Iginiit ng defense panel na normal lamang ang sunud-sunod na pagtutol o objections habang tinatanong ng House prosecution panel ang testigo na si National Bureau of Investigation Senior Agent John Mark Calilung sa impeachment trial ni Vice President Sara Duterte.
Ito’y matapos mag-viral sa social media na puro “objections” ang ginagawa ni Defense Counsel Atty. Carlo Narvasa sa ikalawang impeachment trial ni VP Sara.
Ayon kay Attorney Micheal Poa, isa sa defense team ni VP Sara, bahagi ito ng karaniwang proseso sa paglilitis upang matiyak na nasusunod ang mga alituntunin sa pagtatanong at upang maitala sa rekord ang kanilang mga pagtutol, lalo na sa mga dokumentong inihaharap bilang ebidensya.
Dagdag pa ng kampo ng bise presidente na hindi nila itinuturing na “panalo” o “talo” ang mga naging pasya ng impeachment court sa unang dalawang araw ng paglilitis dahil nagsisimula pa lamang ang presentasyon ng mga testigo.
Sa kabila nito, sinabi ng defense panel na naging maayos at organisado ang takbo ng unang dalawang araw ng impeachment trial at igagalang nila ang mga pasya ng impeachment court. | via Jenn Patrolla (Patrol 38)
