Judith Estrada-Larino

Tuluy-tuloy ang operasyon ng Maginhawa Community Pantry.

Tiniyak ito ni Ana Patricia Non, organizer ng nasabing pantry, dahil mas dumami pa ang mga nangangailangang pamilya at dapat makinabang sa mga libreng pagkain na nakalatag sa kanilang lamesa.

Ayon kay Non, mas pinagtutuunan niya ng pansin ang pagpapatuloy sa kanilang community pantry lalo na’t dumadagsa rin ang mga nais tumuwang sa kanila para makapagbigay ng libreng pagkain sa mga nangangailangang kapwa Pilipino.

Binigyang diin ni Non na hindi siya matatakot ng mga aniya’y “pananakot” ng gobyerno at pagdidiin sa kanya sa kilusang makakaliwa na mahigpit niyang inaalmahan.

Sumakabilang-buhay na ang ama ni Presidential Communications Operations Office  (PCOO) Secretary Martin Andanar.

Ayon sa kalihim, ang amang si Wencelito ay nasawi dahil sa liver cancer.

Sinabi ng batang Andanar na matagal na ring naka-confine ang 73 taong gulang na ama sa Veterans Memorial Medical Center.

Inaayos pa ng pamilya ang mga detalye sa burol at libing ng matandang Andanar.

Nagpakita muli ng puwersa ang Pilipinas sa pinagtatalunang West Philippine Sea.

Ipinabatid ni Assistant Secretary Omar Romero, spokesperson ng National Task Force on West Philippine Sea, na kabilang sa idineploy ang apat na karagatan at isang aircraft ng Philippine Coast Guard.

Gayundin ang limang barko ng Bureau of Fisheries and Aquatic Resources (BFAR), rubber boat at high-speed watercraft ng Philippine National Police (PNP) Maritime Group.

Ayon pa kay Romero, layon ng deployment na palakasin ang puwersa ng Pilipinas sa pinag-aagawang teritoryo at paigtingin ang operasyon laban sa mga ilegal na pangingisda at iba pang aktibidad.

Suportado naman ng Northern Luzon Command ng Armed Forces of the Philippines (AFP) ang sovereignty patrols ng Air Force, Navy, Coast Guard, BFAR at PNP.  —ulat mula kay Jaymark Dagala (Patrol 9)

Mahigpit na ipatutupad ng Task Force Disiplina ng Quezon City government ang health protocols sa pagpila sa mga community pantry sa lungsod.

Iginiit ito sa DWIZ ni Rannie Ludovica, pinuno ng Task Force, matapos kumpirmahin ang pagbibigay ng ticket sa mga lumabag sa curfew nang pumila sa Maginhawa Community Pantry kaninang bago pa mag-alas-5 ng madaling araw.

Binigyang diin ni Ludovica na buo ang suporta ng QC government sa community pantry bilang bahagi ng bayanihan subalit kailangang ipatupad ang health protocols at kunsiderasyon sa mga residente sa maginhawa area.

Nagpahayag na si Mayor Joy Belmonte na sinusuportahan nya ang bayanihan na ‘yan, pero gusto lang namin ipaalala sa mga taga-QC na tayo ay nasa MECQ pa rin, at base po rito ay may guidelines tayo na ang ating curfew ay mula 8PM hanggang 5AM. Pinatutupad lang din natn ‘yung tinatawag nating mga health protocols at sa mga taga QC para sa kabatiran niyo lang din,” ani Ludovica. —sa panayam ng IZ sa Alas Sais

Natiketan ang ilang residenteng pumila para sa Maginhawa Community Pantry sa Quezon City dahil may curfew pa.

Matapos ang curfew o alas-5 ng madaling araw, nagtakbuhan ang mga tao para lang makauna sa pila sa pantry sa gitna na rin nang patuloy na paalala ng mga otoridad na sundin ang physical distancing.

Ayon sa isang mangangalakal, malaking bagay sa kanila ang Maginhawa Community Pantry na ikatlong beses na niyang pinilahan.

Nalungkot naman ang mga natiketan na nagsabing sana ay pinagsabihan na lamang sila ng mga otoridad, lalo na’t P300 ang katapat na multa sa paglabag sa curfew sa Quezon City.

Iginigiit ni Labor Secretary Silvestre Bello III ang pagbawas sa quarantine period sa mga umuuwing Overseas Filipino Workers (OFWs).

Sinabi sa DWIZ ni Bello na iniiwasan nilang masimot ang pondo ng Overseas Workers Welfare Administration (OWWA) sa pagsagot sa lahat ng mga pangangailangan ng mga OFW, bukod pa sa may suporta ng mga doktor, ang pagpapaikli sa quarantine period.

Pagpapasyahan pa naman aniya ng Inter-Agency Task Force on Emerging Infectious Diseases (IATF) kung kailangang ibaba sa 10 mula sa 14 na araw ang mandatory quarantine period sa mga OFW at magsagawa ng rekomendasyon sa Pangulong Rodrigo Duterte.

Meron pa namang natitira, pero kailangan talagang ibaba. ‘Yun ang pinakiusap ko nga. Kung hindi ibababa sa dating quarantine period, e, talagang kukulangin na ang pondo ng OWWA at ‘yun ang iniiwasan namin. Malaking bagay ‘yon,” ani Bello.

Ipinabatid pa ni Bello na malaking pondo ang matitipid sakaling mabawasan ng apat na araw ang quarantine period ng mga OFW na nasa 10,000 hanggang 15,000 ang bumabalik sa bansa kada araw.

Ang laking discount ‘yon. We are actually… 10 to 15 000 OFWs everyday araw-araw ‘yan, pinapakain natin ‘ya,n binabayaran natin ang accommodation nila, napakalaking tulong ‘yan kung maibababa,” ani Bello. —sa panayam ng IZ sa Alas Sais

Nanawagan ang isang grupo ng kabataan sa Department of Education (DepEd) at Commission on Higher Education (CHED) para tugunan ang agarang pagsibak sa mga pasaway na guro.

Hinimok din ng Samahan ng Progresibong Kabataan (SPARK) ang DepEd at CHED na maging proactive sa paglaban sa kultura ng rape at gender violence sa mga paaralan.

Kasunod na rin ito ng napaulat na reklamong harassment sa ilang faculty members ng FEU High School Department.

Binigyang diin ng SPARK na hindi isolated cases ang sexual violence at harassment sa mga eskuwelahan dahil pare-parehong lumulutang ang mga ganitong insidente sa iba pang pasilidad.

Ang pananahimik aniya ng mga kinauukulan ay dagdag pang bigat sa mga biktima at nagiging daan din para makapambiktima pa ang mga abusadong guro.

Hinimok ng SPARK ang FEU High School Administration na magsorry sa kabiguan nitong maprotektahan ang mga estudyante.

Sarado muna ang central office at mga tanggapan ng Land Transportation Franchising and Regulatory Board (LTFRB) sa Metro Manila.

Ito, ayon sa LTFRB, ay para maisalang sa swab test ang kanilang mga empleyado.

Ipinabatid ng LTFRB na wala munang transaksyon sa LTFRB hanggang sa Lunes, ika-26 ng Abril, subalit bukas naman ang technical division ng ahensya para sa pagproseso online ng ilang requests.

Kabilang dito ang mga request for special permit at correction ng typographical error, confirmation of units, franchise verification, issuance o extension provisional authority, legal concerns/query, information systems management division at public utility vehicle modernization program national project management office.

Sinabi ng LTFRB na ang mga applicant ay maaaring magfile ng request sa pamamagitan ng pag-download ng form sa website, pag-fill out at i-e mail ito sa kinauukulang division at hintayin ang resulta nito sa www.ltfrb.gov.ph.

Kontra ang Union of Local Authorities of the Philippines (ULAP) sa pagkuha umano ng permit ng mga organizers bago makapagtayo ng community pantry.

Binigyang diin ni Quirino Governor Dakila Carlo Cua, pagulo ng ULAP, na maraming mapagbabawalang tumulong sa mga kapwa nila Pilipino sa panahon ngayon kung pahihirapan pa ang proseso.

Marami aniyang nangangailangan na matutulungan ng mga community pantry at magtiwala na lamang sa mga mamamayan dahil makikita ng mga ito kung may ibang motibo ang organizers ng community pantries.

Sinabi ni Cua na maaaring sa barangay na lamang ipaalam ang pagnanais na makapagtayo ng community pantry na paraan nang pagpapakita ng bayanihan ng mga Pilipino.

Gayunman, inihayag ni Cua na dapat mahigpit na masunod ang health protocols para na rin sa kaligtasan ng lahat.