahil sa posibleng paggamit dito ng New People’s Army (NPA).
Tinawagan pa aniya siya mismo ni Defense Secretary Delfin Lorenzana para kumpirmahin kung talagang binanggit niya ang pagpo-profiling sa mga organizers ng community pantries.
In fact, may statement ako sa Twitter at Facebook, pinakalat ko ‘yan. Kasi ‘yung Inquirer, ‘yan magaling ‘yan mag-twist, I’m sorry sa mga kasama natin sa media, but alam mo, minsan para lang bumenta, kung anu-anong words ang iniimbento nila para maging controversial,” ani Parlade. —sa panayam ng IZ sa Alas Sais
Hindi dapat masamain ang mga itinatayong community pantry na nagbibigay ng libreng pagkain para sa mga Pilipino.
Ayon ito kay political analyst Professor Ramon Casiple na nagsabi ring kahit ano pa mang motibo ng mga community pantry na ‘yan, kung makakatulong naman ito para sa mga Pilipino lalo na kung libre, walang dapat kuwestyunin sa mga ganitong hakbangin.
Sa halip aniya ay dapat pang itaguyod o suportahan ang pagtatayo ng mga community pantry.
‘Yung pantries na ‘yan, e, sa panahon na nagugutom ang mga tao, walag trabaho, hindi mo na dapat itanong ‘yan. Sasabihin mo na may masamang motibo ‘yung mga nag-ano niyan, wala naman akong nakikita sa totoo lang. Libre ‘yan,” ani Casiple. —sa panayam ng Balitang Todong Lakas
Tila nagsisimula na ang labanan sa pulitika kaugnay sa 2022 national elections.
Ito, ayon kay political analyst Professor Ramon Casiple, ay matapos sumulpot ang mga grupong nananawagan na magresign na ang Pangulong Rodrigo Duterte.
Hindi naman aniya siya naniniwalang walang halong pulitika ang mga katulad na panawagan.
Naniniwala si Casiple na valid naman bilang election issues ang coronavirus disease 2019 (COVID-19) response at West Philippine Sea sa dahilan kaya’t pinagbibitiw sa tungkulin ang Pangulong Duterte.
Inamin ni Casiple na matagal tagal niyang inabangan ang mga galawang pang-eleksyon matapos ang pagkalat noong mga nakalipas na buwan ng tarpaulin na nagpapatakbo kay Davao City Mayor Sara Duterte-Carpio sa presidential elections.
Alanganamang sabihin mong mali sila pero hindi mo naman maiiwasan na kahit anong gawin mo, lalo na ‘yung mga ganyang klaseng panawagan, e, may epekto ‘yan sa pulitika. Kaya noong narining ko ‘yan, ‘yung ganyang panawagan, e, simula na nga ang labanan sa pulitika,” ani Casiple. —sa panayam ng Balitang Todong Lakas
Mahigpit na babantayan ng Task Force Disiplina ng Quezon City ang halos 50 community pantry sa lungsod.
Ito, ayon kay Rannie Ludovica, pinuno ng Task Force Disiplina, ang kabilin-bilinan ni Quezon City Mayor Joy Belmonte.
Sinabi sa DWIZ ni Ludovica na mahigpit nilang ipatutupad ang health protocols lalo na’t marami ang pipila o dadagsa sa mga community pantry sa kanilang syudad lalo’t mataas ang kaso ng coronavirus disease 2019 (COVID-19) sa Quezon City.
Ang marching order ni mayor, kailangan magkaroon ng kaayusan sa bawat community pantries. Kasi meron nang almost 47 community pantries sa Quezon City, na kailangan ma-implement pa rin ang health protocols dahil under MECQ pa rin tayo,” ani Ludovica. —sa panayam ng IZ sa Alas Sais
Dismayado ang kampo ni dating senador Ferdinand “Bongbong” Marcos, Jr. sa pagbasura ng presidential electoral tribunal (PET) sa kaniyang electoral protest sa 2016 vice presidential elections.
Ayon kay Atty. Vic Rodriguez, abogado ni Marcos, hindi hinayaan ang kanilang kampo na maglatag pa ng mga patunay hinggil sa anito’y malawakang dayaan sa Mindanao sa nakalipas na vice presidential elections.
Binigyang diin ni Rodriguez na dapat gawin ng PET ang lahat ng makakaya nito para mabatid kung sino talaga ang tunay na nanalong bise presidente dahil tila aniya ipinagkakait nito sa publiko na mahayag kung sino talaga ang tunay na vice president ng bansa.
Pinasaringan naman ng kampo ni Marcos si Supreme Court Associate Justice Marvic Leonen na siyang nagsulat ng PET ruling na nagbabasura sa election protest laban kay Vice President Leni Robredo na pinaboran ng 14 pang mahistrado.
Bahagyang bumagal bagamat napanatili ng Bagyong Bising ang lakas nito habang nasa bahagi ng Cagayan Valley.
Ayon sa PAGASA, ang sentro ng Bagyong Bising ay pinakahuling namataan sa layong 360 kilometers silangan ng Tuguegara City, Cagayan Valley.
Taglay ng Bagyong Bising ang pinakamalakas na hanging umaabot sa 175 kilometers kada oras malapit sa gitna at may pagbugso na umaabot sa 215 kilometers kada oras.
Ang Bagyong Bising ay kumikilos pa-hilagang kanluran sa bilis na 10 kilometro bawat oras.
Nananatili namang nakataas ang Tropical Cyclone Wind Signal Number 1 mga sumusunod na lugar:
• Batanes
• Cagayan including Babuyan Islands
• Eastern portion of Apayao
• Eastern portion of Kalinga
• Eastern portion of Isabela
• Northeastern part of Quirino
• Northern part of Aurora
Itinalaga bilang bagong commander ng Joint Task Force COVID-19 Shield ang bagong Deputy Chief PNP for Operations na si Police Lt. General Joselito Vera Cruz.
Kasunod na rin ito nang pagreretiro ni Police Lt General Cesar Hawthorne Binag sa Sabado, ika-24 ng Abril.
Ipinabatid ni PNP Chief Debold Sinas na epektibo kahapon, ika-20 ng Abril, ang pag-upo ni Vera Cruz sa puwesto matapos maghain ng non-duty status si Binag.
Tiniyak ni Sinas na ipagpapatuloy ni Vera Cruz ang mga gampanin ng Joint Task Force COVID-19 Shield Commander sa pagpapatupad ng mga health and safety protocols gayundin ang seguridad sa nagpapatuloy na pagbabakuna.
Si Vera Cruz ay dating Chief of the Directorial Staff na ngayo’y hawak na ni Police Lt. General Ephraim Dickson. —ulat mula kay Jaymark Dagala (Patrol 9)
Sobra-sobra ang effort ng gobyerno para tugunan ang coronavirus disease 2019 (COVID-19) pandemic.
Ayon ito kay political at military analyst Professor Clarita Carlos, subalit noong isang taon pa dapat pinursige ang contact tracing na susi para mapigilan ang hawahan ng virus.
Gayunman, mas mabuti na ring tutukan ng gobyerno ang pagbabakuna bilang proteksyon ng mga Pilipino kontra COVID-19.
To be fair, talagang sobra ‘yung effort ng gobyerno dahil one year ago naman I’m sure alam mong konti lang ang alam natin sa COVID, at ngayon mas marami tayong alam. Pero dapat noon pa, March, na nag-umpisa tayong mag-lockdown, talagang pinagpurisgihan natin ang contact tracing. Kasi ‘yan talaga ang key sa paghabol talaga at paglawak ng pagkahawa. Siguro kailangan talagang ilapat ang vaccination,” ani Carlos. —sa panayam ng Balitang Todong Lakas