Nauunawaan ng House Prosecution Panel ang sunud-sunod na objections na inihain ng defense team sa Day 2 ng impeachment trial laban kay Vice President Sara Duterte.
Ito ang sinabi ni House Prosecutor at Bicol Saro Party-list Rep. Terry Ridon sa press conference sa Senado na bahagi ng normal na proseso ng paglilitis ang sunud-sunod na paghahain ng objections upang maprotektahan ang interes ng isang kliyente.
Matatandaang sa Day 2 ng impeachment trial, patuloy ang “objection” ng defense team sa presentasyon ng ebidensya at testigo ng prosecution panel.
Ayon kay Ridon, may mga pagkakataong nagiging matindi o tila “impertinent” ang paggamit ng objections upang matiyak na hindi agad maipasok ang mga ebidensyang maaaring makapagdiin sa isang impeachable official.
Gayunman, iginiit ni Ridon na kung siya man ay bahagi o kabilang sa defense panel, ganito rin aniya ang kaniyang magiging hakbang bilang abogado.
Iginiit din ni Ridon na iginagalang ng House Prosecution Panel ang estratehiya ng depensa at malaya itong gumamit ng anumang trial strategy o legal tactics, ngunit nasa impeachment court pa rin ang pagpapasya kung tatanggapin o ibabasura ang bawat objection na inihahain sa paglilitis. | via Geli Mendez (Patrol 30)
